1 Iwe, lupwen Salomon a wes me iotek, ekkei a püngütiu me läng o kenala ewe asoren kek me ekewe sokopaten asor, nge lingen ewe Samol mi Lapalap a aura ewe imwenfel. ✡Lif 9.23-24 2 Iwe, ekewe souasor resap tongeni tolong lon imwen ewe Samol mi Lapalap, pun lingen ewe Samol mi Lapalap a aura ewe imwenfel. 3 Nge lupwen ekewe chon Israel ra küna ewe ekkei, a püngütiu me läng, me lingen ewe Samol mi Lapalap won ewe imwenfel, ra chapetiu lepwül, ra fel ngeni ewe Samol mi Lapalap o kilisou ngeni. Iwe, ra apasa, “Ewe Samol mi Lapalap a kirikiröch, an tong ellet a nonom tori feilfeilachök.” ✡1.Kron 16.34; 2.Kron 5.13; Esr 3.11; Kölf 100.5; 106.1; 107.1; 118.1; 136.1; Jer 33.11

4 Mürin, ewe king Salomon me ekewe aramas meinisin ra asor ngeni ewe Samol mi Lapalap. 5 Iwe, ewe king a eäni asor ükükün rüe me ruungeröü ätemwänin kow me ipükü rüe ngeröü sip. Iei usun ewe king me ekewe aramas meinisin ra efinüna ewe imwenfel. 6 Nge ekewe souasor ra ütä me lon lenier, pwal ekewe mwän seni ewe ainangen Lefi, ra mwareiti ewe Samol mi Lapalap fän sokopaten pisekin ettik ewe king Tafit a föri pwe repwe aea le eäni ei kölün kilisou, ‘An tong ellet a nonom tori feilfeilachök,’ usun Tafit a awisa ngeniir. Iwe, ekewe souasor ra ettiki ekewe rappwa, nge ekewe chon Israel meinisin ra ütä.

7 Iwe, Salomon a epini lukalapen ewe leni lükün mwen imwen ewe Samol mi Lapalap. Ikenan a eäni ekewe asoren kek me asoren mongö, pwal kirisin ekewe mönün asoren kinamwe, pokiten ewe rongen asor seni piras Salomon a föri a men kükün fän iten ekewe sokopaten asor meinisin.

8 Lon ewe fansoun Salomon me ekewe chon Israel meinisin ra föri ewe chulapen likachoch lon ükükün fisu rän. Iwe, a wor eu mwichemongun aramas, ra feito seni ewe al mi ale ngeni Hamat a nom efeng, pwal seni ewe öüwön Isip a nom ör. 9 Ina usun ra föri efinünen ewe rongen asor lon ükükün fisu rän. Nge lon awaluen rän ra föri eu mwich mi pin. 10 Iwe, lon rüe me ülüngatin ränin ewe afisuen maram Salomon a afeilai ekewe aramas ngeni lenier. Ra feila fän meseik me pwapwan leluker pokiten ekewe feiöch meinisin ewe Samol mi Lapalap a fang ngeni Tafit me Salomon, pwal ngeni nöün aramasen Israel.

11 Lupwen Salomon a wes le aüetä imwen ewe Samol mi Lapalap me ewe imwen king, o awesöchüela mine a ekiekin föri me lon imwen ewe Samol mi Lapalap, pwal me lon püsin imwan, 12 ewe Samol mi Lapalap a pwä ngeni Salomon lepwin o üreni, “Üa aüselinga om iotek o filätä ei imwenfel pwe epwe eu leni ia aramas repwe asor ngeniei ie. 13 Are üsap apüngätiu üt me läng, ika üa tinala ekewe lifichimas, pwe repwe enala irän ewe fanü, ika üa tinala mätter lein nei aramas, 14 mürin, are nei aramas repwe atekisoneer, are repwe iotek ngeniei o küttaei, are repwe pwal kul seni ar föför mi ngau, ngang üpwe aüseling seni läng, üpwe amusala ar kewe tipis o auaisefäli fanüer. 15 Üpwe mamasa ei imwenfel o aüselinga ekewe iotek mi fis lon ei leni. 16 Pun ngang üa filätä ei imw o apini pwe epwe eu leni üpwe imweimw lon tori feilfeilachök. Üpwe mamasa ei leni o tümwünü fansoun meinisin. 17 Nge en, Salomon, are kopwe angang ngeniei, usun Tafit semom we a föri, are kopwe aleasochisi meinisin mine üa allük ngonuk o apwönüetä ai kewe allük me pwüüng, 18 mürin üpwe anüküchara mwumw, usun üa fen pwon ngeni Tafit semelapom we ren ai apasa, ‘Epwe wor eman mwirimwirum iteiten fansoun, epwe nemeni Israel.’ ✡1.King 2.4

19 Nge are oupwe kul seniei o aleasolap ngeni ai kewe allük me pwüüng üa ngenikemi, are oupwe angang ngeni pwal ekoch kot o fel ngeniir, 20 mürin üpwe atokemiiwu seni ewe fanü üa ngenikemi. Nge ei imw üa apini fän itei, üpwe aturawu me fän mesei, pwe aramas repwe leaweni ren kapasen ämängau me kapasen turunufas me lein chon ekewe mwü meinisin. 21 Iwe, aramas meinisin mi pwereto lükün ei imwenfel mi fokun amwarar iei, repwe mäirü ren o ais, ‘Pwota ewe Samol mi Lapalap a föri ei sokun föför ngeni ei fanü me ei imwenfel?’ 22 Mürin, aramas repwe pälüeni, ‘Pokiten ra likitala ewe Samol mi Lapalap än ar kewe lewo we Kot mi emwenirewu seni ewe fanü Isip, ra pwal angei ekoch kot, ra fel ngeniir o angang ngeniir. Iei mine ewe Samol mi Lapalap a aworato wor ekei feiengau meinisin.’ ”