1 Pues tama inteꞌ día ixiobꞌ cora winicobꞌ xeꞌ ajlugarobꞌ tama e choquem lugar Zif esto tama e chinam Guibeá tuaꞌ oꞌjronobꞌ taca e Saúl, y chenobꞌ: “Pues e David war amucuan tama inteꞌ chꞌen lo que ayan tama unac or inteꞌ witzir xeꞌ ucꞌabꞌa Haquilá xeꞌ turu más bꞌana que e chinam Jesimón,” chenobꞌ e winicobꞌ xeꞌ ajlugarobꞌ tama e choquem lugar Zif.

2 Entonces e Saúl cay usicbꞌa 3,000 ajtzꞌojyirobꞌ tujam tunor tin e turobꞌ tama e Israel xeꞌ más obꞌna uchiobꞌ e tzꞌojyir, y ixiobꞌ esto tama e choquem lugar Zif tuaꞌ usajcobꞌ e David. 3 Entonces cꞌotoy e Saúl taca uyajtzꞌojyirobꞌ esto tama or e witzir Haquilá y turuanobꞌ tuyejtzꞌer e bꞌir xeꞌ axin esto tama e chinam Jesimón, xeꞌ jax e lugar tiaꞌ arobꞌna e Saúl que war amucuan e David. Pero conda e David cꞌotoy unata que war acꞌotoy e Saúl esto tama e choquem lugar era tuaꞌ usajca, 4 uyebꞌta ixin cora winicobꞌ tuaꞌ uwirobꞌ esto tiaꞌ cꞌotoy e Saúl. 5 Entonces conda war amaxian tama e acbꞌar era ixin e David esto tama e lugar tiaꞌ aquetpa tuaꞌ awayan e Saúl taca uyajtzꞌojyirobꞌ, y cay uchꞌujcu uwira tiaꞌ tuaꞌ aquetpa e Saúl tuaꞌ awayan. Y uwira que tuyejtzꞌer e Saúl war achꞌan e Abner xeꞌ jax uyunen e Ner, xeꞌ jax e ajbꞌijresiaj tuaꞌ uyajtzꞌojyirobꞌ e Saúl. Y uwira que e Saúl war awayan tuyuxin tunor uyajtzꞌojyirobꞌ. 6 Y de allí e David sutpa ixin esto tiaꞌ turobꞌ e inmojr ajtzꞌojyirobꞌ y cay ojron taca e Ahimélec xeꞌ chꞌajnarir tuaꞌ e Het y taca e Abisai xeꞌ jax uyar e Seruiá y xeꞌ sacumbꞌir tuaꞌ e Joab y che:

—¿Chi xeꞌ turix tuaꞌ ecmay tacaren esto tiaꞌ war awayan e Saúl? che e David. Entonces ojron e Abisai y che:

—¡Nen! Nen turix tuaꞌ encmay tacaret, che e Abisai.

7 Entonces e David y e Abisai ecmay ixiobꞌ tzꞌustaca esto tiaꞌ chꞌar e Saúl taca uyajtzꞌojyirobꞌ. Y conda cꞌotoyobꞌ tuyejtzꞌer tiaꞌ war awayan e Saúl, uwirobꞌ que tujor war ulanza tzꞌapar tut e rum, y que chꞌarobꞌ e Abner taca tunor uyajtzꞌojyirobꞌ tama tunor uyejtzꞌer. 8 Entonces e Abisai uyare e David y che:

—Coner e Dios uturbꞌix tama acꞌabꞌ tin e aqꞌuijna uwiret. Actanen tuaꞌ inchamse, y tacar taca ulanza cꞌani inwacta tacꞌar tut e rum. Inyajr taca tuaꞌ inyopru tuaꞌ achamay, che e Abisai.

9 Entonces ojron e David y che:

—Machi. Ira achamse, porque ma cocha erer aquetpa bꞌan taca tin e axin uchamse e rey xeꞌ sicbꞌabꞌir umen Cawinquirar Dios, sino que aquetpa tuaꞌ acꞌaxi ujatzꞌuar e Dios tujor. 10 Pero bꞌan cocha turu Cawinquirar Dios que san tuaꞌ ulocse ucuxtar e Saúl watar e día. Bꞌajcꞌat axin ulocse ucuxtar conda aquetpa onian winic, o bꞌajcꞌat conda axin uche e tzꞌojyir. 11 Que Cawinquirar Dios ucorpesiquen tuaꞌ machi imbꞌijnu inchamse e rey xeꞌ sicbꞌabꞌir umener. Pero caqꞌuechic axin ulanza xeꞌ war tujor tiaꞌ chꞌar awayan y e pichel xeꞌ bꞌutꞌur taca e jaꞌ, y incoꞌ, che e David.

12 Entonces e David uchꞌami e lanza y e pichel xeꞌ war tuyejtzꞌer e Saúl, y de allí locꞌoy ajniobꞌ. Y mamajchi umen irnobꞌ y nien mamajchi umen ubꞌna que cꞌotoyobꞌ, y mamajchi bꞌixcꞌa, cocha Cawinquirar Dios uturbꞌa inteꞌ nuxi waynij tama tunor e ajtzꞌojyirobꞌ era. 13 Y de allí e David y e Abisai ixiobꞌ esto tujor e witzir xeꞌ aquetpa innajt cora tiaꞌ turu e Saúl taca uyajtzꞌojyirobꞌ. 14 Entonces e David upejca e Abner taca inteꞌ nuxi unuc y che:

—Abner, ¿oybꞌi ca ninuc? Bꞌixqꞌuen, achpen, che e David.

Entonces ojron e Abner y che:

—¿Chiet net, pue? ¿Tucꞌa que war abꞌixqꞌues e rey? che e Abner.

15 Entonces ojron e David y che:

—¿Ma ca jax net e winic xeꞌ más nojta acꞌampibꞌir tama tunor e Israel, y que mamajchi xeꞌ bꞌan cocha net? Entonces ¿tucꞌa tuaꞌ que machi acojco awinquir xeꞌ jax e rey? Porque sajmi oꞌchoy incojt winic tiaꞌ turet tuaꞌ ani uchamse. 16 Pues majax imbꞌutz lo que ache cocha quetpa ani tuaꞌ acojco ucuxtar e rey. Entonces bꞌan cocha turu Cawinquirar Dios net taca tunor e ajtzꞌojyirobꞌ xeꞌ turobꞌ tacaret tawarox ani tuaꞌ ixchamesna, cocha machi icojco iwinquir xeꞌ jax e rey xeꞌ sicbꞌabꞌir umen Cawinquirar Dios. Pues ¿tiaꞌ aquetpa ulanza e rey y e pichel xeꞌ bꞌutꞌur taca e jaꞌ xeꞌ war ani tujor tiaꞌ awayan? Chꞌujcun awira jay atajwi, che e David.

17 Entonces bꞌixcꞌa e Saúl y wacchetaca cꞌotoy unata que jax unuc e David. Entonces ojron e David y che:

—¿Jax ca net David xeꞌ bꞌanet cocha niunen? che e Saúl.

Y ojron e David y che:

—Bꞌan yaꞌ, niwinquiret. Nen. 18 ¿Tucꞌa tuaꞌ que war ixana asicbꞌen? Y ¿tucꞌa mabꞌambꞌanir cay inche apater? 19 Pues niwinquiret, quisinic oybꞌi lo que cꞌani inwaret era: porque jay jax Cawinquirar Dios xeꞌ war uyaret tuaꞌ iqꞌuijna tacaren, erer inchamse y imputa incojt arac tut tuaꞌ inchꞌami e cꞌumpar. Pero jay tunor e qꞌuijnar era jax taca ubꞌijnusiajobꞌ e winicobꞌ, entonces que Cawinquirar Dios uyebꞌtic inteꞌ bꞌax tujorobꞌ. Porque nox ilocsen tama niotot, y machi ixto uyubꞌien inturuan tama e rum xeꞌ ajcꞌunen umen Cawinquirar Dios, y war anrobꞌna tuaꞌ inxin unjtzꞌi ut e chamen diosobꞌ. 20 Pues quisinic machi inchamay najtir tiaꞌ machi ujtzna ut Cawinquirar Dios. Y ¿tucꞌa tuaꞌ que net xeꞌ jax e rey tuaꞌ e Israel war ixana asajquen? Pues nen bꞌanen taca cocha incojt chꞌac toit. Y ¿tucꞌa tuaꞌ que war ixana asajquen tor e witzir bꞌan ani cocha asajcna incojt wancherec? che e David.

21 Entonces ojron e Saúl y che:

—David xeꞌ bꞌanet cocha niunenet, nen innata que inchix e mabꞌambꞌanir toit y que cay inche bꞌan cocha uchiobꞌ tin e uputputir utobꞌ. Pero cꞌani inwaret tuaꞌ isutpa tama oꞌtot y que nen mix tucꞌa tuaꞌ inche apater, cocha net war achecsu abꞌa que war ayajta niut cocha machi achamsen sajmi conda uyubꞌiet ani ache, che e Saúl.

22 Entonces ojron e David y che:

—Tara chꞌar alanza, niwinquiret. Actan taric incojt chꞌom sitz tuaꞌ uchꞌami. 23 Pues Cawinquirar Dios uyajcꞌu utuanibꞌir tin tin xeꞌ ubꞌijnu tuaꞌ aquetpa imbꞌutz tut. Y machi inchamset motor conda turbꞌanet tama nicꞌabꞌ umen e Dios, cocha net jaxet e rey xeꞌ sicbꞌabꞌiret umen Cawinquirar Dios. 24 Pues bꞌan cocha inchecsu sajmi que nojta ucꞌampibꞌir acuxtar taniut, que Cawinquirar Dios axin uchecsu que nojta ucꞌampibꞌir nicuxtar tut jaxir ubꞌan, y que jaxir axin ucorpesen tama tunor lo que war innumse nibꞌa era, che e David.

25 Entonces e Saúl uyare e David y che:

—David, xeꞌ bꞌanet cocha niunenet, que e Dios axin uchojbꞌesiquet. Y que net iꞌxin ache meyra lo que imbꞌutz, y que tunor lo que ache axin alocꞌoy imbꞌutz, che e Saúl.

Entonces e Saúl sutpa ixin esto tuyotot, y e David sutpa ixin esto tiaꞌ turobꞌ uyajtzꞌojyirobꞌ.