1 Pues tama inteꞌ día e David cay uyubꞌi tuaꞌ tin tin xeꞌ turobꞌ tuyejtzꞌer y che: “¿Ayanto ca chi xeꞌ quetpato bꞌixir tama ufamilia e Saúl xeꞌ erer ani inchecsu nicꞌunersiaj tut tuaꞌ incꞌajpes e Jonatán?” che e David.

2 Entonces uyare tuaꞌ apejcna acꞌotoy e Sibá xeꞌ jax ani uman e Saúl. Y conda cꞌotoy tut, e David uyubꞌi tuaꞌ y che:

—¿Jaxet ca e Sibá? che e David. Y che e Sibá:

—Nen, che e Sibá.

3 Entonces e rey David uyubꞌi tuaꞌ y che:

—O ¿ayanto ca chi xeꞌ quetpato bꞌixir tama ufamilia e Saúl tuaꞌ erer inchecsu ucꞌunersiaj e Dios tut? che e David.

Entonces ojron e Sibá y che:

—Ayan. Turuto incojt uyunen e Jonatán xeꞌ tzꞌej chatertiꞌ uyoc, che e Sibá.

4 Y ojron e David y che:

—¿Tiaꞌ turu? che e David.

Y de allí ojron e Sibá y che:

—Turu tama e chinam Lodebar tama uyotot e Maquir xeꞌ unembꞌir tuaꞌ e Amiel, che e Sibá.

5 Entonces e rey David uyare tuaꞌ ataresna tama e chinam Lodebar. 6 Pues ucꞌabꞌa e winic Mefi-bóset y jax uyunen e Jonatán y sitzbꞌir tuaꞌ e Saúl. Entonces conda cꞌotoy tut e rey David cotuan este que utacbꞌu ut ujor tut e rum tuaꞌ umanxujres ubꞌa tut.

Entonces ojron e David y che:

—¿Net ca e Mefi-bóset? che e David.

Entonces ojron e Mefi-bóset y che:

—Nen. Tara turen xeꞌ manen tabꞌa, che e Mefi-bóset.

7 Entonces ojron e David y che:

—Ira ibꞌacta, porque nen cꞌani incojcuet taca meyra cꞌunersiaj umen que inyajta ani ut atata xeꞌ e Jonatán. Y cꞌani inche tuaꞌ asujta tunor e rum tacaret lo que ayan ani tuaꞌ atatanoy Saúl. Pero net tuaꞌ iweꞌ tacaren tor nimesa, che e David.

8 Y de allí e Mefi-bóset sutpa cotuan tut e David otronyajr y che:

—¿Pues tuqꞌuen cora nen que net war aturbꞌa abꞌa tuaꞌ achectes acꞌunersiaj taniut? Pues toit net, bꞌanen taca cocha incojt chamen tzꞌiꞌ, che e Mefi-bóset.

9 Entonces e rey uyare tuaꞌ apejcna e Sibá xeꞌ jax incojt onian ajpatnar tuaꞌ e Saúl y che:

—Pues nen cꞌani inwajcꞌu usitz apatron xeꞌ jax e Mefi-bóset tunor lo que tuaꞌ ani e Saúl y ufamilia. 10 Y tamar era net y oynenobꞌ y amanobꞌ ucꞌani tuaꞌ ixpatna tama urum e Mefi-bóset tuaꞌ imorojse tunor e cosecha lo que alocꞌoy tamar, y bꞌan cocha era erer awiobꞌ ufamilia. Pero e Mefi-bóset aquetpa tuaꞌ aweꞌ tacaren tor nimesa, che e David.

Pues e Sibá ayan quince uyunenobꞌ y veinte umanobꞌ. 11 Entonces uyare e rey cocha era y che:

—Turenix tuaꞌ inche bꞌan taca cocha war awaren, niwinquiret, che e Sibá.

Y tamar era e Mefi-bóset cay weꞌ tor umesa e rey iraj iraj, bꞌan ani cocha jay jax inteꞌ uyunen. 12 Y e Mefi-bóset ayan incojt uyunen xeꞌ chuchuto xeꞌ ucꞌabꞌa Micaías, y entonces tamar taca e día yajaꞌ tunor tin e turobꞌ tama uyotot e Sibá quetpa manobꞌ tuaꞌ e Mefi-bóset. 13 Y e Mefi-bóset xeꞌ tzꞌej chatertiꞌ uyoc, cay turuan tama e chinam Jerusalem, y cay weꞌ tor umesa e rey David iraj iraj.