1 Pues conda numuy cora tiempo, e Nahas xeꞌ jax e rey tuaꞌ e país Amón chamay, y cay cꞌotori uyeror ut uyunen Hanún. 2 Entonces e David cay ubꞌijnu que cꞌani uchectes ucꞌunersiaj tut e Hanún xeꞌ jax uyunen e Nahas xeꞌ intocto chamay, cocha bꞌan cay chena tacar umen e Nahas. Y tamar era e David uyebꞌta ixin cora uyajcꞌamparobꞌ tuaꞌ uchecsuobꞌ tut e Hanún que war atzꞌintzꞌa tamar uchamer utata. Pero conda uyajcꞌamparobꞌ e David cꞌotoyobꞌ esto tama e país Amón, 3 e ajbꞌijresiajobꞌ tuaꞌ uyajtzꞌojyirobꞌ e país Amón cay ojronobꞌ taca e Hanún xeꞌ jax e rey y chenobꞌ: “Pues non war cabꞌijnu que e David machi war taca uyebꞌta watar uyajcꞌamparobꞌ era tuaꞌ ucꞌunietobꞌ tama uchamer atata. Bꞌijnun awira, que jaxir war uyebꞌta watar uyajcꞌamparobꞌ tuaꞌ uwirobꞌ cocha turu e chinam, y de allí cꞌani uyebꞌta watar uyajtzꞌojyirobꞌ tuaꞌ ucucruobꞌ e chinam,” chenobꞌ e ajbꞌijresiajobꞌ tuaꞌ uyajtzꞌojyirobꞌ e Hanún.

4 Entonces e Hanún uyare tuaꞌ achujca uyajcꞌamparobꞌ e David, y uyare tuaꞌ asujsa inxejr utzuctiobꞌ tama ucajram y uyare tuaꞌ awejrna e bata lo que lapar umenerobꞌ este que quetpa pispis ucaderobꞌ. Y de allí utzacre locꞌoyobꞌ taca e subꞌar. 5 Y conda e David cꞌotoy unata tunor lo que numuy taca uyajcꞌamparobꞌ, uyare tuaꞌ axin cora ajchecsuyajobꞌ tuaꞌ uyareobꞌ tuaꞌ aquetpobꞌ tama e chinam Jericó este que aꞌchꞌi utzuctiobꞌ otronyajr cocha war asubꞌajrobꞌ, y de allí erer asutpobꞌ esto tama e chinam Jerusalem.

6 Pues conda tin e tuobꞌ e país Amón cꞌotoy unatobꞌ que qꞌuijna meyra e David, entonces cay usicbꞌobꞌ chi xeꞌ erer uchiobꞌ e tzꞌojyir upater e David. Y tamar era utoyobꞌ 20,000 ajtzꞌojyirobꞌ xeꞌ ajlugarobꞌ tama e país Siria xeꞌ turobꞌ tama e chinam Bet-rehob y tama e chinam Sobá, y utoyobꞌ ubꞌan 1,000 ajtzꞌojyirobꞌ xeꞌ tuobꞌ e rey Maacá y utoyobꞌ 12,000 ajtzꞌojyirobꞌ xeꞌ tuobꞌ e chinam Is-tob. 7 Pero conda e David cꞌotoy unata tama tunor era, uyebꞌta ixin e Joab taca tunor e ajtzꞌojyirobꞌ tuaꞌ e Israel tuaꞌ uchiobꞌ e tzꞌojyir tacarobꞌ. 8 Pues tin e tuobꞌ e país Amón locꞌoyobꞌ turuanobꞌ tuaꞌ uchiobꞌ e tzꞌojyir tama uyocher e chinam, y tunor e inmojr ajtzꞌojyirobꞌ xeꞌ ajlugarobꞌ tama e país Siria xeꞌ tuobꞌ e chinam Sobá y xeꞌ tuob e chinam Rehob y xeꞌ tuobꞌ e chinam Is-tob y xeꞌ tuobꞌ e rey Maacá locꞌoyobꞌ najtir e chinam. 9 Y conda e Joab uwira que xojyna umen e sian ajtzꞌojyirobꞌ tuaꞌ achena e tzꞌojyir tacarobꞌ, entonces usicbꞌa e ajtzꞌojyirobꞌ tujamobꞌ tin e tuobꞌ e Israel xeꞌ más oꞌbꞌna uchiobꞌ e tzꞌojyir, y cay uyustes ubꞌobꞌ tuaꞌ uchiobꞌ e tzꞌojyir taca tin e ajlugarobꞌ tama e país Siria. 10 Y uturbꞌa e inmojr ajtzꞌojyirobꞌ tuaꞌ e Israel yebꞌar ucꞌotorer uwijtzꞌin xeꞌ jax e Abisai, tuaꞌ uchiobꞌ e tzꞌojyir taca e ajtzꞌojyirobꞌ xeꞌ tuobꞌ e país Amón. 11 Y e Joab uyare e Abisai cocha era y che: “Pues jay awira que tin e ajtzꞌojyirobꞌ tuaꞌ e país Siria más oꞌbꞌna uchiobꞌ e tzꞌojyir que nen, entonces net ucꞌani tuaꞌ watet atacren. Y jay inwira que e ajtzꞌojyirobꞌ xeꞌ tuobꞌ e país Amón más oꞌbꞌna uchiobꞌ e tzꞌojyir que net, entonces nen ucꞌani tuaꞌ inxin intacret. 12 Pero ira ibꞌacta. Cachic e tzꞌojyir taca tunor caqꞌuecꞌojsiaj tuaꞌ cacorpes cachinam Israel y tin e tuobꞌ uchinam Cadiosir. Pues que Cawinquirar Dios utacricon tuaꞌ cache bꞌan taca cocha ucꞌani jaxir,” che e Joab uyare e Abisai.

13 Pues conda e Joab cꞌotoy tuaꞌ uche e tzꞌojyir taca e ajtzꞌojyirobꞌ xeꞌ tuobꞌ e país Siria, jaxirobꞌ locꞌoy ajniobꞌ. 14 Y conda e ajtzꞌojyirobꞌ xeꞌ tuobꞌ e país Amón uwirobꞌ que locꞌoy ajniobꞌ e ajtzꞌojyirobꞌ xeꞌ tuobꞌ e país Siria, jaxirobꞌ locꞌoy ajniobꞌ ubꞌan tut e Abisai, y ochoyobꞌ tama e chinam. Entonces conda cꞌapa uche e tzꞌojyir, e Joab locꞌoy tama e país Amón y sutpa ixin esto tama e chinam Jerusalem.

15 Pues conda e ajtzꞌojyirobꞌ xeꞌ tuobꞌ e país Siria cꞌotoy unatobꞌ que chꞌancabꞌesnobꞌ umen e ajtzꞌojyirobꞌ tuaꞌ e Israel, sutpa umorojse ubꞌobꞌ otronyajr. 16 Entonces e rey xeꞌ tuaꞌ e país Siria xeꞌ ucꞌabꞌa Hadad-ézer uyare tuaꞌ apejcna otro inmojr ajtzꞌojyirobꞌ xeꞌ turobꞌ teinxejr bꞌana e xucur Éufrates tuaꞌ acꞌotoyobꞌ esto tama e chinam Helam. Pues tunor uyajtzꞌojyirobꞌ e Hadad-ézer era quetpobꞌ yebꞌar e Sobac xeꞌ jax e ajbꞌijresiaj tuobꞌ. 17 Pero conda e David cꞌotoy unata tama tunor era, umorojse tunor e ajtzꞌojyirobꞌ tuaꞌ e Israel y uyare tuaꞌ anumuyobꞌ teinxejr e xucur Jordán y tuaꞌ acꞌotoyobꞌ esto tama e chinam Helam. Y yajaꞌ taca utajwi ubꞌobꞌ taca e ajtzꞌojyirobꞌ xeꞌ tuobꞌ e país Siria y cay uchiobꞌ e tzꞌojyir. 18 Pero wacchetaca e ajtzꞌojyirobꞌ xeꞌ tuobꞌ e país Siria locꞌoy ajniobꞌ otronyajr tut e ajtzꞌojyirobꞌ tuaꞌ e Israel. Y tama e día era uyajtzꞌojyirobꞌ e David uchamsiobꞌ 40,000 ajtzꞌojyirobꞌ y 700 ajtzꞌojyirobꞌ xeꞌ ayan ucarruaje tuaꞌ e tzꞌojyir, y uchamsiobꞌ ubꞌan e Sobac xeꞌ jax e ajbꞌijresiaj tuaꞌ e ajtzꞌojyirobꞌ xeꞌ tuobꞌ e país Siria. 19 Y conda e reyobꞌ xeꞌ atzay uwira ubꞌobꞌ taca e rey Hadad-ézer uwirobꞌ que cucurnobꞌ tunor uyajtzꞌojyirobꞌ umen e ajtzꞌojyirobꞌ tuaꞌ e Israel, cay uchiobꞌ e cꞌumpar taca e país Israel y cꞌotoy quetpobꞌ man tuaꞌ e David. Y tamar era tin e tuobꞌ e país Siria machix sutpa utacriobꞌ e país Amón cocha war ubꞌacriobꞌ e David.