4
Ja ri Lok'olaj Espíritu nibano chi junan kánima
1 Yin Pablo ri yinc'o pa cárcel roma rusamaj ri Ajaf, yixinpaxa'aj chi tic'uaj ri ic'aslen chupan ruchojmil ri c'aslen ri xixoyox-vi richin nic'uaj, 2 chi can ta ikasan-ivi', chi (ch'uch'uj, me'l oc) ivánima, chi roma nijo-ivi' man tik'ax ic'u'x chi nicoch'ola-ivi' chivech,*Gá. 5:22; Col. 3:14. 3 chi can ta nitij ik'ij chi iyuken-ivi' chuvi' uxlanen, richin quiri' xa jun ivánima jumul achel rubanon ri Lok'olaj Espíritu chive. 4 Roma ri rix richin ri Jesucristo, xaxe jun cuerpo ibanon,*Ro. 12:5. xaxe jun ri Lok'olaj Espíritu, y xaxe jun ri favor ri iyo'on-apu ivech chirij, ri achok roma xixoyox. 5 Xaxe jun ri Ajaf.*1 Co. 8:6. Xaxe jun cukul-vi-apu ic'u'x, y xaxe jun ri bautismo. 6 Xaxe jun ri Dios ri Tata'aj pa quivi' conojel, c'o pa ruvi' ronojel, runojsan ronojel, y c'o pa tak ivánima ivonojel.
7 Pero chikajununal c'o favor yo'on chike, y can ja achel retexic rubanon ri Jesucristo, quiri' ri sipanic ri ruyo'on chike. 8 Romari' ruch'abel ri Dios ri tz'iban can, quire' nu'ij pa ruvi' ri Jesucristo:
Xtzolij-e chila' chicaj, y ri eruch'acon ri itzel, xerelesaj-e pa ruk'a'.
Y jalajoj sipanic xuyala' can chique ri vinak.*Sal. 68:18.
Quiri' nu'ij ri tz'iban can.
9 Y roma nu'ij chi xbe chicaj,*Jn. 3:13. ri' nu'ij tzij chi na'ey kajnak-ka chupan ri lugares más naj ka che ri roch'ulef. 10 Ri Jun ri xuka, jari' mismo ri xtzolij-e chicaj, y c'a más pa ruvi' e ri caj xbec'uje-vi, richin nutz'akatisaj ronojel. 11 Ja rija' mismo xbano chi ec'o xe'oc apóstoles, chi ec'o yeyo'on rubixic ri nu'ij-pe ri Dios pa cánima, chi ec'o yetzijon chique ri man quiniman ta ri utzulaj ch'abel ri nu'ij achique ruchojmil yecolotaj, y chi ec'o yuk'unel y tijonel quichin ri quiniman ri Jesucristo. 12 Xeruya' ri samajela' re' richin chi riq'uin ri quisamaj, nitz'akatitaj quic'aslen ri erichin ri lok'olaj rutinamit, richin quiri' ja jun ri tinamit niqui'en ri rusamaj, richin niq'uiy ri quic'aslen ri erichin ri*1 Co. 14:26. ru-cuerpo ri Jesucristo, 13 c'a ja tok nerila' k'ij chi konojel xa jun kánima xtekabana' roma cukul-apu kac'u'x riq'uin, y roj jelenak-apu riq'uin ri Ruc'ajol ri Dios, richin nitz'akatitaj*Col. 1:28. ri kac'aslen, y nekila' achel rutz'akatilen ruc'aslen ri Jesucristo ri nitz'akatisan ronojel, 14 richin quiri', mana-ta chic roj achel ac'ola' pa ruk'a' ronojel quivech (tijonic, enseñanza), chi nku'e quire' nku'e quila', achel xa ta cak'ik' nimiyon kichin,*Stg. 1:6. ni man nikaya' ta ki' pa ruk'a' canon tak tzij quichin vinak ri xaxe richin niquisetz kano'oj yeno' niqui'en bochin tak tzij ri xa man kitzij ta. 15 Pa ruq'uexel ri', riq'uin nikatzekle'ej ri kitzij ruyuken-ri'*2 Co. 4:2. riq'uin ri nkujo'on pa kánima, kuq'uiy chupan ronojel ri kac'aslen chirakan ri Jesucristo ri c'o pa kavi' konojel ri kaniman, richin nekila' achel ruc'aslen rija', 16 ri nibano chi ronojel ri cuerpo nril ruq'uiyilen*Col. 2:19. richin quiri' riq'uin ri nikajo-ki' nkutiquer nikato-ki' chi nkuq'uiy chupan ri kac'aslen riq'uin ri Dios. Quiri' nibanataj roma chupan ri cuerpo ri' konojel banon chike chi kac'uan-ki' y konojel roj yo'on chupan ri cuerpo richin nikato-ki' riq'uin ri samaj ri yo'on chike chikajununal chi nika'an, y quiri' ruyuken-ri' ri cuerpo niq'uiy.
Ri c'ac'ac' c'aslen ri nuya' ri Jesucristo
17 Vacami c'a, nin-ij y ninchila'ej chive, chi pa rubi' ri Ajaf tiya' can ri c'aslen achel quic'aslen ri ch'aka' chic man israelitas ta; roma rije' xaxe ri man jun nic'atzin-vi ri yequinojij.*1 P. 4:3. 18 Xa k'eku'n rubanon ri quino'oj,*1 Ts. 4:5. man jun quik'a' che ri c'aslen ri nuya' ri Dios, roma man nicajo' ta niquetemaj, roma cof quibanon che ri cánima. 19 Rije' tok manak chic quiq'uix chiri', xa man xquik'at ta chic qui' richin xequibanala' mac ri nuyec q'uix.*Ro. 1:24; Col. 3:5. Xa achique na chi mac ri xquirayij, jari' xqui'en; chi achi'a' chi ixoki' quijachon-qui' chupan xa achique na ri niq'uixbisan. 20 Jac'a rix man quiri' ta ri c'aslen xivetemaj riq'uin ri Jesucristo. 21 Roma yin nin-ij chi rix ivac'axan*Ef. 1:13. ri ch'abel ri ru'in can rija', y rix tijon chirij ri kitzij ri nikil riq'uin rija'. 22 Roma c'a ri', tiya' can juc'an rubanic ri ojer c'aslen ri xic'uaj na'ey,*Ro. 6:6; Col. 3:8, 9. jun c'aslen ri nretzelaj ivánima benak riq'uin ri niya-ivi' pa ruk'a' ri ye'irayij ri xaxe nusetz ino'oj. 23 Y vacami tiya' lugar chi ni'an c'ac'ac' che ri achique ninojij pan ivánima.*Ro. 12:2; Col. 3:10. 24 Tivika-ivi' riq'uin ri c'ac'ac' c'aslen*Ro. 6:4; 2 Co. 5:17. ri ja ri Dios banayon, richin chi ri ic'aslen nu'on-pe achel ruc'aslen rija', jun c'aslen choj y ch'ajch'oj uc'uan roma ri kitzij.
25 Roma c'a ri', tiya' can jumul ri tz'ucun tak tzij; chi'ijununal quixch'o ri kitzij chivech.*Zac. 8:16. Roma roj ri kaniman xa roj rutz'akat jun mismo cuerpo. 26 Tok c'o roma nipe ivoyoval, man tiya' lugar chi roma ri oyoval ni'en mac,*Sal. 4:4; 37:8. y man c'a quiri' ivoyoval tok nika-ka ri k'ij, 27 ni man tiya' lugar chi ri itzel yixrutakchi'ij pa mac.*Ef. 6:11; Stg. 4:7. 28 Ri nibano elak' rubanon can, vacami man telak' chic, xa pa ruchojmil tucusaj ri ruk'a'*1 Ts. 4:11, 12. chuch'aquic ruméra, richin quiri' c'o achok che yeruto-vi ri nic'atzin quito'ic.*Ro. 12:13. 29 Man jun itzel tzij tel pan ichi',*Mt. 12:34-37. xaxe ri utz y ri nic'atzin richin ruq'uiyilen ri ic'aslen chirakan ri Dios ri ti'ij,*Col. 4:6. richin quiri' nuq'uen-pe favor pa cánima ri ye'ac'axan ivichin. 30 Man tiya' chi bis*1 Ts. 5:19. ri Lok'olaj ru-Espíritu ri Dios, ri retal ruyo'on ri Dios pa kánima chi nipe na jun k'ij tok nkujoc jumul richin rija' roma ri kalok'ic xu'on. 31 Ronojel ri c'ayilaj tak achique ye'alex-pe pa tak ivánima, achel ri oyoval, ri yixsiq'uin, ri itzel nina' che jun, ri yixyok'on y ronojel ri itzel c'o pan ivánima chiquij ch'aka', xa tiya' can.*Tit. 3:3. 32 Pa ruq'uexel ri', utz ino'oj tibana' chivech. Tipokonaj-ivi'. Tibana' perdonar ivi'*Mt. 6:14; Col. 3:12, 13. achel xu'on ri Dios, xixru'on perdonar rix ri xa jun ibanon riq'uin ri Jesucristo.
*4:2 Gá. 5:22; Col. 3:14.
*4:4 Ro. 12:5.
*4:5 1 Co. 8:6.
*4:8 Sal. 68:18.
*4:9 Jn. 3:13.
*4:12 1 Co. 14:26.
*4:13 Col. 1:28.
*4:14 Stg. 1:6.
*4:15 2 Co. 4:2.
*4:16 Col. 2:19.
*4:17 1 P. 4:3.
*4:18 1 Ts. 4:5.
*4:19 Ro. 1:24; Col. 3:5.
*4:21 Ef. 1:13.
*4:22 Ro. 6:6; Col. 3:8, 9.
*4:23 Ro. 12:2; Col. 3:10.
*4:24 Ro. 6:4; 2 Co. 5:17.
*4:25 Zac. 8:16.
*4:26 Sal. 4:4; 37:8.
*4:27 Ef. 6:11; Stg. 4:7.
*4:28 1 Ts. 4:11, 12.
*4:28 Ro. 12:13.
*4:29 Mt. 12:34-37.
*4:29 Col. 4:6.
*4:30 1 Ts. 5:19.
*4:31 Tit. 3:3.
*4:32 Mt. 6:14; Col. 3:12, 13.