1 Pues conda e rey David warix aturuan tama uyotot xeꞌ galan y xeꞌ nojta, quetpa chequer que war acojcna umen Cawinquirar Dios tuaꞌ machi achena e tzꞌojyir tacar umen tin e war aqꞌuijnobꞌ tacar. 2 Entonces uyare tuaꞌ apejcna watar e profeta Natán y che:

—Pues net awira que nen turen tama inteꞌ otot xeꞌ galan xeꞌ chembꞌir taca e cedro teꞌ, pero e cofre tuaꞌ Cawinquirar Dios war aquetpa tama inteꞌ otot xeꞌ chembꞌir taca e bꞌujc, che e David.

3 Entonces ojron e profeta Natán y che:

—Chen tunor lo que war abꞌijnu ache, porque Cawinquirar Dios turu tacaret, che e Natán.

4 Pero tamar taca e acbꞌar yajaꞌ Cawinquirar Dios uchectes ubꞌa tut e profeta Natán tama inteꞌ mayjut y che: 5 “Quiqui aren niman David cocha era y che: ‘Majax net xeꞌ tuaꞌ ache inteꞌ templo tiaꞌ tuaꞌ inturuan. 6 Porque ma tiaꞌ inturuan tama inteꞌ templo xeꞌ galan desde conda inlocse nichinam Israel tama e país e Egipto esto coner, sino que inturuan tamar taca inteꞌ otot xeꞌ chembꞌir taca e bꞌujc. 7 Y tama tunor e tiempo conda xanen taca nichinam Israel, ma tiaꞌ cay inware nien inteꞌ ajcꞌotorer tama nichinam Israel tuaꞌ uchiobꞌ inteꞌ templo taca e cedro teꞌ’. 8 Y tamar era aren niman David que nen xeꞌ Uwinquiraren Dios xeꞌ incꞌotori tujor e sian angelobꞌ lo que ayan tut e qꞌuin war inwaret que: ‘Jax nen xeꞌ insicbꞌet tiaꞌ war acojco e sian oveja y inwaret tuaꞌ iquetpa ajcꞌotorer tujor nichinam Israel. 9 Y nen turen tacaret tic taca tiaꞌ iꞌxin, y toit net cꞌapa inchamsiobꞌ tunor tin e aqꞌuijna uwiretobꞌ, y cꞌani inche tuaꞌ aquetpa nojta acꞌabꞌa bꞌan cocha tin e más nuquir winicobꞌ tara tor e rum. 10 Y cꞌani inwajcꞌu nichinam Israel inteꞌ lugar tiaꞌ tuaꞌ aturuanobꞌ tiaꞌ mamajchi umen tuaꞌ achenobꞌ tzajtzaj bꞌan cocha cay unumse ubꞌobꞌ, y e sian país xeꞌ ajmabꞌambꞌanirobꞌ machi tuaꞌ asutpa umanxujresobꞌ 11 bꞌan cocha cay uchiobꞌ desde que nen inturbꞌa cora winicobꞌ tuaꞌ ubꞌijnu uwirobꞌ lo que war uchiobꞌ e gente tuaꞌ acꞌotoriobꞌ tujor nichinam Israel. Y cꞌani inwajqꞌuet e jiriar tut tunor tin e aqꞌuijna uwiretobꞌ. Y cꞌani inchecsu toit ubꞌan que cꞌani alocꞌoy cora reyobꞌ tama achꞌajnarir. 12 Y conda acꞌotoy e día tuaꞌ ichamay, nen cꞌani inche tuaꞌ alocꞌoy incojt tama achꞌajnarir tuaꞌ acꞌotori tujor nichinam Israel. 13 Y jax jaxir xeꞌ tuaꞌ ujachi inteꞌ templo tiaꞌ tuaꞌ atajttzꞌa nicꞌabꞌa, y cꞌani inche tuaꞌ acꞌotori meyra tiempo. 14 Y nen cꞌani inquetpa bꞌan cocha inteꞌ tatabꞌir tuaꞌ, y jaxir tuaꞌ aquetpa bꞌan cocha incojt niunen. Y conda jaxir axin uche inteꞌ mabꞌambꞌanir, nen cꞌani incꞌaye y cꞌani inwatzꞌi bꞌan cocha uche inteꞌ tatabꞌir que uwatzꞌi uyunen conda axin uche lo que machi ani tuaꞌ uche. 15 Pero machi tuaꞌ inwacta tuaꞌ inyajta ut bꞌan cocha inwacta tuaꞌ inyajta ut e Saúl conda inlocse tama uturtar tuaꞌ inturbꞌet net uyeror ut jaxir. 16 Y cꞌani inche que tin e tuobꞌ achꞌajnarir cꞌani acꞌotoriobꞌ taniut ejcꞌar ejcꞌar, y que aturtar cꞌani aquetpa yebꞌar nicojcsiaj ejcꞌar ejcꞌar ubꞌan,’ ” che Cawinquirar Dios uyare e Natán tama umayjut.

17 Entonces e Natán sutpa ixin tut e David tuaꞌ uchecsu tunor era, y uchecsu bꞌan taca cocha arobꞌna umen e Dios tama umayjut. 18 Entonces e rey David ochoy tama e tabernáculo tuaꞌ oꞌjron taca Cawinquirar Dios y che: “Niwinquiraret Dios, ¿Tucꞌa cora nicꞌampibꞌir nen y tucꞌa cora ucꞌampibꞌirobꞌ nifamilia que net ataresen esto tara? 19 Pero tujor tunor era, Niwinquiraret Dios, warto aware que cꞌani achojbꞌes nichꞌajnarir bꞌat e día. O ¿bꞌan ca ache taca tunor e winicobꞌ, Niwinquiraret Dios? 20 Entonces, ¿tucꞌato erer inwaret, Niwinquiraret Dios? Pues net anata tunor lo que imbꞌijnu, nen xeꞌ manen tabꞌa. 21 Y era war achojbꞌesen meyra bꞌan taca cocha cay achecsu taniut que bꞌan tuaꞌ ache, bꞌan taca cocha war acꞌani net. Y awajqꞌuen tuaꞌ innata nen xeꞌ amanen. 22 Niwinquiraret Dios, mamajchi otronteꞌ cocha net xeꞌ nojta ucꞌotorer, sino que net taca. Jax taca canata non cocha bꞌan taca cay coybꞌi. 23 Pues matucꞌa otronteꞌ chinam tara tor e rum xeꞌ bꞌan cocha achinam Israel, y matucꞌa otronteꞌ chinam xeꞌ corpesna amener tuaꞌ acꞌotoy aquetpa tabꞌa. Y net tajttzꞌa meyra acꞌabꞌa umen tin e turobꞌ tara tor e rum conda ache e sian milagro tuaꞌ alocse achinam Israel tama e país Egipto, y de allí cay awajnes locꞌoy meyra nuquir chinamobꞌ xeꞌ uyujtzꞌiobꞌ ut e sian chamen diosobꞌ xeꞌ cꞌani ani uxotiobꞌ ut achinam Israel. 24 Pues net aturbꞌa e país Israel tuaꞌ aquetpa tabꞌa, y net, Cawinquiraret, cꞌotoy quetpet Udiosiretobꞌ inyajrer.

25 “Entonces Niwinquiraret Dios, incꞌajti tacaret tuaꞌ acꞌapa ache bꞌan taca cocha cay awaren que bꞌan tuaꞌ ache tacaren xeꞌ amanen y taca nichꞌajnarir, y incꞌajti ubꞌan que bꞌan taca tuaꞌ aquetpa ejcꞌajr ejcꞌajr. 26 Y tamar era cꞌani atajttzꞌa acꞌabꞌa iraj iraj este que axin oꞌjronobꞌ tunor e gente que: ‘Cawinquirar Dios xeꞌ acꞌotori tujor e sian angelobꞌ lo que ayan tut e qꞌuin jax e Dios tuaꞌ e Israel.’ Y unsre que tin e tuobꞌ nichꞌajnarir axin aqꞌuecꞌo axanobꞌ tama abꞌir iraj iraj. 27 Niwinquiraret Dios xeꞌ icꞌotori tujor e sian angelobꞌ lo que ayan tut e qꞌuin y xeꞌ jax Cadiosir xeꞌ tuon e Israel, motor que nen manen tabꞌa, pero war incꞌajti tacaret cocha era umen que achectes e ojroner era taniut y che: ‘Cꞌani inche abꞌoro meyra achꞌajnarir, y cꞌani alocꞌoyobꞌ meyra reyobꞌ tamar.’ 28 Niwinquiraret Dios, erach tunor awojroner, y galan tunor lo que achecsu taniut xeꞌ amanen. 29 Y coner cꞌani incꞌajti tacaret tuaꞌ achojbꞌes ut tin e turobꞌ taniotot xeꞌ manen tabꞌa, y que jaxirobꞌ axin acojcnobꞌ amener ejcꞌajr ejcꞌajr. Porque bꞌan cay awaren que bꞌan tuaꞌ ache, Niwinquiraret Dios, y conda net awajcꞌu inteꞌ chojbꞌesiaj aman, bꞌan taca tuaꞌ aquetpa ejcꞌajr ejcꞌajr,” che e David.