1 Pues conda e David war acꞌotori, checta inteꞌ nuxi winar que numuy uxteꞌ año. Entonces e David cay uyubꞌi taca Cawinquirar Dios tuaꞌ unata que tucꞌa tuaꞌ que war anumuy tunor era. Y Cawinquirar Dios ojron y che: “Pues e nuxi winar lo que war anumuy era, checta umen que e Saúl taca tunor ufamilia cay uchamsiobꞌ meyra tin e tuobꞌ uchꞌajnarir e Gabaón,” che Cawinquirar Dios.

2 Entonces e rey David upejca tin e tuobꞌ uchꞌajnarir e Gabaón tuaꞌ oꞌjron tacarobꞌ. (Pues tin e tuobꞌ uchꞌajnarir e Gabaón majax tuobꞌ e Israel, sino que jax inteꞌ grupo xeꞌ quetpato tuaꞌ uchꞌajnarir e Emor xeꞌ cay uchiobꞌ inteꞌ pacto taca tin e tuobꞌ e Israel ixnix e tiempo.* Pues tama e onian tiempo conda intocto ochoyobꞌ tin e tuobꞌ e Israel tama e lugar Canaán, checta cora winicobꞌ xeꞌ chꞌajnarirobꞌ tuaꞌ e Gabaón xeꞌ uchiobꞌ inteꞌ pacto tacarobꞌ que machi tuaꞌ uchiobꞌ e tzꞌojyir tacarobꞌ. Pero conda e Saúl cꞌotoy quetpa rey, ucꞌocchi e pacto era y uchamse meyra tin e tuobꞌ e Gabaón, y tamar era cꞌaxi inteꞌ jatzꞌuar tama tunor e Israel. Iranic tama e Josué 9:14-24.) Pero cocha e rey Saúl ayan meyra utzunir tama e Israel y e Judá, cay uturbꞌa ubꞌa tuaꞌ ani uchamsiobꞌ tunor. 3 Entonces e David uyubꞌi tuobꞌ y che:

—¿Ayan ca lo que erer inche tuaꞌ insisijresox tama e qꞌuijnar? ¿Tucꞌa erer inche tuaꞌ unstes e mabꞌambꞌanir lo que chena tacarox tuaꞌ asutpa ichojbꞌeson xeꞌ tuon Cawinquirar Dios? che e David.

4 Entonces ojronobꞌ tin e tuobꞌ uchꞌajnarir e Gabaón y chenobꞌ:

—Pues e tumin machi uyubꞌi uyustes e problema lo que ayan taca ufamilia e Saúl, y nien uchamer incojt winic tama uchꞌajnarir e Israel, chenobꞌ tin e tuobꞌ uchꞌajnarir e Gabaón.

Entonces ojron e David y che: —Areniquen tucꞌa icꞌani tuaꞌ inche, y nen cꞌani inche, che e David.

5 Entonces ojronobꞌ tin e tuobꞌ uchꞌajnarir e Gabaón y chenobꞌ:

—Pues jax e Saúl xeꞌ cay ani ubꞌijnu tuaꞌ acꞌapa uchamsion inteꞌ intion tuaꞌ mamajchi aquetpa tama e país Israel. 6 Entonces lo que war cacꞌani tuaꞌ ache jax era: cacꞌani tuaꞌ awajcꞌon siete uyunenobꞌ e Saúl, xeꞌ sicbꞌabꞌir umen Cawinquirar Dios, tuaꞌ cachꞌubꞌobꞌ tut Cawinquirar Dios tama e chinam Guibeá, chenobꞌ tin e tuobꞌ uchꞌajnarir e Gabaón.

Entonces ojron e rey y che: —Bueno pue, cꞌani inche lo que war icꞌani, che e David. 7 Pero quetpa que e David ucꞌani tuaꞌ ucorpes ucuxtar e Mefi-bóset xeꞌ unembꞌir tuaꞌ e Jonatán y sitzbꞌir tuaꞌ e Saúl cocha uche inteꞌ pacto taca e Jonatán tut Cawinquirar Dios tuaꞌ ucojco ubꞌobꞌ y ufamiliobꞌ. 8 Entonces e David uyajcꞌu e chateꞌ uyunenobꞌ e Saúl xeꞌ jax e Armoní y e Mefi-bóset xeꞌ uyarobꞌ e Rispá xeꞌ ijchꞌoc tuaꞌ e Aiá. Y uyajcꞌu e cinco uyar e Merab xeꞌ ijchꞌoc tuaꞌ e Saúl xeꞌ qꞌuechuan taca e Adriel xeꞌ unembꞌir tuaꞌ e Barzilai xeꞌ ajlugar Meholá. 9 Y uturbꞌa tama ucꞌabꞌ tin e tuobꞌ uchꞌajnarir e Gabaón, y jaxirobꞌ uchamsiobꞌ tama or e witzir tut Cawinquirar Dios. Y bꞌan cocha era chamayobꞌ e siete winicobꞌ tama e bꞌajxan día conda war amorojsena e cebada.

10 Entonces e Rispá xeꞌ uwijchꞌoc e Aiá uxichꞌi inteꞌ bꞌujc xeꞌ jarbꞌir taca e succhij tujor ingojr nuxi tun y uyacta ubꞌa chꞌan tamar. Y yajaꞌ taca quetpa desde que cay morojsena e cosecha tama e cebada este que cay cꞌaxi e jajar otronyajr. Y machi uyacta tuaꞌ acꞌaxiobꞌ e usij tama ujor e chamenobꞌ tama tunor e día, y nien machi uyacta acꞌotoyobꞌ e ajcꞌopot animalobꞌ tama e acbꞌar tuaꞌ machi acꞌujxa e chamenobꞌ.

11 Pues conda e David cꞌotoy unata tunor lo que uche e Rispá xeꞌ uwixcar ani e Saúl, 12 ixin esto tama e chinam Jabés xeꞌ aquetpa tama e lugar Galaad tuaꞌ umorojse ubꞌaquer e Saúl y ubꞌaquer e Jonatán xeꞌ mucbꞌirobꞌ. Pues conda chamesnobꞌ e Saúl y e Jonatán tujor e witzir Guilboa umen tin e tuobꞌ uchꞌajnarir e Filisti, uyactobꞌ chꞌur tama e plaza tama e chinam Bet-sán. Pero de allí cꞌotoyobꞌ tin e tuobꞌ e chinam Jabés y uqꞌuechiobꞌ ixin ubꞌaquerobꞌ. 13 Y bꞌan cocha era e David ixin taca cora ajtzꞌojyirobꞌ tuaꞌ umorojse ubꞌaquer e Saúl y ubꞌaquer e Jonatán, y umorojsiobꞌ ubꞌan ubꞌaquerobꞌ e siete winicobꞌ xeꞌ chamesnobꞌ umen tin e tuobꞌ uchꞌajnarir e Gabaón. 14 Y de allí e rey David uqꞌueche ixin ubꞌaquer e Saúl y ubꞌaquer e Jonatán y umuquiobꞌ tama umujr e Quis xeꞌ utata ani e Saúl xeꞌ aquetpa tama e chinam Selá tama e departamento Benjamín. Y conda cꞌapa uche tunor era, e Dios uche tuaꞌ acꞌapa tunor e winar lo que ayan tama e país Israel.

15 Pues entonces uchꞌajnarir e Filisti sutpa uchiobꞌ e tzꞌojyir otronyajr taca tin e tuobꞌ e Israel. Entonces e David locꞌoy taca uyajtzꞌojyirobꞌ tuaꞌ uchiobꞌ e tzꞌojyir tacarobꞌ. Pero umen e tzꞌojyir era cꞌoy meyra e David. 16 Y tujam tunor e ajtzꞌojyirobꞌ tuaꞌ e Filisti ayan inteꞌ nuxi winic xeꞌ ucꞌabꞌa Isbí-benob xeꞌ achejcha taca uyoc. Y jaxir cay ani ubꞌijnu tuaꞌ uchamse e David. Pues ulanza abꞌari siete libra, y tama unac tzꞌapar umener inteꞌ machit xeꞌ imbꞌutz y xeꞌ mato jax cꞌampesbꞌir. 17 Pero e Abisai xeꞌ jax uyar e Seruiá ixin tuaꞌ utacre e David y cay uche e tzꞌojyir taca e winic xeꞌ chꞌajnarir tuaꞌ e Filisti este que uchamse. Entonces uyajtzꞌojyirobꞌ e David ojronobꞌ y chenobꞌ: “Machi ixto tuaꞌ ilocꞌoy tacaron tama e tzꞌojyir, tuaꞌ machi atajpa e tawarer tuaꞌ e Israel,” chenobꞌ e ajtzꞌojyirobꞌ.

18 Pues más nacpat sutpa chempa otronteꞌ tzꞌojyir taca uchꞌajnarir e Filisti tama e lugar Gob. Y tama e día yajaꞌ e Sibecai xeꞌ ajlugar Husá uchamse e Saf xeꞌ chꞌajnarir tuaꞌ tin e achejcha taca uyocobꞌ. 19 Y tama otronteꞌ tzꞌojyir xeꞌ chempa taca uchꞌajnarir e Filisti tama e lugar Gob, e Elhanán xeꞌ unembꞌir tuaꞌ e Jaír xeꞌ ajlugar tama e chinam Belén, uchamse uwijtzꞌin e Goliat xeꞌ ajlugar Gat. Pues nojta ulanza xeꞌ quetpa bꞌan cocha inteꞌ viga xeꞌ ajajra e bꞌujc tamar.

20 Pues conda chempa otronteꞌ tzꞌojyir taca uchꞌajnarir e Filisti tama e chinam Gat, tin e tuobꞌ e Israel cay uchiobꞌ e tzꞌojyir taca inteꞌ winic xeꞌ achejcha taca uyoc. Pues jaxir ayan seis orucꞌabꞌ y seis or uyoc, xeꞌ war che que ayan veinticuatro tama tunor. Y jaxir chꞌajnarir tuaꞌ tin e achejcha taca uyocobꞌ ubꞌan. 21 Y jaxir cay usactzene e ajtzꞌojyirobꞌ tuaꞌ e Israel, pero chamesna umen e Jonatán xeꞌ unembꞌir tuaꞌ e Simá xeꞌ sacumbꞌir tuaꞌ e David. 22 Pues e cuatro winicobꞌ era xeꞌ chꞌajnarirobꞌ tuaꞌ e Réfah xeꞌ ajlugar Gat cꞌaxiobꞌ tama ucꞌabꞌ e David y tama ucꞌabꞌ uyajtzꞌojyirobꞌ.