3
Ri samaj ri jachon pa ruk'a' ri Pablo chi nu'on chiquicojol ri man israelitas ta
Roma c'a ri', yin Pablo, yinc'o pa cárcel* Hch. 21:30-33. roma ri Cristo Jesús richin c'o utz nuq'uen-pe chive rix ri man rix israelitas ta. Yin ninnojij chi rix ivac'axan ri achique chi rujachic ru-favor ri Dios ruyo'on can pa nuk'a' richin ninsamajij chi'icojol rix.* Hch. 9:15; Ro. 1:5. Ivac'axan chi pa jun achel achic' xk'alajrises-vi chinuvech ri evan can na'ey, achel nu'in-e chupan ri juba' nutz'iban-e chive chupan ri vuj re'. Y tok rix xti'en leer, xtivetemaj chi yin k'alaj chic chinuvech ri man k'alajrisan ta can* Ef. 6:19. na'ey pa ruvi' ri Jesucristo, roma can man k'alajrisan ta vi chiquivech ri vinak ri chi solaj chi solaj ek'axnak-e choch'ulef, achel k'alajrisan vacami roma ri Lok'olaj Espíritu chiquivech ri lok'olaj ru-apóstoles y chiquivech ri yeyo'on rubixic ri nu'ij-pe ri Dios pa cánima. Ri k'alajrisan, quire' ruchojmil: Rix ri man rix israelitas ta,* Gá. 3:14. vacami roma ri utzulaj ch'abel ri nu'ij achique ruchojmil yixcolotaj, c'o favor xticochij junan kiq'uin roj israelitas; y rix ocunak ruk'a-rakan jun mismo cuerpo kiq'uin, y junan xtikac'ul ri sipanic ri sujun chike roma xa jun kánima kabanon riq'uin ri Cristo Jesús. Y yin xinoc samajinel* Ro. 15:18. richin ri utzulaj ch'abel ri', roma ri Dios riq'uin xsamaj ri ruchuk'a' pa vánima, xusipaj ri samaj ri' chuve roma ri ru-favor.
Masque ja yin ri más manak oc nuk'ij chique ri erichin ri lok'olaj rutinamit ri Dios, pero chuve yin xyo'ox-vi ri favor chi nintzijoj chique ri man israelitas ta ri utzulaj ch'abel ri nu'ij achique ruchojmil yecolotaj. Ri ch'abel ri' can achel jun nimalaj beyomal* Col. 1:27. ri man jun nitiquer ninojin rij ri ajani rakale'n, ri nikil riq'uin ri Jesucristo. (Chuka', ka) xyo'ox chuve chi ninya' chosakil chiquivech conojel ri ruchojmil ri man k'alajrisan ta pe chupan ri ajani tiempo ek'axnak, ri can evan-vi-pe* Ro. 16:25, 26; 1 Co. 2:7. riq'uin ri Dios ri banayon ronojel,* Sal. 33:6; Jn. 1:3; Col. 1:16. 10 richin chi vacami, koma roj ri kaniman chic y ni'ix iglesia chike, tik'alajin chiquivech ri nima'k tak quik'ij pa cak'ik' y ri espíritu ri c'o nimalaj uchuk'a' pa quik'a' chicaj ri jalajoj ruvech utzulaj no'oj c'o riq'uin ri Dios, 11 chi can xbanataj-vi achel ri runojin-pe* Ef. 1:11. chupan ri jalajoj tiempo ek'axnak chi nuk'alajrisaj riq'uin ri Kajaf Cristo Jesús, 12 ri achok roma cukul kac'u'x nkujel-apu* Ef. 2:18. riq'uin ri Dios, y man nikaxi'ij ta ki' nkuch'o che, roma kayo'on kánima riq'uin. 13 Roma c'a ri', ninc'utuj chive chi man quixbison tok nivac'axaj chi yin nink'asaj k'axomal ivoma,* 2 Co. 1:6. roma re' xa richin chi nic'uje' ik'ij rix.
Man jun bey xtiketemaj ajani nojo'on ri Jesucristo
14 Romari' yin yixuque'* Ro. 14:11; Fil. 2:10. richin nin-en orar chuvech ri Dios ri Rutata' ri Kajaf Jesucristo, 15 ri achok riq'uin petenak-vi quic'aslen conojel ri ec'o chila' chicaj, y ri ec'o vave' choch'ulef. 16 Nin-en orar chi riq'uin ri jalajoj rakale'n ri ruk'ij, xtu'on chi xtic'uje' ruchuk'a'* Sal. 28:8; Is. 40:29. rija' pan ivánima roma ri Lok'olaj ru-Espíritu; 17 richin quiri' ri Jesucristo can ta achel racho* Jn. 14:23. xtu'on che ri ivánima roma rix cukul ic'u'x riq'uin, richin chi tok naj chic benak-ka ruxe' ri nijo-ivi' achel jun che' ri naj benak-ka ruxe' pan ulef, o achel jun jay ri jabel rutz'uyubal banon-ka, 18 rix yixtiquer nivetemaj junan quiq'uin conojel ri erichin ri lok'olaj rutinamit, ri ajani ruvech, ajani rupan, ajani benak-ka pa xulan y ajani jotol chicaj, 19 y k'ij-k'ij más xtivetemaj ajani nojo'on pa ránima ri Jesucristo riq'uin (ajovabel, amor) ri man jun bey xtetemex ruchojmil ronojel, richin ninoj pan ivánima rix ronojel ri nojnak pa ránima ri Dios.
20 Ri Dios c'o ruchuk'a' richin nu'on más q'uiy que chuvech ri ajani nikac'utuj che y ri ajani nkutiquer nikanojij, riq'uin ri ruchuk'a' ri nisamaj pa tak kánima. 21 Can ta xtuc'ul ruk'ij* 1 Ti. 1:17. rija' koma roj ri ni'ix iglesia chike, ri xa jun kabanon riq'uin ri Cristo Jesús, ronojel tiempo ri petenak chikavech apu, y can ta jumul-jumul quiri' xtibanataj. Amén.

*3:1 Hch. 21:30-33.

*3:2 Hch. 9:15; Ro. 1:5.

*3:4 Ef. 6:19.

*3:6 Gá. 3:14.

*3:7 Ro. 15:18.

*3:8 Col. 1:27.

*3:9 Ro. 16:25, 26; 1 Co. 2:7.

*3:9 Sal. 33:6; Jn. 1:3; Col. 1:16.

*3:11 Ef. 1:11.

*3:12 Ef. 2:18.

*3:13 2 Co. 1:6.

*3:14 Ro. 14:11; Fil. 2:10.

*3:16 Sal. 28:8; Is. 40:29.

*3:17 Jn. 14:23.

*3:21 1 Ti. 1:17.