1 Pues entonces nacpat que chamesna e Saúl, e David sutpa ixin esto tama e chinam Siclag nacpat que cꞌapa uche e tzꞌojyir taca tin e tuobꞌ uchꞌajnarir e Amalec. Y yajaꞌ taca quetpa chateꞌ día. 2 Pero tama e uxteꞌ día cꞌotoy inteꞌ winic xeꞌ man tuaꞌ e Saúl xeꞌ wejrem ubꞌujc, y ayan e tanlum tama ujor tuaꞌ aquetpa chequer que tzajtaca ut tama inteꞌ chamen. Entonces e winic cotuan tut e David esto que utacbꞌu ut ujor tut e rum. 3 Entonces e David uyubꞌi tuaꞌ e winic y che:

—¿Tiaꞌ war iyopa? che e David. Y e winic che:

—Pues nen locꞌoy ajnien tama e lugar tiaꞌ morojsebꞌir e ajtzꞌojyirobꞌ tuaꞌ e Israel, che e winic.

4 Entonces ojron e David y che:

—¿Tucꞌa numuy? Arenen lo que chempa tama e tzꞌojyir, che e David.

Y che e winic:

—Tunor e ajtzꞌojyirobꞌ locꞌoy ajniobꞌ tama e tzꞌojyir, y ayan meyra winicobꞌ xeꞌ chamesnobꞌ. Y e Saúl y uyunen Jonatán chamesnobꞌ ubꞌan, che e winic.

5 Entonces ojron e David y che:

—Y ¿cocha cꞌotoy anata que chamesnobꞌ e Saúl y uyunen Jonatán? che e David. 6 Entonces sutpa ojron e winic y che:

—Pues turen tama or e witzir Guilboa, y inwira que e Saúl war abꞌoyo tama ulanza, y inwira que ayan meyra sian ajtzꞌojyirobꞌ tuaꞌ tin e aqꞌuijnobꞌ xeꞌ war uxojyruobꞌ e Saúl taca meyra carruaje tuaꞌ e tzꞌojyir. 7 Y tamar era e Saúl sutpa uwiren tama upat, y upejquen tuaꞌ incꞌotoy tuyejtzꞌer. Y entonces inware: “¿Tucꞌa acꞌani tuaꞌ inche?” inware. 8 Y che jaxir: “¿Chiet net?”. Y nen inware que chꞌajnariren tuaꞌ e Amalec. 9 Entonces e Saúl uyaren y che: “Lar taniwejtzꞌer y chamsenen inyajrer, porque war innumse nibꞌa meyra taca e cꞌuxner, pero war eixna tuaꞌ inchamay”, che uyaren. 10 Y entonces ixien inchamse, porque inwira que ma cocha erer atzꞌacpa. Y de allí inlocse e corona lo que jurur tama ujor y e brazalete xeꞌ jurur tama ut ucꞌabꞌ y intares tuaꞌ inwajqꞌuet net, niwinquiret, che e winic xeꞌ tuaꞌ uchꞌajnarir e Amalec.

11 Pues conda e David taca tunor tin e turobꞌ tacar uyubꞌiobꞌ e ojroner era, cꞌapa uwejru ubꞌujcobꞌ tuaꞌ aquetpa chequer que war atzꞌintzꞌobꞌ tama uchamer e Saúl. 12 Y cay aruobꞌ taca inteꞌ nuxi nuc y turuanobꞌ tzajtaca utobꞌ y uyactobꞌ tuaꞌ awiobꞌ tama tunor e ajqꞌuin tama uchamer e Saúl y uyunen Jonatán, y tama uchamer tunor e ajtzꞌojyirobꞌ tuaꞌ e Israel. 13 Y de allí e David uyubꞌi tuaꞌ e chꞌom sitz xeꞌ cꞌotoy uchecsu tunor era tut y che:

—Y ¿net tiaꞌ ajlugaret? che e David. Y che e chꞌom sitz:

—Pues nitata chꞌajnarir tuaꞌ e Amalec, pero turuanon tama e Israel, che e chꞌom sitz.

14 Entonces ojron e David y che:

—Y ¿tucꞌa tuaꞌ que machi bꞌactet tuaꞌ achamse e rey xeꞌ sicbꞌabꞌir umen Cawinquirar Dios? che e David. 15 Y de allí uyare incojt uman y che:

—Quiqui chamsen e chꞌom sitz era, che e David.

Entonces e man ixin uyopru e chꞌom sitz y uchamse taca e machit. 16 Pero conda merato achamay e chꞌom sitz, ojron e David y che:

—Tama ajor taca tuaꞌ acꞌaxi achamer, cocha netach achecsu que jax net xeꞌ achamse e rey xeꞌ sicbꞌabꞌir umen Cawinquirar Dios, che e David.

17 Entonces e David utzꞌijbꞌa inteꞌ cꞌay tamar uchamer e Saúl y uyunen Jonatán, 18 y uyare tuaꞌ acansenobꞌ tunor tin e tuobꞌ uchꞌajnarir e Judá. Pues ayan ucꞌabꞌa e cꞌay xeꞌ jax “E cꞌay tuaꞌ e chꞌantꞌin” y chꞌar tzꞌijbꞌabꞌir tama e libro tuaꞌ tin e erachobꞌ. Y che e cꞌay cocha era: