1 Entonces e David locꞌoy ajni tama e aldea Naiot xeꞌ turu tama e chinam Ramá, y ixin esto tiaꞌ turu e Jonatán, y uyare cocha era:

—¿Tucꞌa mabꞌambꞌanir inche? Y ¿tucꞌa imbꞌeto taca atata? Y ¿tucꞌa inche tuaꞌ inqꞌuijnes atata este que war usajquen tuaꞌ uchamsen? che e David.

2 Entonces ojron e Jonatán y che:

—¡Majax bꞌan! Nitata machi cꞌani uchamset. Pues jaxir matucꞌa umuqui taniut, sino que axin uchecsu tunor lo que cꞌani uche, motor que imbꞌijc taca ucꞌampibꞌir. Y ¿tucꞌa tuaꞌ que axin umuqui taniut que cꞌani ani uchamset? Nitata machi ixto cꞌani uchamset, che e Jonatán.

3 Pero e David sutpa ojron y che:

—Cꞌani inwaret tama ucꞌabꞌa Cawinquirar Dios que cocha war unata atata que net y nen war cayajta coit cabꞌa meyra, machi cꞌani uchecsu toit que cꞌani uchamsen tuaꞌ machi uchiet anumse abꞌa. Pero cꞌani inwaret que bꞌan cocha turet net y bꞌan cocha turu Cawinquirar Dios, y bꞌan ixto war axana e chamer tanipat, che e David.

4 Entonces e Jonatán uyubꞌi tuaꞌ e David y che:

—¿Tucꞌa erer inche tuaꞌ intacret? che e Jonatán.

5 Y che e David:

—Pues ejcꞌar jax e día conda aquetpa tuaꞌ achena e nojqꞌuin umen que chꞌoc e luna, y nen inquetpa tuaꞌ inturuan tor e mesa tuaꞌ inweꞌ taca atata xeꞌ jax e rey. Pero machi cꞌani inche, sino que cꞌani inxin inmucuan tacꞌopot esto tama ucꞌapesnibꞌir e día chabꞌij. 6 Y jay atata uyubꞌi tabꞌa que tiaꞌ ixien, aren que incꞌajti e permiso tacaret tuaꞌ inxin esto taniotot tama e chinam Belén, cocha aquetpa tuaꞌ inturuan taca nifamilia tama inteꞌ nojqꞌuin conda uchamsiobꞌ y uputobꞌ incojt arac inyajr tama inteꞌ inteꞌ año. 7 Y jay jaxir matucꞌa uyaret, entonces erer innata que matucꞌa tuaꞌ innumse nibꞌa. Pero jay jaxir axin aqꞌuijna meyra, entonces erer anata que war ubꞌijnu tuaꞌ uchamsen. 8 Y tamar era quisinic que ayajta niut, cocha net y nen cꞌapa cache inteꞌ pacto tut Cawinquirar Dios tuaꞌ cayajta coit cabꞌa iraj iraj. Pero jay ayan e mabꞌambꞌanir lo que cay inche upater atata, chamsenen net taca. Pero ira aqꞌuechien inxin tut jaxir tuaꞌ uchamsen, che e David.

9 Entonces ojron e Jonatán y che:

—Nen ma tiaꞌ tuaꞌ inche bꞌan cocha war awaren era. Pero jay incꞌotoy innata que nitata war ubꞌijnu tuaꞌ uchamset, cꞌani ixto inwaret, che e Jonatán.

10 Entonces ojron e David y che:

—¿Cocha tuaꞌ incꞌotoy innata jay war aqꞌuijna atata o jay machi? che e David.

11 Y che e Jonatán:

—Lar incoꞌ tacaren esto tacꞌopot, che e Jonatán.

Entonces chatertiobꞌ ixiobꞌ tacꞌopot. 12 Y conda cꞌotoyobꞌ cay ojron e Jonatán y che:

—Cꞌani inwaret tama ucꞌabꞌa Cawinquirar Dios xeꞌ jax Cadiosir xeꞌ tuon e Israel que chabꞌij tama e hora era cꞌani umbꞌi tuaꞌ nitata tuaꞌ innata lo que war ubꞌijnu tamaret. Y jay war ubꞌijnu que matucꞌa ibꞌeto tacar, nen cꞌani inware tuaꞌ iyarobꞌna. 13 Pero jay war ubꞌijnu tuaꞌ uchamset, que e Dios uwatzꞌiquen jay mamjachi inwebꞌta axin toit tuaꞌ uchecsu tunor era, porque cꞌani intacret tuaꞌ ilocꞌoy iyajni tut nitata y que ituruan taca e jiriar. Pues que Cawinquirar Dios utacriquet meyra bꞌan cocha cay utacre nitata. 14 Y jay nen turento conda Cawinquirar Dios axin utacret tuaꞌ iquetpa rey, quisinic que ayajta niut bꞌan cocha Cawinquirar Dios war uyajta niut. Pero jay inxin inchamay, 15 quisinic que iꞌxin ayajta ut tunor nifamilia, motor conda Cawinquirar Dios acꞌapa usati tunor tin e war aqꞌuijna uwiretobꞌ tara tor e rum, che e Jonatán.

16 Y de allí e Jonatán uche inteꞌ pacto taca e David y che:

—Que Cawinquirar Dios cꞌapic usatic tunor tin e aqꞌuijna uwiretobꞌ, che e Jonatán. 17 Y entonces e Jonatán sutpa uyare e David tuaꞌ uche inteꞌ pacto otronyajr tuaꞌ aquetpa chequer que ma tiaꞌ tuaꞌ uyacta tuaꞌ uyajta ut ubꞌobꞌ, cocha e Jonatán meyra war uyajta ut e David, bꞌan cocha war uyajta ut ubꞌa. 18 Y de allí ojron e Jonatán y che:

—Pues ejcꞌar jax e día conda cꞌani achena e nojqꞌuin umen que chꞌoc e luna, y conda eꞌrna que machi turet tor e mesa axin uyubꞌiobꞌ tamaret. 19 Pero conda atzꞌacta chateꞌ día que machi turet, cꞌani aquetpa más chequer que war ucꞌajbꞌuetobꞌ. Entonces tama e día uxij era quiqui esto tama e lugar tiaꞌ cay mucuanet tama inyajr, y quetpen tuyejtzꞌer e sian tun xeꞌ morojsebꞌir turobꞌ bꞌana. 20 Y nen cꞌani unri uxteꞌ sarac tuyejtzꞌer tiaꞌ turet, bꞌan cocha jay ayan ani lo que cꞌani inwajcꞌu, 21 y de allí cꞌani inware e sitz cocha era y che: “Quiqui sajcan e sarac.” Y jay inware: “Chꞌar e sarac más tara tiaꞌ turet. Quiqui cꞌopo”, entonces bꞌan cocha turu Cawinquirar Dios matucꞌa tuaꞌ anumse abꞌa, y erer ajiri awalma. 22 Pero jay inware cocha era y che: “E sarac chꞌarobꞌ más bꞌana,” quiqui ajner porque Cawinquirar Dios war ucꞌani tuaꞌ iꞌxin. 23 Y tama e pacto lo que cay cache tuaꞌ cayajta ut cabꞌa iraj iraj, jax Cawinquirar Dios xeꞌ tuaꞌ ucojcon tuaꞌ machi canajpes, che e Jonatán.

24 Entonces e David ixin mucuan tama e lugar tiaꞌ cay mucuan tama inyajr, y conda cay chena e nojqꞌuin umen que chꞌoc e luna, e rey ixin tuaꞌ aturuan tor e mesa 25 tiaꞌ acay aturuan tuyejtzꞌer unac e otot. Y e Jonatán turuan tut utata, y e Abner xeꞌ e ajbꞌijresiaj tujor tunor e ajtzꞌojyirobꞌ turuan tuyejtzꞌer e Saúl. Pero e cꞌajn tiaꞌ aquetpa tuaꞌ aturuan e David quetpa tojbꞌen. 26 Y tama e día era e Saúl matucꞌa che tama e David, sino que war ubꞌijnu que bꞌajcꞌat ayan lo que unumse ubꞌa tuaꞌ uquete uwabꞌu * “Tuaꞌ machi uyubꞌi uyujtzꞌi ut e Dios.” Pues tama e onian tiempo quetpa que tin e tuaꞌ e Israel xeꞌ cꞌani uyujtzꞌi ut e Dios ucꞌani tuaꞌ aꞌtiꞌ y ucꞌani tuaꞌ ulapi ubꞌujc xeꞌ pojchbꞌir. Pero jay ayan lo que uche que machi ucꞌani tama uley e Moisés, bꞌan cocha jay inteꞌ upijchꞌi inteꞌ chamen gente o inteꞌ chamen animal, entonces ucꞌani tuaꞌ aquetpa najtir inteꞌ día y de allí erer asutpa uyujtzꞌi ut e Dios taca e inmojr gente Pero coner intiach turon umen que corpesbꞌiron tama uchamer e Cristo, y tamar era aquetpa pocbꞌir cawalma. (Iranic tama e Hebreos 10:10, 22.)tuaꞌ machi uyubꞌi uyujtzꞌi ut e Dios. 27 Pero tama otronteꞌ día xeꞌ jax e chateꞌ día tama e nojqꞌuin, e Saúl uwira que quetpa tojbꞌen ucꞌajn e David otronyajr. Entonces qꞌuijna y uyubꞌi tuaꞌ uyunen Jonatán y che:

—¿Tucꞌa tuaꞌ que machi tari uyunen e Isaí tuaꞌ aweꞌ acbꞌi y nien sajmi? che e Saúl.

28 Entonces ojron e Jonatán y che:

—Pues e David ucꞌajti tacaren tuaꞌ inwacta axin esto tama e chinam Belén. 29 Y uyaren cocha era y che: “Actanen inxin cocha upejquenobꞌ nifamilia tuaꞌ incꞌotoy tama e nojqꞌuin lo que uchiobꞌ tiaꞌ uchamsiobꞌ y uputobꞌ incojt arac, y tamar era arobꞌnen tuaꞌ inxin umen nisacunobꞌ. Y jay imbꞌutz toit, quisinic awacten tuaꞌ inxin inwarajse nifamilia,” che uyaren e David. Y nen inware que uyubꞌi, y tamar era machi turu tor e mesa tuaꞌ aweꞌ tacaret, che e Jonatán.

30 Entonces e Saúl qꞌuijna meyra taca e Jonatán y che:

—Net uyaret inteꞌ ajmabꞌambꞌan ixic xeꞌ uputputir ut. ¿War ca abꞌijnu que machi war innata que net war acꞌani abꞌa meyra taca uyunen e Isaí este que war acꞌani tuaꞌ aquetpa rey jaxir? Pues ¿machi ca anata que war asubꞌajres abꞌa y atuꞌ taca abꞌijnusiaj era? 31 Y conda turuto uyunen e Isaí tara tor e rum, net ma tiaꞌ tuaꞌ icꞌotoy iquetpa rey, y ma tiaꞌ tuaꞌ icꞌotori tujor e chinam Israel. Entonces aren tuaꞌ asajcna y tuaꞌ ataresna taniut, porque ucꞌani tuaꞌ achamesna, che e Saúl.

32 Entonces ojron e Jonatán y che:

—Y ¿tucꞌa tuaꞌ que ucꞌani tuaꞌ achamesna? Y ¿tucꞌa mabꞌambꞌanir cay uche? che e Jonatán.

33 Entonces e Saúl uri ulanza tuaꞌ ani uchamse e Jonatán, pero machi ajcꞌuna umener. Y bꞌan cocha era e Jonatán cꞌotoy unata que utata cꞌani ixto uchamse e David. 34 Entonces achpa wacchetaca tor e mesa, war ixto aqꞌuijna y locꞌoy patir. Y machi quetpa tuaꞌ aweꞌ tama e chajr día era. Y war amerecna tama e David y war asubꞌajra umen que utata war ubꞌijnu tuaꞌ uchamse. 35 Entonces tama otronteꞌ día ixin e Jonatán tacꞌopot tiaꞌ turu e David bꞌan cocha quetpa tuaꞌ uche, y uqꞌueche ixin inteꞌ sitz tacar. 36 Entonces e Jonatán uyare e sitz y che:

—Ajnien quiqui bꞌana tuaꞌ asajca e sarac lo que cꞌani unri, che e Jonatán.

Entonces ajni ixin e sitz, y e Jonatán ujuri inteꞌ sarac xeꞌ cꞌaxi más innajt que tiaꞌ war aꞌjni e sitz. 37 Entonces conda e sitz cꞌotoy esto tiaꞌ cꞌaxi e sarac, e Jonatán aru taca inteꞌ nuxi nuc y che:

—War e sarac más bꞌana que tiaꞌ turet, che e Jonatán.

38 Y de allí e Jonatán sutpa aru otronyajr y che:

—Quiqui wacchetaca, y ira iquetpa tarex, che e Jonatán.

Entonces e sitz ixin ucꞌopi e sarac wacchetaca y sutpa uqꞌueche ixin tut uwinquir. 39 Pero e sitz matucꞌa unata tamar lo que war anumuy era, cocha jax taca e Jonatán y e David xeꞌ war unatobꞌ tucꞌa war che tunor era. 40 Y de allí e Jonatán uyajcꞌu uchꞌantꞌin y usarac e sitz y uyare tuaꞌ uqꞌueche axin esto tuyotot tama e chinam.

41 Pues conda cꞌapa locꞌoy e sitz, e David locꞌoy tupat e sian tun tiaꞌ war amucuan, y de allí cotuan tut e Jonatán uxyajr este que utacbꞌu ut ujor tut e rum. Y de allí utzꞌujtzꞌi ubꞌobꞌ y aruobꞌ mecbꞌirobꞌ, pero jax e David xeꞌ más aru. 42 Y de allí e Jonatán uyare e David y che:

—Jirijsen abꞌa y chiquet imbꞌutz tama axambꞌar, cocha non cꞌapa cache inteꞌ pacto tama ucꞌabꞌa Cawinquirar Dios que cꞌani catzay cawira cabꞌa iraj iraj. Y Cawinquirar Dios jax cawajchecsuyaj que bꞌan tuaꞌ aquetpa tama tunor e tiempo, y que bꞌan tuaꞌ aquetpa tujam nichꞌajnarir y tujam achꞌajnarir ubꞌan, che Jonatán.

Y de allí locꞌoy ixin e David, y e Jonatán sutpa ixin esto tama e chinam otronyajr.