22
Conda e David ucꞌaywijres inteꞌ cꞌay tuaꞌ utattzꞌi ucꞌabꞌa Cadiosir
1 Pues e David ucꞌaywijres e cꞌay era tut Cawinquirar Dios conda corpesna umener tama ucꞌabꞌ e Saúl y tama ucꞌabꞌ tunor tin e aqꞌuijnobꞌ. 2 Pues e cꞌay che cocha era:
“Niwinquiraret Dios, pues net jaxet Niwajcojc,
y jaxet niqꞌuecꞌojsiaj,
y jaxet Niwajcorpesiaj,
3 Nidiosiret,
net jaxet niqꞌuecꞌosiaj,
y incojcna amener,
y bꞌanet cocha inteꞌ escudo taniut,
y acorpesen taca acꞌotorer,
y iquetpa bꞌan cocha inteꞌ nuxi torre tiaꞌ erer incorpa.
Niwajcorpesiajet,
net acorpesen tut tin e cꞌani ani uchamsen.
4 Pues incꞌajti tacaret, Niwinquiraret Dios, xeꞌ tawaret tuaꞌ itajttzꞌa,
cocha jax net xeꞌ acorpesen iraj iraj tut tunor tin e aqꞌuijna uwirenobꞌ.
5 “Pues e chamer uxojyruen bꞌan cocha inteꞌ nuxi jaꞌ xeꞌ cꞌani ani uqꞌuechien inxin tut e chamer,
y bꞌacten meyra tut e nuxi satpar era.
6 Y ayan conda e mujr cꞌanix ani ubꞌuqꞌuien,
y ayan conda e chamer uturbꞌa inteꞌ wajr taniut.
7 Pero conda cay innumse nibꞌa tama e merecnar, cay impejca Niwinquirar Dios,
y cay incꞌajti e tacarsiaj tacar,
y jaxir uyubꞌi ninuc esto tiaꞌ turu tama utemplo.
Y tunor nicꞌajtmayaj cꞌotoy esto tama uchiquin.
8 Entonces tunor or e rum cay nijqui,
y tunor ucajyesnibꞌir or e nuquir witzirobꞌ cay chincha.
Pues nijquesnobꞌ umen que war aqꞌuijna Cawinquirar Dios.
9 Y uyujta locꞌoy e sian bꞌutz tama uniꞌ,
y locꞌoy e nuxi cꞌajc xeꞌ imbꞌacꞌajr tama uyej,
y utujbꞌa locꞌoy ut e acꞌar xeꞌ war atzꞌajbꞌa.
10 Y de allí Cawinquirar Dios upasi ut e qꞌuin,
y ecmay tari, war tama inteꞌ nuxi tocar xeꞌ incsibꞌan ut.
11 Y de allí turuan tupat inteꞌ ángel xeꞌ ucꞌabꞌa querubín
xeꞌ chꞌuwan ixin tama e icꞌar.
12 Y umucres ubꞌa tama e incsibꞌaner bꞌan ani cocha jay bꞌasar tama inteꞌ nuxi bꞌujc,
y umucres ucꞌoter macuir inteꞌ nuxi tocar xeꞌ turix tuaꞌ uyebꞌta watar e jajar.
13 Y tiaꞌ war axin tama e tocar xeꞌ incsibꞌan ut locꞌoy cora jijbꞌiar,
y cay cꞌaxi e sian ut acꞌar xeꞌ war atzꞌajbꞌa.
14 Y de allí Cawinquirar Dios xeꞌ jax e Ajtichaner aru taca inteꞌ nuxi nuc.
15 Y uyebꞌta tari e nuxi jijbꞌiar bꞌan ani cocha jay war ajujrobꞌ taca e chꞌantꞌin,
y bꞌan cocha era cꞌapa uwechru cora cora tunor tin e war aqꞌuijna uwirenobꞌ.
16 Y Cawinquirar Dios uyujta locꞌoy umusic tama uniꞌ taca meyra qꞌuijnar,
y umen era cꞌotoy quetpa chequer utamir e nuxi jaꞌ y tunor ucajyesnibꞌir or e rum.
17 “Pues Nidiosir ucorpesen tamar lo que war innumse nibꞌa bꞌan cocha jay turen ani tama inteꞌ nuxi jaꞌ xeꞌ intam,
y jaxir ututzꞌi ucꞌabꞌ tiaꞌ turu tichan tut e qꞌuin tuaꞌ ucorpesen.
18 Y ucorpesen tama ucꞌabꞌ tin e aqꞌuijna uwirenobꞌ
xeꞌ uxejbꞌiobꞌ niut y xeꞌ más aqꞌuecꞌuobꞌ que nen.
19 Pues jaxirobꞌ uwajpienobꞌ conda war innumse nibꞌa meyra,
pero Niwinquirar Dios utacren tuaꞌ machi incꞌaxi tama ucꞌabꞌobꞌ.
20 Y ulocsen tama e lugar xeꞌ imbꞌacꞌajr.
Pues Niwinquirar Dios ucorpesen umen que war atzay uwiren.
21 Pues Niwinquirar Dios uyajqꞌuen nituanibꞌir umen que cay inche lo que imbꞌutz,
cocha uwira que matucꞌa war inche xeꞌ mabꞌambꞌan.
22 Pues nen ma tiaꞌ inwacta tuaꞌ inxana tama ubꞌir Niwinquirar Dios,
y ma inyajr najtirien tut tuaꞌ inxana tama e bꞌir tiaꞌ ayan e mabꞌambꞌanir.
23 Pues war incꞌubꞌseyan tut tunor e canseyaj lo que ayan tama uyojroner e Dios,
y ma tiaꞌ inwacta tuaꞌ inche bꞌan cocha ucꞌani lo que chꞌar tzꞌijbꞌabꞌir tamar.
24 Y war inturbꞌa nibꞌa tuaꞌ inxana imbꞌutz tama ubꞌir e Dios,
y war innajtran tut tunor e mabꞌambꞌanir.
25 Pues Niwinquirar Dios uyajqꞌuen nituanibꞌir,
cocha uwira que war taca inche lo que imbꞌutz.
26 “Niwinquiraret Dios, net incꞌun awirnar taca tin e incꞌun uwirnar,
y itzay awira tin e matucꞌa war uche.
27 Y achectes abꞌa que erach awirnar tut tin e uchectes ubꞌa que erach uwirnar tut e inmojr,
pero aquetpa imbꞌacꞌajr awirnar tut tin e uputputir ut.
28 Y acorpes tin e umanxujres ubꞌa toit,
pero tin e jax taquix uche ubꞌa net cꞌani amanxujres.
29 Niwinquiraret Dios, net jaxet nijanchꞌaquenaret,
y ajanchꞌacnesen tuaꞌ alocse e incsibꞌaner lo que ayan ani tamaren.
30 Pues tacar atacarsiaj uyubꞌien incucru cora ajtzꞌojyirobꞌ xeꞌ war aqꞌuijna uwirenobꞌ tic taca tiaꞌ utajwienobꞌ,
y tacar atacarsiaj erer intobꞌoy tujor e petzbꞌir tun lo que xojybꞌir uchinamobꞌ tamar xeꞌ tuobꞌ tin e aqꞌuijna uwirenobꞌ.
31 “Pues ubꞌir Cawinquirar Dios imbꞌutz inyajrer,
y tawar tuaꞌ cacꞌubꞌseyan tamar, cocha acꞌapa uche tunor lo que uyareon que bꞌan tuaꞌ uche.
Y Cadiosir aquetpa bꞌan cocha inteꞌ escudo tut tunor tin e usicbꞌa ucojcsiaj.
32 Pues ayan inteꞌ taca Dios xeꞌ jax Cawinquirar,
y mamajchi más xeꞌ uyubꞌi ucojcon.
33 Pues e Dios jax Niwajcojc xeꞌ ayan meyra ucꞌotorer,
y ubꞌijresen tuaꞌ inxana tama e bꞌir xeꞌ imbꞌutz.
34 Y uchien tuaꞌ anjni bꞌan cocha incojt masaꞌ,
y machi uyacten incucrema conda war inxana tujor e witzir.
35 Y ucanse nicꞌabꞌ cocha tuaꞌ uche e tzꞌojyir,
y uqꞌuecꞌojse ut nicꞌabꞌ tuaꞌ imbꞌiru ut e chꞌantꞌin xeꞌ chembꞌir taca e bronce.
36 Pues net, Niwinquiraret Dios, ixiet awajqꞌuen awescudo tuaꞌ ucorpesen,
y atacren tuaꞌ acꞌotoy aquetpa más nojta nicꞌampibꞌir.
37 Y ajabꞌi e bꞌir tiaꞌ inxana,
y tamar era machi war acaraxpa nioc tuaꞌ incucrema.
38 “Pues ixien tupat tin e war aqꞌuijna uwirenobꞌ este que intajwiobꞌ,
y machi inwacta tuaꞌ inche e tzꞌojyir tacarobꞌ este que cꞌapa inchamsiobꞌ.
39 Y cꞌapa inchꞌaquiobꞌ este que machi uyubꞌi achpobꞌ,
y cucrema cꞌaxiobꞌ tunuc nioc.
40 Pues net awajqꞌuen meyra niqꞌuecꞌosiaj tuaꞌ uyubꞌien inche e tzꞌojyir,
este que quetpobꞌ yebꞌar utajn nioc tunor tin e war aqꞌuijna uwirenobꞌ.
41 Y ache tuaꞌ alocꞌoy aꞌjniobꞌ taniut tunor tin e aqꞌuijna uwirenobꞌ,
y tamar era cꞌapa inchamse tunor tin e war uxejbꞌiobꞌ niut.
42 Y jaxirobꞌ cay ucꞌajtiobꞌ e tacarsiaj taca tin tin xeꞌ turobꞌ tuyejtzꞌerobꞌ,
pero mamajchi umen tacarnobꞌ.
Y de allí upejcobꞌ Cawinquirar Dios tuaꞌ atacarnobꞌ,
pero e Dios machi uturbꞌa ubꞌa tamar lo que cay ucꞌajtiobꞌ.
43 Y nen cꞌapa inmuxruobꞌ este que quetpobꞌ bꞌan cocha e tanlum lo que ayan tara tor e rum.
Y cꞌapa intaxruobꞌ bꞌan cocha ataxarna e anam tama e bꞌir.
44 Y net, Niwinquiraret Dios, atacren tuaꞌ incucru tin e war utuchꞌienobꞌ,
y aturbꞌen tuaꞌ incꞌotori tujor meyra chinamobꞌ,
este que ayan meyra sian manobꞌ tanibꞌa xeꞌ ma tiaꞌ cay inwira utobꞌ.
45 Y tunor e ajnajtir chinamobꞌ axin ayopobꞌ taniut,
y conda uyubꞌiobꞌ ninuc, oꞌbꞌianobꞌ taniut,
46 y abꞌactobꞌ taniut este que achinchobꞌ
conda alocꞌoyobꞌ tiaꞌ war amucuanobꞌ.
47 “Pues san turu Cawinquirar Dios. Intattzꞌi ucꞌabꞌa Niwajcojc.
Pues Nidiosir tawar tuaꞌ atajttzꞌa meyra, cocha jax xeꞌ uyajqꞌuen e corpesiaj.
48 Pues jax Nidiosir xeꞌ utoyi uyeror ut tunor tin e cay uchiobꞌ e mabꞌambꞌanir nipater,
y uturbꞌa meyra chinamobꞌ yebꞌar nicꞌotorer.
49 Y ucorpesen tut tin e aqꞌuijna uwirenobꞌ,
y unojresen meyra este que tin e cꞌani ani uchiobꞌ e tzꞌojyir tacaren machi uyubꞌi acꞌotoyobꞌ taniwejtzꞌer.
Y ucorpesen tut tin e aqꞌuijna uwirenobꞌ xeꞌ imbꞌacꞌajr uwirnarobꞌ.
50 Y tamar era cꞌani intattzꞌi acꞌabꞌa, Niwinquiraret Dios, tujam e sian nuquir chinamobꞌ,
y cꞌani incꞌaywijres inteꞌ cꞌay xeꞌ galan uyubꞌnar tuaꞌ intattzꞌi acꞌabꞌa.
51 Pues nen xeꞌ reyen xeꞌ sicbꞌabꞌiren amener, ajcꞌunenix meyra cꞌotorer amener tuaꞌ incucru tunor tin e aqꞌuijna uwirenobꞌ.
Pues net achectes meyra acꞌunersiaj taniut xeꞌ amanen David y tut tunor nichꞌajnarir ejcꞌajr ejcꞌajr.”