23
Uyojroner e David conda cꞌanix achamay
1 Pues jax era uyojroner e David conda cꞌanix achamay:
“Pues e David xeꞌ unembꞌir tuaꞌ e Isaí,
jax inteꞌ winic xeꞌ tattzbꞌir meyra umen e Dios,
y xeꞌ cꞌotoy quetpa rey umen que sicbꞌana umen e Dios tuaꞌ e Jacob.
Pues jaxir jax inteꞌ winic xeꞌ uche meyra salmo xeꞌ galan tuaꞌ acꞌaywijresna umen tin e tuobꞌ e Israel,
ojron y che:
2 “Pues Unawalir e Dios uchectes ubꞌa taniut,
y turu uyojroner tama niwej.
3 Pues e Dios tuaꞌ e Israel
xeꞌ jax uqꞌuecꞌojsiaj ojron tacaren y che:
‘Pues tin e acꞌotori tama ujor e chinam taca e erachir,
y xeꞌ acꞌotori taca inteꞌ manxujresiaj tut e Dios,
4 aquetpa bꞌan cocha e janchꞌaquenar conda war asacojpa,
y aquetpa bꞌan cocha uwarar e qꞌuin conda asacojpa conda matucꞌa e tocar,
y aquetpa bꞌan cocha e jajar xeꞌ uche aꞌchꞌi uyarumir e cꞌopot,’ che e Dios.
5 Pues nifamilia sicbꞌabꞌir umen e Dios,
cocha jaxir uche inteꞌ pacto tacaren xeꞌ ma tiaꞌ tuaꞌ acꞌapa,
y lo que ustabꞌir umener era ma tiaꞌ tuaꞌ atijresna.
Y war ucojcuen tuaꞌ alocꞌoy imbꞌutz tunor lo que inche,
y war utacren tuaꞌ acꞌapa achempa tunor lo que unsre.
6 Pero tunor tin e ajmabꞌambꞌanirobꞌ inyajrer aquetpobꞌ bꞌan cocha e tꞌix xeꞌ abꞌacꞌajrna,
porque ma erer uchuqui taca ucꞌabꞌ.
7 Y tuaꞌ uyubꞌi amorojsena e tꞌix, ucꞌani tuaꞌ acꞌampesna inteꞌ taqꞌuin o inteꞌ lanza,
y ucꞌani tuaꞌ apurutna inyajrer tama e cꞌajc.”
Uyajtzꞌojyirobꞌ e David xeꞌ machi abꞌactobꞌ tuaꞌ uchiobꞌ e tzꞌojyir
8 Pues jax era ucꞌabꞌobꞌ e ajtzꞌojyirobꞌ tuaꞌ e David xeꞌ machi abꞌactobꞌ tuaꞌ uchiobꞌ e tzꞌojyir: Pues e bꞌajxan jax e Is-bóset xeꞌ chꞌajnarir tuaꞌ e Hacmoní y xeꞌ quetpa ajcꞌotorer tujor e uxteꞌ ajtzꞌojyirobꞌ xeꞌ más oꞌbꞌnobꞌ uchiobꞌ e tzꞌojyir. Pues tama inyajr e Is-bóset ucꞌampes ulanza tuaꞌ uchamse 800 winicobꞌ tama inteꞌ taca tzꞌojyir. 9 Y nacpat e Is-bóset turu e Eleazar xeꞌ unembꞌir tuaꞌ e Dodó xeꞌ chꞌajnarir tuaꞌ e Ahoha. Pues jaxir jax inteꞌ tujam e uxteꞌ ajtzꞌojyirobꞌ xeꞌ más oꞌbꞌnobꞌ uchiobꞌ e tzꞌojyir. Y ayan inyajr conda e Eleazar quetpa ubꞌajner taca e David conda war uchiobꞌ e tzꞌojyir taca tin e tuobꞌ e Filisti xeꞌ cay umorojse ubꞌobꞌ tama e lugar Pas-damim, conda locꞌoy ajniobꞌ tut e tzꞌojyir tunor e inmojr ajtzꞌojyirobꞌ xeꞌ tuobꞌ e Israel. 10 Pero jaxir machi locꞌoy ajni, sino que cay uchamse tin e tuobꞌ e Filisti este que cꞌoy ucꞌabꞌ y quetpa tacꞌar umachit tamar. Pues tama e día yajaꞌ Cawinquirar Dios utacre tuaꞌ acꞌapa ucucru tunor e ajtzꞌojyirobꞌ xeꞌ tuobꞌ e Filisti. Pero tunor e inmojr ajtzꞌojyirobꞌ xeꞌ tuobꞌ e Israel machi sutpa tariobꞌ esto tiaꞌ war achena e tzꞌojyir este que cꞌotoy e hora tuaꞌ umorojsiobꞌ lo que quetpa tuobꞌ tin e chamesnobꞌ.
11 Pues nacpat e Eleazar turu e Samá xeꞌ unembꞌir tuaꞌ e Agué xeꞌ ajlugar Arat. Pues ayan inyajr conda cora ajtzꞌojyirobꞌ xeꞌ tuobꞌ e Filisti cay umorojse ubꞌobꞌ tuyejtzꞌer e chinam Lehi tama inteꞌ uyoc chor tiaꞌ pacbꞌir cora chꞌan bꞌur xeꞌ ucꞌabꞌa lenteja tuaꞌ ani uxujchꞌiobꞌ, y ayan ubꞌan cora ajtzꞌojyirobꞌ tuaꞌ e Israel xeꞌ turobꞌ taca e Samá tama e lugar era, pero jaxirobꞌ locꞌoy ajniobꞌ tut tin e tuobꞌ e Filisti. 12 Pero e Samá quetpa wawan tama uyuxin uyoc e chor tuaꞌ ucorpes e chꞌan bꞌur xeꞌ quetpa tuaꞌ tin e tuobꞌ e Israel, y ubꞌajner uchꞌancabꞌes e ajtzꞌojyirobꞌ xeꞌ tuobꞌ e Filisti. Y bꞌan cocha era Cawinquirar Dios utacre e Samá tuaꞌ ucucru e ajtzꞌojyirobꞌ xeꞌ tuobꞌ e Filisti tama e día era.
13 Y otronyajrto conda war amorojsena e cosecha, e David war amucuan tama e chꞌen lo que ayan tama unac e witzir tama e lugar Adulam tama e choquem lugar. Y ayan tin e tuobꞌ e Filisti xeꞌ umorojse ubꞌobꞌ tama e taquin cojn xeꞌ ucꞌabꞌa Refaim. Entonces uxteꞌ ajtzꞌojyirobꞌ tujam e treinta xeꞌ machi abꞌactobꞌ tuaꞌ uchiobꞌ e tzꞌojyir ixiobꞌ tuaꞌ utajwiobꞌ e David. 14 Pues e David quetpa tama e chꞌen era taca cora uyajtzꞌojyirobꞌ cocha erer ucorpes ubꞌobꞌ tamar, porque ayan cora ajtzꞌojyirobꞌ xeꞌ tuobꞌ e Filisti xeꞌ war acojcsanobꞌ tama e chinam Belén. 15 Entonces e David ojron taca e ajtzꞌojyirobꞌ y che: “Quisinic ani que ayan chi uyajqꞌuen tuaꞌ unchꞌi imbꞌijc e jaꞌ lo que ayan tama ut e jaꞌ xeꞌ turu tuyejtzꞌer uyocher e chinam Belén,” che e David.
16 Entonces e uxteꞌ ajtzꞌojyirobꞌ xeꞌ machi abꞌactobꞌ tuaꞌ uchiobꞌ e tzꞌojyir, ixiobꞌ tzꞌustaca esto tama e chinam Belén y ochoyobꞌ tiaꞌ morojsebꞌir turobꞌ e ajtzꞌojyirobꞌ xeꞌ tuobꞌ e Filisti, y ulocsiobꞌ e jaꞌ tama e ut e jaꞌ xeꞌ turu tuyejtzꞌer uyocher e chinam. Y de allí uqꞌuechiobꞌ ixin esto tiaꞌ turu e David tuaꞌ uyuchꞌi, pero jaxir machi uyuchꞌi, sino que ubꞌijnu tuaꞌ utuqui tut e rum cocha inteꞌ ofrenda tut Cawinquirar Dios. 17 Y che: “Que Cawinquirar Dios ucojquiquen tuaꞌ machi unchꞌi e jaꞌ era. Porque jay unchꞌi ani, aquetpa bꞌan cocha jay war ani unchꞌi uchꞌichꞌer e ajtzꞌojyirobꞌ era, porque unumse ubꞌobꞌ meyra tamar lo que imbꞌacꞌajr conda ixin ulocsiobꞌ,” che e David. Y bꞌan cocha era e David machi uyuchꞌi e jaꞌ. Pues tunor era uchiobꞌ e uxteꞌ ajtzꞌojyirobꞌ xeꞌ machi abꞌactobꞌ.
18 Pues e Abisai xeꞌ ijtzꞌimbꞌir tuaꞌ e Joab y xeꞌ uyar e Seruiá, jax xeꞌ cꞌotori tujor e treinta ajtzꞌojyirobꞌ xeꞌ machi abꞌactobꞌ tuaꞌ uchiobꞌ e tzꞌojyir. Pues ayan inyajr conda jaxir ucꞌampes ulanza tuaꞌ uchamse 300 ajtzꞌojyirobꞌ xeꞌ aqꞌuijna uwira ubꞌobꞌ tacar tama inteꞌ taca día. Y bꞌan cocha era cꞌotoy quetpa tattzbꞌir tujam e treinta ajtzꞌojyirobꞌ. 19 Pues jax xeꞌ cꞌotori tujor e treinta y xeꞌ cꞌotoy quetpa tattzbꞌir más que e inmojr treinta ajtzꞌojyirobꞌ, pero machi quetpa tujam e uxteꞌ nuquir ajtzꞌojyirobꞌ.
20 Pues ayan otronteꞌ winic xeꞌ machi abꞌacta tuaꞌ uche e tzꞌojyir xeꞌ ucꞌabꞌa Benaías xeꞌ unembꞌir tuaꞌ e Joiadá xeꞌ jax inteꞌ nuxi ajtzꞌojyir ubꞌan. Pues jaxir ajlugar tama e chinam Cabseel y cay uche meyra cosa xeꞌ galan y xeꞌ ma tiaꞌ eꞌrna. Pues tama inyajr uchamse e chateꞌ uyunenobꞌ e Ariel xeꞌ nuquir ajtzꞌojyirobꞌ tama e país Moab, y otronyajrto conda ayan meyra sisar, jaxir uyajnes incojt nuxi león este que uyojres tama inteꞌ chꞌen y uchamse taca ulanza. 21 Y otronyajrto conda e Benaías war axana tacar taca inteꞌ teꞌ tama ucꞌabꞌ, utajwi ubꞌa taca inteꞌ nuxi ajtzꞌojyir xeꞌ achejcha uyoc xeꞌ ajlugar Egipto xeꞌ machi abꞌacta tuaꞌ uche e tzꞌojyir y xeꞌ qꞌuecher umener inteꞌ lanza tama ucꞌabꞌ. Entonces jaxir uche e tzꞌojyir tacar taca e teꞌ, pero wacchetaca ulocse e lanza tama ucꞌabꞌ e nuxi winic, y uchamse tamar taca ulanza. 22 Y tama tunor era e Benaías xeꞌ unembꞌir tuaꞌ e Joiadá quetpa tattzbꞌir meyra tujam e treinta winicobꞌ xeꞌ machi abꞌactobꞌ tuaꞌ uchiobꞌ e tzꞌojyir. 23 Y tamar era uchꞌami más tattzꞌarsiaj que e inmojr, pero machi cꞌotoy quetpa tujam e bꞌajxan uxteꞌ ajtzꞌojyirobꞌ. Entonces e David uturbꞌa tuaꞌ aquetpa ajbꞌijresiaj tuaꞌ tin e ajcojc tuaꞌ.
24 Pues tin e turobꞌto tujam e treinta ajtzꞌojyirobꞌ xeꞌ machi abꞌactobꞌ tuaꞌ uchiobꞌ e tzꞌojyir jax era: Ayan e Asael xeꞌ ijtzꞌimbꞌir tuaꞌ e Joab, y ayan e Elhanán xeꞌ unembꞌir tuaꞌ e Dodó xeꞌ ajlugar tama e chinam Belén. 25 Y ayan e Samá xeꞌ ajlugar Harod, y ayan e Elicá xeꞌ ajlugar Harod ubꞌan. 26 Y ayan e Heles xeꞌ ajlugar Paltí, y ayan e Irá xeꞌ unembꞌir tuaꞌ e Iqués xeꞌ ajlugar tama e chinam Tecoa. 27 Y ayan e Abiézer xeꞌ ajlugar Anatot, y ayan e Sibecai xeꞌ ajlugar Husah. 28 Y ayan e Salmón xeꞌ ajlugar Ahohíta, y ayan e Maharai xeꞌ ajlugar tama e chinam Netofá. 29 Y ayan e Héled xeꞌ unembꞌir tuaꞌ e Baaná xeꞌ ajlugar tama e chinam Netofá ubꞌan, y ayan e Itai xeꞌ unembꞌir tuaꞌ e Ribai xeꞌ ajlugar tama e chinam Guibeá xeꞌ aquetpa tama departamento Benjamín. 30 Y ayan e Benaías xeꞌ ajlugar tama e chinam Piratón, y ayan e Hidai xeꞌ turu tama utiꞌ e xucur tama e lugar Gaas. 31 Y ayan e Abí-albón xeꞌ ajlugar Arbá, y ayan e Azmávet xeꞌ ajlugar tama e chinam Bahurim. 32 Y ayan e Eliahbá xeꞌ ajlugar tama e chinam Saalbim, y ayan uyunenobꞌ e Jasén, y ayan e Jonatán. 33 Y ayan e Samá xeꞌ ajlugar tama e chinam Arar, y ayan e Ahiam xeꞌ unembꞌir tuaꞌ e Sarar xeꞌ ajlugar tama e chinam Arar ubꞌan. 34 Y ayan e Elifélet xeꞌ unembꞌir tuaꞌ e Ahasbai xeꞌ ajlugar tama e chinam Maacá, y ayan e Eliam xeꞌ unembꞌir tuaꞌ e Ahitófel xeꞌ ajlugar tama e chinam Guiló. 35 Y ayan e Hesrai xeꞌ ajlugar tama e chinam Carmel, y ayan e Paarai xeꞌ ajlugar tama e chinam Arbá. 36 Y ayan e Igal xeꞌ unembꞌir tuaꞌ e Natán xeꞌ ajlugar tama e chinam Sobá, y ayan e Baní xeꞌ ajlugar tama e departamento Gad. 37 Y ayan e Sélec xeꞌ tuaꞌ uchꞌajnarir e Amón, y ayan e Naharai xeꞌ ajlugar tama e chinam Beerot xeꞌ ajtacarsiaj tuaꞌ e Joab xeꞌ uyar e Seruiá. 38 Y ayan e Irá xeꞌ ajlugar tama e chinam Jatir, y ayan e Gareb xeꞌ ajlugar tama e chinam Jatir ubꞌan. 39 Y ayan e Urías xeꞌ tuaꞌ uchꞌajnarir e Het. Pues tama tunor ayan treinta y siete ajtzꞌojyirobꞌ.