1 Pues conda e Is-bóset xeꞌ jax uyunen e Saúl, cꞌotoy unata que chamesna e Abner tama e chinam Hebrón, quetpa injayjay inyajrer, y bꞌan tunor tin e turobꞌ tama e país Israel, bꞌactobꞌ inyajrer. 2 Pero taca e Is-bóset ayan chateꞌ winicobꞌ xeꞌ ajbꞌijresiajobꞌ tuaꞌ cora ajtzꞌojyirobꞌ xeꞌ alocꞌoyobꞌ cora cora tuaꞌ axujchꞌianobꞌ najtir e Israel. Incojt ucꞌabꞌa Baaná y e incojt ucꞌabꞌa Recab. Pues jaxirobꞌ unembꞌirobꞌ tuaꞌ e Rimón xeꞌ chꞌajnarir tuaꞌ e Benjamín y xeꞌ ajlugar tama e chinam Beerot. Pues e chinam Beerot aquetpa tuaꞌ uchꞌajnarir e Benjamín 3 cocha tin e turuanobꞌ ani tama e chinam Beerot locꞌoy ajniobꞌ ixnix, y ixiobꞌ tuaꞌ aturuanobꞌ tama e chinam Guitaim, y yaꞌ yajaꞌ turobꞌ esto coner cocha ajnajtir gentiobꞌ.

4 Pues e Jonatán xeꞌ unembꞌir tuaꞌ e Saúl ayan incojt uyunen xeꞌ ucꞌabꞌa Mefi-bóset, y jaxir cꞌuychem chatertiꞌ uyoc. Pues conda e Mefi-bóset war ucojco cinco año, checsuna tama e lugar Jezreel que chamesnobꞌ e Saúl y e Jonatán tiaꞌ war uchiobꞌ e tzꞌojyir, y tamar era tin e war ucojco e Mefi-bóset locꞌoy ajni, pero tiaꞌ war alocꞌoy ajni tacar, cucrema y e sitz ucꞌocchi chatertiꞌ uyoc.

5 Pues tama inteꞌ día e Recab y e Baaná xeꞌ unembꞌirobꞌ tuaꞌ e Rimón xeꞌ ajlugarobꞌ tama e chinam Beerot, ixiobꞌ esto tama uyotot e Is-bóset tama uyuxin e día, y utajwiobꞌ que war ajiri e Is-bóset tama uchꞌacteꞌ. 6 Y e ixic xeꞌ ucojco e puerta xeꞌ war ani uwajri e trigo jabꞌna umen e waynij ubꞌan, y tamar era e Recab y e Baaná ochoyobꞌ macu tzꞌustaca y mamajchi umen irnobꞌ. 7 Y conda ochoyobꞌ tama e otot, utajwiobꞌ que e Is-bóset chꞌar awayan tama uchꞌacteꞌ. Y tamar era uchamsiobꞌ y ujuxiobꞌ locꞌoy ujor. Y de allí uchꞌamiobꞌ ujor e Is-bóset y locꞌoy ajniobꞌ tama tunor e acbꞌar tama e bꞌir xeꞌ axin esto tama e lugar Arabá xeꞌ aquetpa tuyejtzꞌer e xucur Jordán. 8 Y conda cꞌotoyobꞌ esto tama e chinam Hebrón, uyajcꞌobꞌ ujor e Is-bóset e David y chenobꞌ:

—Tara catares ujor e Is-bóset xeꞌ unembꞌir tuaꞌ e Saúl xeꞌ aqꞌuijna ani uwiret y xeꞌ war ani ubꞌijnu tuaꞌ uchamset. Pero coner Cawinquirar Dios uchix tojmobꞌ e Saúl y uchꞌajnarir tama e mabꞌambꞌanir lo que uchiobꞌ apater, chenobꞌ e Recab y e Baaná.

9 Pero ojron e David y che:

—Pues Cawinquirar Dios xeꞌ ucorpesen tut tunor tin e aqꞌuijna uwirenobꞌ, jax xeꞌ tuaꞌ aquetpa ajchecsuyaj tanibꞌa. 10 Pues ayan inyajr conda yopa incojt winic taniut tama e lugar Siclag xeꞌ uyaren cocha era y che: “E Saúl chamay”, che e winic. Pues jaxir war ubꞌijnu que war uchecsu inteꞌ ojroner xeꞌ imbꞌutz taniut. Pero lo que inche nen, inchuqui inquerejbꞌa y inchamse. Jax era e tuanibꞌir lo que inwajcꞌu umen que yopa uyaren que chamay e Saúl. 11 Y bꞌan tuaꞌ inche tacarox xeꞌ ajmabꞌambꞌanirox, cocha ixiox ichamse inteꞌ winic xeꞌ matucꞌa abꞌeto, y xeꞌ intaca ani chꞌar awayan tama uyotot. Pues coner cꞌani inchiox ixtojma tama uchamer. Cꞌani insatiox inyajrer tujor e rum era, che e David.

12 Entonces e David uyare uyajtzꞌojyirobꞌ tuaꞌ uchamsiobꞌ e winicobꞌ era, y bꞌan uchiobꞌ y ujuxiobꞌ locꞌoy unuc ucꞌabꞌ y unuc uyoc, y uchꞌubꞌobꞌ ucuerpo tuyejtzꞌer e pila xeꞌ war tama e chinam Hebrón. Y de allí uchꞌamiobꞌ ujor e Is-bóset y umuquiobꞌ tama umujr e Abner xeꞌ turu tama e chinam Hebrón.