1 Pues tama ucajyesnibꞌir e año, xeꞌ jax e tiempo conda e reyobꞌ alocꞌoyobꞌ tuaꞌ uchiobꞌ e tzꞌojyir, e David ubꞌijnu tuaꞌ uyebꞌta axin e Joab y e ajtzꞌojyirobꞌ tuaꞌ e Israel tuaꞌ uchiobꞌ e tzꞌojyir taca e país Amón. Y ixin ucucruobꞌ tunor e ajtzꞌojyirobꞌ tuaꞌ e país Amón, y uxojyruobꞌ e chinam Rabá. Pero e David quetpa tama e chinam Jerusalem.

2 Pues tama inteꞌ día, e David achpa nacpat que jiri tama uyuxin e día, y tꞌabꞌay xana tama ujor e otot, y cay chꞌujsan tama tunor e chinam, conda uwira que ayan inteꞌ ixic ejmar xeꞌ galan uwirnar xeꞌ war atiꞌ. 3 Y de allí e David uyare incojt uman tuaꞌ axin uyubꞌi que chi e ixic era. Y arobꞌna que e ixic ucꞌabꞌa Betsabé, y que ijchꞌoc tuaꞌ e Eliam, y que ixcarbꞌir tuaꞌ e Urías xeꞌ chꞌajnarir tuaꞌ e Het. 4 Y entonces e David uyare incojt uman tuaꞌ axin utares e ixic, y conda qꞌuejcha cꞌotoy tama uyotot, jaxir chꞌan tacar. (Pues e Betsabé wartocto ani atzꞌacpa tama ucꞌuxnac xeꞌ ajcꞌuna tama umes).

5 Pues conda numuy cora semana e ixic cꞌotoy unata que quetpa wawan taca uyar, y tamar era uyebꞌta ixin inteꞌ ojroner tut e David que jaxir war ucojco uyar. 6 Entonces e David uyebꞌta ixin inteꞌ ojroner tut e Joab tuaꞌ uyebꞌta watar e Urías esto tut jaxir, y bꞌan uche e Joab. 7 Y conda e Urías cꞌotoy, e David uyubꞌi tuaꞌ que cocha turobꞌ e Joab y e ajtzꞌojyirobꞌ, y cocha war axin e tzꞌojyir. 8 Y de allí uyare tuaꞌ axin tama uyotot tuaꞌ ajiri. Y conda intocto locꞌoy e Urías tama uyotot e rey, e David uyebꞌta ixin cora comida xeꞌ más atujri cocha inteꞌ regalo. 9 Pero e Urías machi ixin tama uyotot, sino que quetpa wayan taca e ajtzꞌojyirobꞌ xeꞌ ucojcobꞌ e puerta tama uyotot e rey. 10 Pero conda e David cꞌotoy unata que e Urías machi ixin tama uyotot, uyare tuaꞌ apejcna y uyubꞌi tuaꞌ y che:

—¿Tucꞌa tuaꞌ que machi ixiet jiriet tama oꞌtot, cocha meyra xambꞌar ache? che e David.

11 Entonces ojron e Urías y che:

—Pues e cofre tiaꞌ aquetpa e pacto tuaꞌ Cawinquirar Dios war aquetpa tama e tabernáculo xeꞌ chena taca e bꞌujc, y e Joab xeꞌ ajcꞌotorer tanibꞌa war awayan yebꞌar inteꞌ otot xeꞌ chembꞌir taca e bꞌujc, y e ajtzꞌojyirobꞌ xeꞌ tuobꞌ e Israel y xeꞌ tuobꞌ e Judá war awayanobꞌ tama inteꞌ choquem lugar. Y tamar era ma cocha erer inxin taniotot tuaꞌ inweꞌ y tuaꞌ unchꞌi lo que ayan y tuaꞌ inwayan taca niwixcar. Pues bꞌan taca cocha turet net, niwinquiret, nen ma tiaꞌ tuaꞌ inche cocha era, che e Urías.

12 Entonces ojron e David y che:

—Pues quetpento coner, y ejcꞌajr erer isutpa iꞌxin esto tiaꞌ turobꞌ e inmojr ajtzꞌojyirobꞌ, che e David.

Y bꞌan cocha era e Urías quetpato tama e chinam Jerusalem otronteꞌ día. 13 Y de allí e David uyare tuaꞌ acꞌotoy tama uyotot tuaꞌ aweꞌ y tuaꞌ oychꞌi tacar, y bꞌan cocha era ucarse inyajrer. Pero e Urías machi ixin esto tama uyotot tuaꞌ awayan taca uwixcar, sino que quetpa wayan tiaꞌ turobꞌ e ajtzꞌojyirobꞌ xeꞌ war ucojcobꞌ e puerta tama uyotot e rey.

14 Entonces conda sacojpa tama otronteꞌ día, e David cay utzꞌijbꞌa inteꞌ carta tuaꞌ uyebꞌta axin taca e Urías esto tut e Joab. 15 Y tama e carta era e David utzꞌijbꞌa cocha era y che: “Wabꞌunic e Urías tama e bꞌajxan fila tiaꞌ más imbꞌacꞌajr e tzꞌojyir, y de allí actanic ubꞌajner tuaꞌ ayobꞌorna este que achamay,” che e David tama e carta.

16 Entonces e Joab uyare e Urías tuaꞌ awawan tuyejtzꞌer e petzbꞌir tun tiaꞌ más uchiobꞌ e tzꞌojyir tin e aqꞌuijnobꞌ. 17 Y conda e ajtzꞌojyirobꞌ xeꞌ war aqꞌuijnobꞌ locꞌoyobꞌ tama e chinam tuaꞌ uchiobꞌ e tzꞌojyir taca e ajtzꞌojyirobꞌ tuaꞌ e Joab, yaꞌ yajaꞌ chamay e Urías taca chacojt ajtzꞌojyirobꞌ xeꞌ tuobꞌ e Israel.

18 Entonces e Joab uyebꞌta ixin inteꞌ checsuyaj tut e David tuaꞌ uyare cocha numuy e tzꞌojyir. 19 Y uyare e ajchecsuyaj cocha era y che: “Checsun tut e rey tunor lo que numuy tama e tzꞌojyir. 20 Pero bꞌajcꞌat e rey axin aqꞌuijna y uyubꞌi tabꞌa cocha era: ‘¿Tucꞌa tuaꞌ que ixiox tuyejtzꞌer e chinam tuaꞌ iche e tzꞌojyir? O ¿machi ca inata que jaxirobꞌ erer ajuronobꞌ desde tama or e petzbꞌir tun? 21 Cꞌajric imener lo que numuy tama e lugar Tebés conda e Abimelec chamesna umen inteꞌ ixic xeꞌ unembꞌir tuaꞌ e Jerubaal, conda jujra inteꞌ ucꞌabꞌ chaꞌ tama ujor desde tama or e petzbꞌir tun. ¿Tucꞌa tuaꞌ que ixiox tuyejtzꞌer e petzbꞌir tun?’ xeꞌ axin uyaret e rey. Entonces net tuaꞌ aware cocha era: ‘Chamay ubꞌan e Urías xeꞌ jax inteꞌ man tabꞌa,’ tuaꞌ aware,” che e Joab.

22 Entonces e ajchecsuyaj ixin esto tama e chinam Jerusalem y uchecsu tut e David tunor lo que arobꞌna umen e Joab.

23 Y uyare e David cocha era y che:

—Pues tin e aqꞌuijnobꞌ tacaron locꞌoyobꞌ najtir e chinam tuaꞌ uchiobꞌ e tzꞌojyir, pero non cawajnes ixiobꞌ esto tama uyocher e chinam tuaꞌ cacucruobꞌ. 24 Y entonces tin e turobꞌ tama or e petzbꞌir tun cay urionobꞌ taca uchꞌantꞌinobꞌ, y uchamsiobꞌ chacojt ajtzꞌojyirobꞌ, y chamesna e Urías ubꞌan, che e ajchecsuyaj.

25 Entonces e David uyare e ajchecsuyaj cocha era y che:

—Aren e Joab tuaꞌ machi ubꞌijnu meyra tamar lo que numuy, porque bꞌan anumuy tama e tzꞌojyir. Pero aren que uchic más e tzꞌojyir taca e chinam este que acꞌapa usati inyajrer, che e David.

26 Pues conda uwixcar e Urías cꞌotoy unata que chamay unoxibꞌ, ulapi ubꞌujc xeꞌ jarbꞌir taca e succhij cocha inteꞌ chequerir tama e tzꞌintzꞌar. 27 Y conda numuy e tiempo tama e tzꞌintzꞌar bꞌan cocha e costumbre tama e Israel* “E tiempo tama e tzꞌintzꞌar”. Pues e costumbre tama e tzꞌintzꞌar tama e Israel conda ayan chi achamay tama ufamilia aquetpa siete día., e David uyare tuaꞌ ataresna e Betzabe esto tama uyotot, y cꞌotoy quetpa inteꞌ tujam uwixcarobꞌ, y jaxir qꞌuechuan incojt uyar. Pero Cawinquirar Dios machi tzay uwira lo que uche e David.