1 Pues entonces tunor tin e tuobꞌ uchꞌajnarir e Israel ixiobꞌ esto tama e chinam Hebrón tuaꞌ oꞌjronobꞌ taca e David y chenobꞌ: “Pues non interon tacaret 2 porque conda e Saúl ani quetpa rey ticabꞌa, jax net xeꞌ cay abꞌijreson xeꞌ tuon e Israel conda aquetpa tuaꞌ cache e tzꞌojyir. Y jax net xeꞌ arobꞌnet umen Cawinquirar Dios cocha era: ‘Jax net xeꞌ tuaꞌ abꞌijres tunor nichinam Israel y xeꞌ tuaꞌ icꞌotori tujorobꞌ,’ ” chenobꞌ tin e tuobꞌ uchꞌajnarir e Israel.

3 Y tamar era e rey David uche inteꞌ pacto taca e nuquir winicobꞌ tuaꞌ e Israel yajaꞌ taca tiaꞌ turobꞌ tama e chinam Hebrón, y uturbꞌobꞌ Cawinquirar Dios tuaꞌ aquetpa bꞌan cocha inteꞌ ajchecsuyaj tama e pacto lo que uchiobꞌ. Y de allí uchꞌamiobꞌ imbꞌijc e aceite tuaꞌ e teꞌ olivo y uchiobꞌ ungir e David tacar tuaꞌ aquetpa rey tama e país Israel. 4 Pues e David war ucojco treinta año conda cay cꞌotori, y cꞌotori cuarenta año. 5 Pues turuan tama e chinam Hebrón siete año y seis mes conda cꞌotori tama e país Judá, y de allí turuan tama e chinam Jerusalem treinta y tres año conda cꞌotori tama e país Israel y tama e país Judá.

6 Pues entonces e rey David taca uyajtzꞌojyirobꞌ ixiobꞌ esto tama e chinam Jerusalem tuaꞌ uchiobꞌ e tzꞌojyir taca tin e tuobꞌ uchꞌajnarir e Jebús xeꞌ turobꞌ tama e lugar yajaꞌ desde ixnix. Pero tin e tuobꞌ uchꞌajnarir e Jebús cay sactzeniobꞌ upater e David que machi oꞌbꞌna oꞌchoy tama e chinam, y chenobꞌ: “Net ma tiaꞌ tuaꞌ iyochoy tama e chinam era. Pues motor tin e war acojcsanobꞌ machi eꞌronobꞌ y motor que tzꞌej uyocobꞌ, pero machi tuaꞌ uyactetobꞌ iyochoy,” chenobꞌ tin e tuobꞌ uchꞌajnarir e Jebús. 7 Pero e David ochoy ixto tama e chinam motor que xojybꞌir taca e petzbꞌir tun, y turbꞌana ucꞌabꞌa que jax e chinam tuaꞌ e David, y bꞌan arobꞌna esto coner. 8 Pues tama e día yajaꞌ e David uyare uyajtzꞌojyirobꞌ y che: “Pues tin e cꞌani uche e tzꞌojyir upater e chinam tuaꞌ tin e tuobꞌ uchꞌajnarir e Jebús, ucꞌani tuaꞌ oꞌchoyobꞌ tama e tunel tiaꞌ aꞌjni e jaꞌ esto macuir e chinam, y tamar era uchamsicobꞌ tin e machi eꞌronobꞌ y tin e tzꞌej uyocobꞌ. Porque nen inxejbꞌe utobꞌ taca tunor niwalma,” che e David. Pues tamar era locꞌoy inteꞌ aras ojroner xeꞌ che que: “Nien tin e machi eꞌronobꞌ y nien tin e tzꞌej uyocobꞌ machi tuaꞌ oꞌchoy tama e templo tuaꞌ Cawinquirar Dios.” 9 Entonces e David uche uyotot tama e chinam Jerusalem xeꞌ xojybꞌir taca e petzbꞌir tun, y uturbꞌa ucꞌabꞌa que jax e chinam tuaꞌ e David, y cay ujachi e petzbꞌir tun teinxejr tiaꞌ atobꞌoy watar e qꞌuin, y de allí cay ubꞌutꞌi taca e rum tuaꞌ aquetpa cꞌatar ut or e tinaj patir, y ubꞌutꞌi ixin esto tiaꞌ cꞌani uche uyotot e rey.

10 Pues e David war aꞌchꞌi axin tama ucꞌotorer umen que Cawinquirar Dios xeꞌ acꞌotori tujor e sian angelobꞌ lo que ayan tut e qꞌuin turu tacar. 11 Y de allí inteꞌ rey xeꞌ ucꞌabꞌa Hiram, xeꞌ acꞌotori tama e chinam Tiro, uyebꞌta ixin cora ajchecsuyaj tut e David taca cora sian teꞌ xeꞌ ucꞌabꞌa cedro. Y uyebꞌta ixin tin e oꞌbꞌna upajri e teꞌ y tin e oꞌbꞌna upajri e tun tuaꞌ ujachiobꞌ uyotot e David. 12 Y bꞌan cocha era cꞌotoy unata e David que turbꞌana tuaꞌ aquetpa rey tama e país Israel umen Cawinquirar Dios umen que jaxir war uyajta ut uchinam Israel.

13 Pues conda locꞌoy e David tama e chinam Hebrón y ixin turuan tama e chinam Jerusalem, sutpa nujbꞌi taca otro inmojr uwixcarobꞌ. Ayan tin e ijchꞌoctacobꞌ tuaꞌ inteꞌ rey, y ayan tin e cꞌotoy quetpobꞌ uwixcar xeꞌ chujcobꞌ tama inteꞌ tzꞌojyir, y cay uchꞌijrsiobꞌ más tejromtac y más ijchꞌoctac. 14 Y jax era ucꞌabꞌobꞌ uyunenobꞌ e David xeꞌ cuxpobꞌ tama e chinam Jerusalem: Ayan e Samúa y ayan e Sobab y ayan e Natán y ayan e Salomón 15 y ayan e Ibhar y ayan e Elisúa y ayan e Néfeg y ayan e Jafía 16 y ayan e Elisamá y ayan e Eliadá y ayan e Elifélet.

17 Pues conda tin e tuobꞌ uchꞌajnarir e Filisti cꞌotoy unatobꞌ que chena ungir e David tuaꞌ aquetpa rey tama e país Israel, cay umorojse ubꞌobꞌ tuaꞌ uchiobꞌ e tzꞌojyir tacar. Pero wacchetaca cꞌotoy unata e David tucꞌa war ubꞌijnuobꞌ, y tamar era ixin turuan tama inteꞌ chinam xeꞌ macar taca e petzbꞌir tun. 18 Entonces cꞌotoyobꞌ tin e tuobꞌ uchꞌajnarir e Filisti esto tama e valle lo que ayan tama e lugar Refaim xeꞌ aquetpa innajt cora tut e David y turuanobꞌ tamar. 19 Y de allí e David uyubꞌi taca Cawinquirar Dios y che:

—¿Erer ca inche e tzꞌojyir taca tin e tuobꞌ uchꞌajnarir e Filisti coner? ¿Atacren ca tuaꞌ incucruobꞌ? che e David.

Entonces ojron Cawinquirar Dios y che:

—Uyubꞌi ixto, chen e tzꞌojyir tacarobꞌ, porque nen cꞌani inturbꞌobꞌ tama acꞌabꞌ, che Cawinquirar Dios.

20 Entonces e David ixin esto tama e lugar Baal-perasim tiaꞌ turobꞌ e ajtzꞌojyirobꞌ xeꞌ tuobꞌ uchꞌajnarir e Filisti y cꞌapa ucucruobꞌ inyajrer. Y ojron cocha era y che: “Pues bꞌan cocha aꞌjni inteꞌ nuxi jaꞌ, y bꞌan uche Cawinquirar Dios que upasi e bꞌir taniut tuaꞌ uyubꞌien incucru tin e aqꞌuijna uwirenobꞌ,” che e David. Y tamar era uturbꞌa ucꞌabꞌa e lugar yajaꞌ Baal-perasim. 21 Pues locꞌoy ajniobꞌ wacchetaca tin e tuobꞌ uchꞌajnarir e Filisti umen e bꞌajcꞌut y uyactobꞌ uchamen diosobꞌ, y e David taca uyajtzꞌojyirobꞌ cay umorojsiobꞌ e chamen diosobꞌ era tuaꞌ uputobꞌ* Pues tama e ojroner Hebreo machi che que uputobꞌ e chamen diosobꞌ, pero tama e 1 Crónicas 14:12 checsuna que e David uputa tunor e chamen diosobꞌ era..

22 Pero conda numuy cora tiempo sutpa cꞌotoyobꞌ otronyajr tin e tuobꞌ uchꞌajnarir e Filisti y turuanobꞌ tama e valle lo que ayan tama e lugar Refaim. 23 Entonces e David sutpa uyubꞌi otronyajr tuaꞌ Cawinquirar Dios que tucꞌa tuaꞌ uche, y Cawinquirar Dios ojron y che:

—Machi tuaꞌ iꞌxin directo tutobꞌ tuaꞌ ache e tzꞌojyir tacarobꞌ, sino que xojyrunobꞌ este que icꞌotoy tiaꞌ ayan e sian teꞌ xeꞌ ucꞌabꞌa bálsamo, y de allí chen e tzꞌojyir tupatobꞌ. 24 Y conda iꞌxin oybꞌi que ajicna anumuy e icꞌar macuir ucꞌabꞌ e sian teꞌ, entonces quetpen turix tuaꞌ ache e tzꞌojyir, porque jax era e chequerir que nen war inxin bꞌajxan toit tuaꞌ intacre awajtzꞌojyirobꞌ tuaꞌ ucucruobꞌ tin e tuobꞌ uchꞌajnarir e Filisti, che Cawinquirar Dios uyare e David.

25 Entonces e David uche bꞌan taca cocha arobꞌna umen Cawinquirar Dios, y cay ucucru tin e tuobꞌ uchꞌajnarir e Filisti y cay uchamsiobꞌ tama e lugar Gabaón y uyajnes ixiobꞌ esto tama e lugar Guézer.