1 Pues entonces conda e Saúl taca uyajtzꞌojyirobꞌ sutpa tariobꞌ tiaꞌ war uchiobꞌ e tzꞌojyir taca tin e ajtzꞌojyirobꞌ xeꞌ tuobꞌ uchꞌajnarir e Filisti, arobꞌna que e David ixin esto tama e choquem lugar xeꞌ ucꞌabꞌa En-gadi. 2 Entonces e Saúl ixin usicbꞌa 3,000 ajtzꞌojyirobꞌ tama tunor e Israel y uqꞌueche ixiobꞌ esto tiaꞌ ayan meyra sian tun tiaꞌ aturuan e sian ajcꞌopot chivo tuaꞌ usajca e David taca uyajtzꞌojyirobꞌ. 3 Y conda war axana axiobꞌ tama e bꞌir, cꞌotoyobꞌ tut inteꞌ macteꞌ tiaꞌ amajca cora oveja, y tuyejtzꞌer ayan inteꞌ chꞌen tama unac e witzir. Entonces e Saúl ochoy tama e chꞌen tuaꞌ abꞌosi. Pero e David taca uyajtzꞌojyirobꞌ war amucuanobꞌ tamar taca e chꞌen era. 4 Y conda erna umen uyajtzꞌojyirobꞌ e David ojronobꞌ tzꞌustaca y chenobꞌ:

—Pues coner jax e día conda Cawinquirar Dios cꞌani acꞌapa uche tacaret bꞌan taca cocha cay uyaret que cꞌani uturbꞌa tama acꞌabꞌ tunor tin e aqꞌuijna uwiretobꞌ. Y tamar era chen tacar bꞌan taca cocha abꞌijnu ache, chenobꞌ e ajtzꞌojyirobꞌ.

Entonces achpa e David, y ixin tzꞌustaca esto tiaꞌ turu e Saúl y uxuri imbꞌijc ubꞌujc taca umachit. 5 Entonces sutpa ixin tzꞌustaca esto tiaꞌ turu uyajtzꞌojyirobꞌ. Pero de allí cay ubꞌijnu que mabꞌambꞌan lo que uche conda uxuri imbꞌijc ubꞌujc e Saúl. 6 Entonces uyare uyajtzꞌojyirobꞌ y che:

—Pues Cawinquirar Dios unata que mabꞌambꞌan lo que inche upater niwinquir xeꞌ jax e rey. Que Cawinquirar Dios axin ucorpesiquen tuaꞌ machi asutpa inche lo que mabꞌambꞌan bꞌan cocha era. Porque jaxir cꞌotoy quetpa rey umen que sicbꞌabꞌir umen e Dios, che e David.

7 Pues bꞌan cocha era e David uquete uyajtzꞌojyirobꞌ tuaꞌ machi uchamse e Saúl. Entonces locꞌoy e Saúl tama e chꞌen tama unac e witzir y uwajpi e bꞌir y ixin. 8 Y conda innajtix turu cora locꞌoy e David tamar taca e chꞌen era tama unac e witzir, y ojron taca inteꞌ nuxi nuc tuaꞌ uyare e Saúl cocha era y che:

—Niwinquiret, che e David.

Entonces e Saúl sutpa eꞌron tupat y uwira que e David war acotuan este que utacbꞌu ut ujor tut e rum tut jaxir 9 y che:

—¿Tucꞌa tuaꞌ que war acꞌubꞌse tin e war uyaretobꞌ que nen war insajquet tuaꞌ inchamset? 10 Pues net erer awira taca unacꞌoit que majax bꞌan, cocha sajmi turbꞌanet tama nicꞌabꞌ umen Cawinquirar Dios conda ochoyet tama e chꞌen tama unac e witzir, pero nen matucꞌa inche apater motor que bꞌan arobꞌnen tuaꞌ inche umen niwajtzꞌojyirobꞌ. Y de allí cay imbꞌijnu que cocha net jaxet e rey, bꞌan quetpet umen que sicbꞌabꞌiret umen Cawinquirar Dios, y tamar era machi inchamset.

11 “Entonces, niwinquiret, iran lo que qꞌuecher nimener: pues era jax imbꞌijc abꞌujc xeꞌ inxuri sajmi taca nimachit, y tamar era erer ani inchamset. Entonces natan ixto yaꞌ que nen machi war imbꞌijnu tuaꞌ inchamset, y que matucꞌa war imbꞌijnu tuaꞌ inche apater. Y tamar era matucꞌa imbꞌeto tacaret. Pero net war ixana asajquen tuaꞌ achamsen. 12 Pero jax Cawinquirar Dios xeꞌ tuaꞌ ubꞌijnu uwira chi ticajam xeꞌ war uche lo que erach tut, y que tamar era quisinic ani que uyebꞌta watar e jatzꞌuar tajor tama tunor lo que war ache nipater. Pero nen ma tiaꞌ tuaꞌ inche lo que mabꞌambꞌan apater. 13 Pues ayan inteꞌ onian ojroner xeꞌ che: ‘E mabꞌambꞌanir axin achena umen tin e ajmabꞌambꞌanirobꞌ.’ Y cocha nen majax ajmabꞌambꞌaniren, ma tiaꞌ tuaꞌ injachi nicꞌabꞌ apater. 14 Pues net jaxet e rey tuaꞌ e Israel. Entonces ¿tucꞌa tuaꞌ que war asajquen xeꞌ bꞌanen cocha inteꞌ chamen tzꞌiꞌ o bꞌanen cocha incojt chꞌac? 15 Pues que Cawinquirar Dios ubꞌijnuic uwira ticajam chi xeꞌ war uche lo que imbꞌutz tut jaxir, y que axin uwatzꞌi tin e war uche lo que mabꞌambꞌan. Pues quisinic que Cawinquirar Dios xeꞌ jax Niwajcorpesiaj axin ucorpesen toit tuaꞌ machi achamsen,” che e David.

16 Y conda cꞌapa ojron e David, ojron e Saúl y che:

—¿Jax ca net e David xeꞌ bꞌanet cocha incojt niunen? che e Saúl.

Y de allí e Saúl cay aru taca inteꞌ nuxi nuc, 17 y che:

—Pues net más nojta acꞌampibꞌir que nen, cocha net war taca ache lo que imbꞌutz taniut motor que nen war imbꞌijnu tuaꞌ inche e mabꞌambꞌanir apater. 18 Y coner cꞌapa achecsu abꞌa taniut que incꞌun awirnar, porque motor que sajmi Cawinquirar Dios uturbꞌen tama acꞌabꞌ, pero net machi achamsen. 19 Pues mamajchi ani uyacta axin bꞌan taca tin e war aqꞌuijna uwira conda aquetpa yebꞌar ucꞌabꞌ. Que Cawinquirar Dios utoyiquet tamar lo que ache xeꞌ imbꞌutz tacaren sajmi. 20 Y coner war acꞌotoy innata ixto yaꞌ que watar e día net tuaꞌ iquetpa rey tama e Israel, y que e Israel tuaꞌ axin aqꞌuecꞌo yebꞌar acꞌotorer. 21 Y tamar era arenen tama ucꞌabꞌa Cawinquirar Dios que machi tuaꞌ asati nichꞌajnarir y que nien machi tuaꞌ asati nicꞌabꞌa tujam nichꞌajnarir, che e Saúl.

22 Entonces e David uyare e Saúl tama ucꞌabꞌa Cawinquirar Dios que san tuaꞌ uche bꞌan cocha arobꞌna era. Y de allí e Saúl sutpa ixin esto tuyotot, y e David taca uyajtzꞌojyirobꞌ sutpa ixiobꞌ esto tiaꞌ war amucuanobꞌ.