1 Pues nacpat tunor era e David uchꞌancabꞌes y umanxujres e país Filisti conda ucucru e chinam Gat xeꞌ jax e chinam xeꞌ más nojta tuobꞌ. 2 Y ucucru ubꞌan e país Moab, y uche tuaꞌ achꞌanobꞌ tunor e winicobꞌ tuyejtzꞌer ubꞌobꞌ tut e rum y de allí cay ubꞌisi taca inteꞌ succhij, y tin e aquetpobꞌ tama e chateꞌ bꞌijsibꞌ tama e succhij quetpa tuaꞌ achamesnobꞌ, y tin e aquetpobꞌ tama e uxteꞌ bꞌijsibꞌ machi chamesnobꞌ. Y bꞌan cocha era tin e tuobꞌ e país Moab quetpobꞌ yebꞌar ucꞌotorer e David, y quetpa tuaꞌ utoyobꞌ e impuesto.

3 Pues e David ucucru ubꞌan e Hadad-ézer xeꞌ unembꞌir tuaꞌ e Rehob xeꞌ cꞌotori tama e departamento Sobá tama e país Siria. Y bꞌan numuy conda e Hadad-ézer ixin taca uyajtzꞌojyirobꞌ tuaꞌ ani acꞌotori tama e lugar xeꞌ aquetpa tuyejtzꞌer e xucur Éufrates, pero sutpa cucurna umen e David otronyajr. 4 Y e David uchꞌami 1,700 ajtzꞌojyirobꞌ xeꞌ axiobꞌ tujor e chij tama e tzꞌojyir era, y uchꞌami 20,000 ajtzꞌojyirobꞌ xeꞌ axanobꞌ, y uche tuaꞌ aquetpa tzꞌej uyocobꞌ tunor e sian chijobꞌ xeꞌ war uqꞌuechiobꞌ axin e carruaje tuaꞌ e tzꞌojyir. Ajrer taquix uyacta e chijobꞌ xeꞌ tuaꞌ uqꞌuechiobꞌ axin e 100 carruaje.

5 Pues conda e ajtzꞌojyirobꞌ xeꞌ tuobꞌ e país Siria locꞌoyobꞌ tama e chinam Damasco tuaꞌ axin utacriobꞌ e rey Hadad-ézer, e David cay uche e tzꞌojyir tacarobꞌ este que uchamse 22,000 ajtzꞌojyirobꞌ xeꞌ tuobꞌ e país Siria. 6 Y de allí e David uturbꞌa cora grupo ajtzꞌojyirobꞌ tuyejtzꞌer e chinam Damasco xeꞌ jax e capital tuaꞌ e país Siria, y tamar era tunor tin e tuobꞌ a país Siria quetpobꞌ yebꞌar ucꞌotorer e David y quetpa tuaꞌ utoyobꞌ e impuesto. Y bꞌan cocha era Cawinquirar Dios utacre e ajtzꞌojyirobꞌ tuaꞌ David tuaꞌ ucucruobꞌ tin tin tic taca tiaꞌ ixin tuaꞌ uche e tzꞌojyir.

7 Y de allí e David uchꞌami meyra escudo xeꞌ chembꞌir taca e oro xeꞌ tuobꞌ ani uyajtzꞌojyirobꞌ e Hadad-ézer y uqꞌueche ixin esto tama e chinam Jerusalem. 8 Y uchꞌami ubꞌan meyra bronce lo que ayan tama e chinam Bétah y tama e chinam Berotai xeꞌ quetpobꞌ ani yebꞌar ucꞌotorer e Hadad-ézer.

9 Pues conda e Toi, xeꞌ jax e rey tama e chinam Hamat, cꞌotoy unata que e David cꞌapa ucucru tunor uyajtzꞌojyirobꞌ e Hadad-ézer, 10 uyebꞌta ixin uyunen xeꞌ ucꞌabꞌa Joram tuaꞌ uyare e rey David que galan locꞌoy lo que uche conda ucucru tunor uyajtzꞌojyirobꞌ e Hadad-ézer. Y tamar era cay uyajcꞌu meyra cosa xeꞌ chembꞌir taca e plata y xeꞌ chembꞌir taca e oro y xeꞌ chembꞌir taca e bronce. Pues tzay meyra e Toi cocha cay ani uche e tzꞌojyir ubꞌan taca e Hadad-ézer iraj iraj. 11 Entonces e David ubꞌijnu tuaꞌ uqꞌueche axin tut Cawinquirar Dios tunor lo que uchꞌami tama e tzꞌojyir xeꞌ chembꞌir taca e oro y taca e plata. Pues jax era e chinamobꞌ xeꞌ cucurnobꞌ umen e David: 12 ayan e país Edom, y ayan e país Moab, y ayan e país Amón, y ayan e país Filisti, y ayan tin e tuobꞌ uchꞌajnarir e Amalec, y ayan lo que ulocse tama e tzꞌojyir lo que uche taca e Hadad-ézer, xeꞌ unembꞌir tuaꞌ e Rehob xeꞌ rey tama e chinam Sobá.

13 Pues entonces e David cꞌotoy quetpa más tattzbꞌir umen tunor e gente conda ucucru tin e tuobꞌ e país Edom, conda cꞌapa uchamse 18,000 ajtzꞌojyirobꞌ tama e tzꞌojyir lo que uche tama e valle tiaꞌ aloqꞌuesna e atzꞌam tama e país Edom. 14 Y de allí e David uturbꞌa cora grupo ajtzꞌojyirobꞌ tama tunor or e lugar tama e país Edom, y tunor tin e tuobꞌ e país Edom quetpobꞌ yebꞌar ucꞌotorer e David, cocha jaxir ajcꞌuna ucꞌotorer umen Cawinquirar Dios tuaꞌ ucucru tuqꞌuic tuqꞌuic grupo ajtzꞌojyirobꞌ tic taca tiaꞌ ixin.

15 Pues entonces e David cꞌotori tujor tunor e país Israel, y quetpa incꞌun uwirnar y uche lo que imbꞌutz tut tunor e gente. 16 Y e ajcꞌotorer tuaꞌ e ajtzꞌojyirobꞌ jax e Joab xeꞌ jax uyar e Seruiá, y e Josafat xeꞌ unembꞌir tuaꞌ e Ahilud quetpa secretario tuaꞌ e rey. 17 Y e Sadoc xeꞌ unembꞌir tuaꞌ e Ahitub, y e Ahimélec xeꞌ unembꞌir tuaꞌ e Abiatar quetpobꞌ sacerdotiobꞌ, y e Seraías quetpa tuaꞌ utzꞌijbꞌa tunor lo que numuy. 18 Y e Benaías xeꞌ unembꞌir tuaꞌ e Joiadá quetpa ajbꞌijresiaj tuaꞌ e ajcojcobꞌ tuaꞌ e rey. Y uyunenobꞌ e David quetpobꞌ sacerdotiobꞌ.