16
1 Iwe, ra uwato än Kot we pworofel o anomu lon ewe imw mangaku Tafit a fen amolätä fän itan. Mürin, ra eäni asoren kek me asoren kinamwe ngeni Kot. 2 Nge lupwen Tafit a wes le eäni asoren kek me asoren kinamwe, a afeiöchü ekewe aramas fän iten ewe Samol mi Lapalap. 3 Tafit a pwal aineti mongö ngeni chon Israel meinisin. A ngeni eman me eman mwän me fefin efoch pilawa, eu kinikinin fituk me echö nokop seni föün wain mi apwas.
4 Iwe, Tafit a pwal filätä ekoch mwän seni ewe ainangen Lefi, pwe repwe angang me mwen än ewe Samol mi Lapalap we pworofel, repwe iotekin tüngor me iotekin kilisou o mwareiti ewe Samol mi Lapalap ewe Koten Israel. 5 Iwe, Asaf a fil pwe ar samol, ewe kisin fän Sekaria. Nge Jeiel, Semiramot, Jehiel, Matitia, Eliap, Penaia, Opet-etom me Jeiel ra wisen ettik kitar me ükülele. Asaf a wisen ettik ekewe pisekin kaktai, 6 nge ekewe souasor Penaia me Jahasiel ra wisen ettiki ekewe rappwa iteitan me mwen än Kot we pworofel.
Än Tafit kölfel me kölün kilisou
16.7-36
(Kölf 105.1-15; 96.1-13; 106.47-48)
7 Iwe, lon ewe ränin Tafit ekärän filätä, pwe Asaf me pwin kana repwe eäni ei kölün kilisou ngeni ewe Samol mi Lapalap:
8 Oupwe kilisou ngeni ewe Samol mi Lapalap, oupwe köri itan. Oupwe asilefeili an kewe föför me lein chon ekewe mwü.
9 Oupwe köl ngeni, oupwe kölün mwareiti i. Oupwe apworausa an kewe föför meinisin mi amwarar.
10 Oupwe fokun ingemwareiti itan mi pin. Chokewe mi kütta ewe Samol mi Lapalap repwe meseik.
11 Oupwe kütta ämi alilis me ren ewe Samol mi Lapalap, oupwe kütta i fansoun meinisin.
12 Oupwe chechemeni ekewe föför mi amwarar a föriir. Oupwe chechemeni ekewe manaman a föriir me an kewe kapwüng a eäni,
13 ämi mwirimwirin Apraham nöün Kot we chon angang, ämi mwirimwirin Jakop kewe, ätewe mi fil me ren.
14 Ewe Samol mi Lapalap i ach Kot, an kewe allük ra fän iten unusen fanüfan.
15 I a chechemeni an we pwon tori feilfeilachök, an we kapas a anüküchara ngeni engeröü täppin aramas.
16 A chechemeni ewe pwon a eäni ngeni Apraham, an pwon a eäni fän akapel ngeni Isaak. ✡Ken 12.7; Ken 26.3
17 A anüküchara ewe pwon ngeni Jakop pwe eu allük, pwal eu pwon esemüch.
18 Iwe, a apasa, “Üpwe ngonuk ewe fanü Kanaan pwe fanüom.” ✡Ken 28.13
19 Lupwen nöün Kot kewe aramas ra fokun chokükün, lupwen ra chon siamü lon ewe fanü Kanaan
20 o saifetal seni eu fanü tori pwal eu fanü, seni eu mwü tori pwal eu mwü,
21 Kot esap mwüt ngeni eman pwe epwe ariaföüür. A apwüngü ekewe king pokiter
22 o apasa, “Ousap atapa nei kewe mi fil, ousap afeiengaua nei kewe soufos.” ✡Ken 20.3-7
23 Oupwe köl ngeni ewe Samol mi Lapalap, ämi chon fanüfan meinisin. Oupwe arongafeili iteiten rän usun an amanaua aramas.
24 Oupwe asilefeili an ling me lein chon ekewe mwü, pwal an föför mi amwarar me lein ekewe aramas meinisin.
25 Pun ewe Samol mi Lapalap a tekia. Sipwe alapala ach mwareiti i, sipwe pwal niuokusiti i lap seni ekewe kot meinisin.
26 Pun än chon ekewe mwü kewe kot ra chök uluulun anümwäl. Nge ewe Samol mi Lapalap a föri ekewe läng.
27 Iteüöch me manaman ra nonom mwan, pöchökül me pwapwa ra nonom lon imwan mi pin.
28 Oupwe mwareiti ewe Samol mi Lapalap, ämi chon ekewe mwü meinisin, oupwe mwareiti än ewe Samol mi Lapalap ling me manaman.
29 Oupwe mwareiti lingen iten ewe Samol mi Lapalap. Oupwe uwato eu asor o feito fän mesan. Oupwe fel ngeni ewe Samol mi Lapalap fän üf mi pin.
30 Ämi chon fanüfan meinisin, oupwe chechech me mwan. Ewer, fanüfan a fokun nükünük, esap tongeni mwöküt seni lenian.
31 Ekewe läng repwe pwapwa, nge fanüfan epwe meseik. Ir repwe apasa me lein chon ekewe mwü, “Ewe Samol mi Lapalap a nemenem.”
32 Matau epwe ngüngü, pwal meinisin mine a nom lon, ekewe mälämäl repwe mweireir, pwal meinisin mine a nom lor.
33 Mürin, ekewe irän lein wöllap meinisin repwe köl fän pwapwa fän mesen ewe Samol mi Lapalap, pun i epwe feito pwe epwe apwüngü chon fanüfan.
34 Oupwe kilisou ngeni ewe Samol mi Lapalap, pun i a kirikiröch, an tong ellet a nonom tori feilfeilachök. ✡2.Kron 5.13; 7.3; Esr 3.11; Kölf 100.5; 106.1; 107.1; 118.1; 136.1; Jer 33.11
35 Oupwe pwal apasa, “Kopwe amanauakem, äm Kot äm Chon Amanau. Kopwe achufengenikem o angasakem seni me lein chon ekewe mwü, pwe aipwe kilisou ngonuk o mwareiti itom mi pin.
36 Oupwe mwareiti ewe Samol mi Lapalap ewe Koten Israel seni fansoun esepop tori fansoun esemüch.” Mürin, ekewe aramas ra apasa, “Amen”, o mwareiti ewe Samol mi Lapalap.
Ekewe mwän seni ewe ainangen Lefi ra fil pwe repwe tümwünü ewe pworofel
16.37-43
37 Iwe, Tafit a awisa Asaf me märärin kana, pwe repwe angang fochofoch me mwen än ewe Samol mi Lapalap we pworofel, usun pwüngün angangen lon eu me eu rän me lon ewe leni ia ewe pworofel a nom ie. 38 Iwe, a pwal awisa Opet-etom nöün Jetutun we mwän me wone me waluman märärin kana, pwe repwe alisiir. Nge Opet-etom me Hosa ra wisen mamasa ekewe asamalap. 39 Iwe, Tafit a pwal awisa ewe souasor Satok me märärin kewe ekewe souasor, pwe repwe angang ngeni ewe Samol mi Lapalap me lon ewe lenien fel won ewe leni tekia mi nom lon Kipeon. 40 Repwe eäni asoren kek ngeni ewe Samol mi Lapalap won ewe rongen asoren kek iteiten lesosor me lekuniol, usun meinisin mine a mak lon än ewe Samol mi Lapalap we allük a allük ngeni chon Israel. 41 Iwe, a pwal nom rer Heman me Jetutun me ekewe lusun mi kefil o mak iter, pwe repwe kölün kilisou ngeni ewe Samol mi Lapalap, pun an tong ellet a nonom tori feilfeilachök. 42 Iwe, Heman me Jetutun ra wisen tümwünü ekewe rappwa me pisekin kaktai, pwal sokopaten pisekin ettik ra aea le ettiki ekewe köl mi pin. Nge nöün Jetutun kewe mwän ra kefil pwe repwe mamasa ewe asamalap.
43 Mürin, ekewe aramas meinisin ra liwinla lon en me imwan, pwal Tafit a liwiniti lenian, pwe epwe afeiöchü chon leimwan. ✡2.Sam 6.19-20