1 Iwe, lon eu rän, lupwen Tafit a nom lon imwan, a titi ewe soufos Natan o üreni, “Nengeni, üa nom lon eu imw mi för seni ewe irä setar, nge än ewe Samol mi Lapalap pworofel a chök nom lon eu imw mangaku.” 2 Natan a üreni Tafit, “Kopwe föri meinisin mine ka ekieki lon lelukom, pun Kot a etuk.”

3 Nge lon ewe chök pwinin, ewe Samol mi Lapalap a üreni Natan, 4 “Kopwe feila o üreni nei chon angang Tafit, pwe iei aloi ngang ewe Samol mi Lapalap, ‘Kosap aüetä eu imwenfel fän itei pwe üpwe nom lon. 5 Pun üsap nom lon eu imwenfel seni ewe ränin üa emwenawu chon Israel seni Isip tori ikenai, nge üa chök saifetal fän eu imw mangaku seni eu leni tori eu leni. 6 Lon ekewe leni meinisin ia üa saifetal ie me ekewe chon Israel meinisin, üsamwo aisini eman lein ekewe souemwenin Israel, chokewe üa awiseer pwe repwe chon masen nei aramas: Pwota ousap aüetä eu imwenfel seni irä setar fän itei?’ 7 Iei mine kopwe üreni nei chon angang Tafit, pwe iei aloi ngang ewe Samol mi Unusen Manaman, ‘Üa angeek seni om tümwünü sip lemäl, pwe kopwe samolun nei aramasen Israel. 8 Üa etuk ekis meinisin ia ka feila ie, üa pwal ärala chon oputom meinisin me mwom. Iwe, üpwe aitöchü itom usun iteüöchün iten ekewe meilap won fanüfan. 9 Üpwe filätä eu leni fän iten nei aramasen Israel, üpwe fotukiretiu ikenan pwe repwe nonom lon püsin lenier, nge esap wor eman epwe chüen osukosukeer. Iwe, ekewe aramasangau resap chüen ariaföüür usun ar ariaföüür me lom, 10 lon ewe fansoun üa filätä soukapwüng won nei aramasen Israel. Iwe, üpwe akufu chon oputom meinisin. Nge üa pwal asile ngonuk, pwe ngang ewe Samol mi Lapalap üpwe awora mwirimwirum. 11 Iwe, lupwen ränin manauom repwe müchüla o kopwe peias ren om kewe lewo, üpwe seikätä eman noum mwän pwe epwe king, üpwe pwal anüküchara mwün. 12 Ätewe epwe aüetä eu imwenfel fän itei, nge ngang üpwe anüküchara an nemenem lon mwün tori feilfeilachök. 13 Iwe, ngang üpwe saman, nge i epwe nei. Üsap angei seni ai tong ellet, usun üa angei seni Saul, ätewe mi akom mwom. ✡2.Kor 6.18; Ipr 1.5 14 Nge üpwe awisa pwe epwe nemeni nei aramas me mwüi tori feilfeilachök, pwe mwün epwe nonomola tori feilfeilachök.’ ” 15 Iwe, Natan a apworausa ngeni Tafit ükükün ekei kapas meinisin ewe Samol mi Lapalap a pwäri ngeni.

16 Mürin, ewe king Tafit a tolong lon ewe imwenfel seni mangaku, a mot fän mesen ewe Samol mi Lapalap o iotek, “Ngang iö, ai Kot Samol mi Lapalap, nge iö mwirimwiri, pwe ka emwenieito tori ei aükükün? 17 Nge ei mettoch a chök kükün me reöm, ai Kot. Ka pwal pwon fän iten mwirimwiri ngang noum chon angang lon kan fansoun mwach. Ka föri ngeniei usun eman aramas mi tekia seni aramas meinisin, ai Kot Samol mi Lapalap. 18 Pwal met üpwe chüen apasa ngonuk, pokiten ka aitöchüei ngang noum chon angang? Pun en ka sileei ngang noum chon angang. 19 Ai Samol mi Lapalap, seni mochenin letipom en ka föri ekei föför mi lapalap fän itei ngang noum chon angang, ka pwal pwäri ngeniei ekei kapasen pwon mi amwarar. 20 Ai Samol mi Lapalap, esap wor eman Kot usun en, esap pwal wor eman Kot ünükum. Iei usun mine äm aia silei. 21 Ifa usun, mi wor aramasen eu mwü won fanüfan ra wewe ngeni noum aramasen Israel? Ka amanaueer pwe repwe noum aramas. Itom a iteüöch ren om föri föför mi lapalap o eniweniw, pun ka asüela chon ekewe mwü me mwen noum aramas, chokewe ka amanaueer seni Isip. 22 Ka filätä ekewe aramasen Israel pwe repwe noum aramas tori feilfeilachök. Nge en, ai Samol mi Lapalap, ka wiliti ar Kot. 23 Iei, ai Samol mi Lapalap, kopwe apwönüetä tori feilfeilachök ewe pwon ka eäni ngeniei ngang noum chon angang, pwal ngeni mwirimwiri o föri usun mine ka pwonei. 24 Iwe, om pwon epwe nüküchar o itom epwe fokun itetekia tori feilfeilachök. Mürin, aramas repwe apasa, ‘Ewe Samol mi Unusen Manaman ewe Koten Israel, i än chon Israel Kot.’ Nge mwirimwiri ngang noum chon angang repwe nonomola me fän mesom. 25 Pun en ai Kot ka pwärätä ngeniei ngang noum chon angang ekei kapas o apasa, pwe kopwe awora mwirimwiri pwe repwe king. Iei popun ngang üa tongeni eäni ei iotek ngonuk. 26 Ai Samol mi Lapalap, en Kot, ka pwon ngeniei ngang noum chon angang ekei mettoch mi mürina. 27 Iei mine kose mochen kopwe afeiöchü mwirimwiri, pwe repwe nonomola me fän mesom tori feilfeilachök. Pun en, ai Samol mi Lapalap, ka afeiöchüür, iei mine repwe feiöch tori feilfeilachök.”