1 Pues ayan inteꞌ winic xeꞌ uputputir ut xeꞌ ucꞌabꞌa Sebá xeꞌ tuaꞌ uchꞌajnarir e Benjamín y xeꞌ unembꞌir tuaꞌ e Bicrí xeꞌ ajlugar Guilgal. Pues jaxir achpa y uyajques e trompeta y che: “Non matucꞌa e tuanibꞌir y nien inteꞌ herencia tuaꞌ cachꞌami tuaꞌ e David xeꞌ unembꞌir tuaꞌ e Jesé. Entonces tunorox xeꞌ tuox e Israel quiquic tama iyotot,” che e Sebá.

2 Entonces tunor e ajtzꞌojyirobꞌ xeꞌ tuobꞌ e Israel uyactobꞌ e David y ixiobꞌ tupat e Sebá xeꞌ unembꞌir tuaꞌ e Bicrí. Pero tin e tuobꞌ uchꞌajnarir e Judá quetpobꞌ taca e rey y numuyobꞌ tacar tama e xucur Jordán y ixiobꞌ tacar este que cꞌotoyobꞌ tama e chinam Jerusalem, y war atzay tuaꞌ oꞌbꞌianobꞌ tut.

3 Y conda e David cꞌotoy tama uyotot tama e chinam Jerusalem, upejca e diez uwixcarobꞌ xeꞌ uyacta tuaꞌ ucojcobꞌ uyotot, y uqꞌueche ixin tama ingojr otot tiaꞌ tuaꞌ acojcnobꞌ. Y yaꞌ yajaꞌ cay uyajcꞌu tunor lo que tuaꞌ ucꞌuxiobꞌ, pero machi ixto sutpa uchꞌami ubꞌa tacarobꞌ. Y bꞌan cocha era jaxirobꞌ quetpobꞌ macarobꞌ inyajrer, bꞌan ani cocha e ixictac xeꞌ chamen uviejobꞌ, y bꞌan taca quetpobꞌ este que cꞌotoy e día tuaꞌ achamayobꞌ.

4 Entonces e rey uyare e Amasá y che:

—Pejcanobꞌ e ajtzꞌojyirobꞌ xeꞌ chꞌajnarir tuaꞌ e Judá, y conda atzꞌacta uxteꞌ día incꞌani tuaꞌ iyopa tara tacarobꞌ, che e David.

5 Entonces e Amasá ixin tuaꞌ umorojse tunor e ajtzꞌojyirobꞌ, pero numuy más día que lo que arobꞌna tuaꞌ asutpa acꞌotoy tut e rey. 6 Entonces e David upejca e Abisai tuaꞌ acꞌotoy tut y che:

—Pues e Sebá axin uchion canumse cabꞌa más nojta que e Absalón. Entonces morojsen niwajtzꞌojyirobꞌ xeꞌ turobꞌ tacaren y quiqui sicbꞌan bꞌajxan que axin oꞌchoy tama inteꞌ chinam xeꞌ xojybꞌir taca e petzbꞌir tun tiaꞌ machi ani catajwi, che e David.

7 Entonces e Abisai y e Joab locꞌoyobꞌ tama e chinam Jerusalem taca e ajtzꞌojyirobꞌ xeꞌ tuobꞌ e rey y e inmojr ajtzꞌojyirobꞌ xeꞌ turobꞌto tama e chinam Jerusalem y ixiobꞌ tuaꞌ usicbꞌobꞌ e Sebá. 8 Y conda cꞌotoyobꞌ tuyejtzꞌer e nuxi tun xeꞌ turu tama e lugar Gabaón, locꞌoy tajwinobꞌ umen e Amasá taca e ajtzꞌojyirobꞌ lo que umorojse. Pues e Joab lapar umener ubꞌujc xeꞌ acay uche e tzꞌojyir tacar y ayan inteꞌ cinturón cachar tama unac taca inteꞌ machit xeꞌ tzꞌapar tamar taca upat, y conda cꞌotoy tuyejtzꞌer e Amasá ulocse umachit tzꞌustaca tama upat y uyacta oꞌjri tut e rum. 9 Entonces e Joab ixin uchuqui e Amasá tama utzuctiꞌ taca unojcꞌabꞌ tuaꞌ ani utzꞌujtzꞌi ucajram, y uyubꞌi tuaꞌ y che:

—¿Cocha turet hermano? che e Joab.

10 Pero e Amasá machi uwira que ayan e machit tama utzꞌejcꞌabꞌ e Joab. Y wacchetaca e Joab utzꞌajbꞌu e machit tama unac e Amasá, y tunor usojyom poccha cꞌaxi tama ut e rum. Pues e Joab machi quetpa tuaꞌ utzꞌajbꞌu chajr e machit tama unac e Amasá porque chamay wacchetaca. Entonces e Joab y e Abisai uyactobꞌ chꞌar e Amasá yaꞌ taca tiaꞌ uchamsiobꞌ, y de allí ixiobꞌ tuaꞌ usicbꞌobꞌ e Sebá. 11 Entonces incojt ajtzꞌojyir tuaꞌ e Joab upejca e ajtzꞌojyirobꞌ xeꞌ tuobꞌ e Amasá ani y che:

—Pues tin e atzay uwira e Joab y e David, chic tupat e Joab, che e ajtzꞌojyir era.

12 Pero conda e ajtzꞌojyir uwira que ucuerpo e Amasá chꞌar tuyuxin e bꞌir tujor uchꞌichꞌer, y que tunor e winicobꞌ aquetpa awawanobꞌ tuaꞌ uwirobꞌ, entonces jaxir uquisu uchꞌabꞌu ucuerpo e Amasá tama uyejtzꞌer e bꞌir y umaqui taca inteꞌ bꞌujc. 13 Y conda cꞌapa uquisu uchꞌabꞌu ucuerpo e Amasá tama uyejtzꞌer e bꞌir, numuyobꞌ tunor e ajtzꞌojyirobꞌ tuaꞌ axiobꞌ taca e Joab tuaꞌ usicbꞌobꞌ e Sebá xeꞌ unembꞌir tuaꞌ e Bicrí.

14 Pero e Sebá numuy tama tunor or e lugar Israel tuaꞌ umorojse tin e cꞌani utacre uche e tzꞌojyir upater e David, y cꞌotoy esto tama e chinam Abel-bet-maacá. Y tunor uyunenobꞌ e Bicrí umorojse ubꞌobꞌ tacar ubꞌan, y ochoyobꞌ taca e Sebá tama e chinam. 15 Y conda e Joab y uyajtzꞌojyirobꞌ cꞌotoyobꞌ esto tama e chinam Abel-bet-maacá, cay uchiobꞌ e tzꞌojyir. Y ujachiobꞌ inteꞌ nuxi rampa tuyejtzꞌer e petzbꞌir tun tuaꞌ uchiobꞌ e tzꞌojyir taca tin e turobꞌ tama e chinam yajaꞌ, y cay ujinchobꞌ e petzbꞌir tun tama e chinam. 16 Entonces incojt ixic xeꞌ más ayan ubꞌijnusiaj upejca e Joab taca inteꞌ nuxi nuc tiaꞌ war tujor e petzbꞌir tun lo que ayan tuyejtzꞌer e chinam y che:

—Joab ooo, ubꞌin lo que cꞌani inwaret. Quisinic watet taniwejtzꞌer porque cꞌani onjron tacaret, che e ixic.

17 Entonces e Joab ixin tuyejtzꞌer e ixic. Y conda cꞌotoy, e ixic uyubꞌi tuaꞌ y che:

—¿Jaxet ca e Joab? che e ixic.

—Bꞌan yaꞌ, che e Joab.

Entonces ojron e ixic y che:

—Ubꞌin lo que cꞌani inwaret era, che e ixic.

—Arenen, che e Joab.

18 Entonces e ixic ojron y che:

—Pues tama e onian tiempo ayan inteꞌ ojroner xeꞌ che que: “Tin e cꞌani unata lo que tuaꞌ uche, ucꞌani tuaꞌ axin uyubꞌi taca tin e aturuanobꞌ tama e chinam Abel.” 19 Pues cachinam era jax inteꞌ chinam xeꞌ ayan e jiriar tamar y xeꞌ nojta ucꞌampibꞌir tama e país Israel, pero net war aturbꞌa abꞌa tuaꞌ atijres cachinam. ¿Tucꞌa tuaꞌ que cꞌani atijres cachinam xeꞌ jax inteꞌ herencia tuaꞌ Cawinquirar Dios? che e ixic.

20 Entonces ojron e Joab y che:

—Pues ma cocha erer imbꞌijnu tuaꞌ intijres achinam, porque majax bꞌan cꞌani inche, 21 sino que war taca imbꞌijnu tuaꞌ insicbꞌa inteꞌ winic xeꞌ ucꞌabꞌa Sebá xeꞌ unembꞌir tuaꞌ e Bicrí xeꞌ turu tama or inteꞌ witzir tama departamento Efraín, cocha jaxir war ubꞌijnu tuaꞌ uchamse e rey David. Pero jay net aturbꞌa tama nicꞌabꞌ e winic era, machi ixto tuaꞌ cache e tzꞌojyir taca achinam era, che e Joab.

Entonces ojron e ixic y che:

—Imbꞌutz lo que war awaren era. Pues erix cꞌani cajuxi ujor e Sebá y cꞌani cajuri watar tama or e petzbꞌir tun, che e ixic uyare e Joab.

22 Entonces e ixic ixin wacchetaca tuaꞌ oꞌjron taca tunor tin e turobꞌ tama e chinam y ucꞌampes e natanyaj tuaꞌ uchꞌabꞌu uyalmobꞌ, y tamar era ixiobꞌ ujuxiobꞌ locꞌoy ujor e Sebá y ujuriobꞌ tut e Joab. Entonces e Joab uyajques e trompeta tuaꞌ upejca e ajtzꞌojyirobꞌ tuaꞌ uyactobꞌ e tzꞌojyir. Entonces sutpobꞌ tama uyototobꞌ, y e Joab sutpa ixin esto tama e chinam Jerusalem tuaꞌ uchecsu tunor era taca e rey David.

23 Pues entonces e Joab quetpa ajbꞌijresiaj tuaꞌ tunor e ajtzꞌojyirobꞌ tuaꞌ e Israel, y e Benaías xeꞌ unembꞌir tuaꞌ e Joiadá quetpa ajbꞌijresiaj tuaꞌ e ajtzꞌojyirobꞌ xeꞌ ucojcobꞌ e rey. 24 Y e Adoram quetpa tuaꞌ uwira conda ayan inteꞌ patnar xeꞌ obligatorio tuaꞌ achempa, y e Josafat xeꞌ unembꞌir tuaꞌ e Ahilud quetpa secretario tuaꞌ e rey. 25 Y e Sevá quetpa tuaꞌ utzꞌijbꞌa tunor lo que anumuy, y e Sadoc y e Abiatar quetpobꞌ sacerdotiobꞌ. 26 Y e Irá xeꞌ ajlugar tama e chinam tiaꞌ tari e Jaír, quetpa sacerdote tuaꞌ e David.