6
Efinünen ewe imwenfel
6.1–7.10
(1.King 8.12-66)
1 Mürin, ewe king Salomon a iotek, “En, Samol mi Lapalap, ka filätä pwe kopwe nonom lon rochokichin rochopwak.
2 Üa aüetä eu imwenfel mi amwarar fän itom, eu leni kopwe nom lon tori feilfeilachök.” 3 Iwe, ekewe aramasen Israel meinisin ra ütä, nge ewe king a kulu ngeniir o afeiöchüür. 4 Mürin a apasa, “Üpwe mwareiti ewe Samol mi Lapalap ewe Koten Israel mi apwönüetä mine a eäni pwon ngeni Tafit semei we, lupwen a üra, 5 ‘Seni ewe ränin üa emwenawu nei aramasen Israel seni Isip, üsap filätä eu telinimw me lein telinimwen ekewe ainangen Israel meinisin, ia eu imwenfel epwe kaütä ie pwe aramas repwe fel ngeniei ie, üsap pwal filätä eman mwän epwe samol won nei aramasen Israel. 6 Nge iei üa filätä Jerusalem pwe ina ewe leni aramas repwe fel ngeniei ie, üa pwal filätä Tafit pwe epwe nemeni nei aramasen Israel.’ 7 Iwe, a nom lon än Tafit semei we ekiek pwe epwe aüetä eu imwenfel fän iten ewe Samol mi Lapalap ewe Koten Israel. 8 Nge ewe Samol mi Lapalap a üreni Tafit, ‘A mürina pwe ka ekiekin aüetä eu imwenfel fän itei. 9 Inamwo nge en kosap aüetä ewe imwenfel. Nge noum mwän, epwe upu ngonuk, i epwe aüetä ei imwenfel fän itei.’ ✡2.Sam 7.1-13; 1.Kron 17.1-12 10 Iei ewe Samol mi Lapalap a apwönüetä an we pwon a eäni. Pun üa siwili Tafit semei we lon wisan wisen king me lon Israel, usun ewe Samol mi Lapalap a fen pwon. Iwe, üa aüetä ei imwenfel fän iten ewe Samol mi Lapalap ewe Koten Israel. 11 Ikenan üa anomu ewe pworofel, ia a nom ie ekewe ruepek fau mi chöpöp än ewe Samol mi Lapalap kapasen pwon a mak ie. Ekei kapasen pwon a eäni ngeni ekewe aramasen Israel.”
12 Mürin, Salomon a ütä mwen än ewe Samol mi Lapalap we rongen asor me fän mesen unusen ewe mwichen Israel, o aitiela pöün pwe epwe iotek. 13 Iwe, Salomon a fen föri eu lenien ütä seni piras o anomu lukalapen ewe leni lükün imwenfel, langataman me chölapan ükükün walu fiit, nge tekian ükükün limu fiit. Iwe, a ütä won, mürin a fotopwäsuketiu fän mesen unusen ewe mwichen Israel, a aitietä pöün läng 14 o iotek, “Ai Samol mi Lapalap, Koten Israel, esap wor eman Kot a wewe ngonuk lon läng ika won fanüfan. Ka apwönüetä om pwon o pwäri om tong ellet ngeni noum kewe chon angang mi föri letipom ren unusen leluker. 15 Ka apwönüetä om pwon ngeni noum chon angang Tafit semei we. Ewer, ikenai a fis meinisin mine ka apasatä. 16 Nge iei, ai Samol mi Lapalap, Koten Israel, kopwe pwal apwönüetä om pwon ngeni Tafit semei we, pun ka üreni pwe epwe wor eman mwirimwirin epwe wiseni ewe wisen king me lon Israel fansoun meinisin, are nöün kewe mwän repwe chök aleasochisi om kewe allük, usun i a föri. ✡1.King 2.4 17 Iei mine, ai Samol mi Lapalap, Koten Israel, kopwe apwönüetä om kapas ka eäni ngeni noum chon angang Tafit.
18 Nge ifa usun, en äm Kot, kopwe wesewesen tongeni imweimw ren aramas won fanüfan? Nengeni, kosap kuch lon läng, pwal lon ewe läng mi unusen tekia. Ifa usun, kopwe tongeni kuch lon ei imwenfel üa aüetä? ✡2.Kron 2.6 19 Ai Samol mi Lapalap, ai Kot, ngang noum chon angang. Kose mochen kopwe aüselinga ai iotek o apwönüetä ai tüngor üa eäni ngonuk ikenai. 20 Kopwe mamasa ei imwenfel lerän me lepwin, ewe leni ka kapas usun pwe aramas repwe fel ngonuk ie. Kopwe aüselinga ewe iotek ngang noum chon angang üpwe eäni ngonuk le sape ngeni ei leni. ✡Tut 12.11 21 Kopwe aüselinga ai me än noum aramasen Israel kewe tüngor, lupwen aia iotek ngonuk le sape ngeni ei leni. Ewer, kopwe aüseling me läng ewe ia ka nom ie, nge lupwen ka rongorong, kopwe amusala äm tipis.
22 Iwe, are eman aramas epwe atipisi chon arun o emwenala ren om ei rongen asor lon ei imwenfel, pwe epwe pwon fän akapel pwe esap tipis, 23 mürin kopwe aüseling me läng o apwüngü noum kewe chon angang. Kopwe atipisi ewe mi tipis o ukun ngeni an föför, nge kopwe pwärala pwüngün ewe chon pwüng o liwini ngeni won ükükün an pwüng.
24 Iwe, are noum aramasen Israel ra kuf ren chon oputeer pokiten ar tipis ngonuk, nge mürin ra kulsefäl ngonuk o amusamus ngonuk, are ra iotek o tüngor ngonuk me lon ei imwenfel, 25 kopwe aüselingeer me läng o amusala ar tipis. Kopwe aliwinisefäliir ngeni ewe fanü ka fen ngeniir me ar kewe lewo.
26 Iwe, are üt esap püngütiu me läng pokiten ar tipis ngonuk, nge mürin ra iotek ngonuk le sape ngeni ei leni, are ra amusamus ngonuk o kul seni ar tipis pokiten ka ariaföüür, 27 mürin kopwe aüselingeer me läng o amusala än noum kewe chon angang ekewe aramasen Israel tipis. Iwe, kopwe aiti ngeniir mine a pwüng pwe repwe föri. Mürin kopwe apüngätiu üt won fanüom, ewe fanü ka ngeni noum aramas pwe repwe fanüeni.
28 Iwe, are a fis lengita lon ewe fanü, are a wor mätter ika moi ika mesenipik ika lifichimas ika muun, are chon oputeer repwe pwelifeili eu lein ar kewe telinimw fän pisekin maun, ese lifilifil met sokun riaföü ika samau a fis, 29 kopwe aüselinga ar iotek. Iwe, are eman chök aramas ika noum aramasen Israel meinisin ra tüngor o aitiela pöür ngeni ei imwenfel, ese lifilifil met sokun iotek ika tüngor ra eäni, pun iteiten eman me eman a silei riaföün püsin lelukan, 30 mürin kopwe aüselingeer me läng ewe ia ka nom ie. Kopwe amusala ar tipis o liwini ngeni eman me eman ükükün an föför, pun en ka silei leluker, ewer, en echök ka silei leluken aramas meinisin. 31 Ren ei noum aramas repwe meninituk o aleasochis ngonuk lon fansoun ar manau lon ewe fanü ka ngeni äm kewe lewo.
32 Nge are eman chon ekis, sap i eman lein noum aramasen Israel, epwe feito seni eu fanü toau pokiten a rongorong itom mi iteföüla, pwal usun om kewe föför ka föriir ren poum mi manaman, are ewe chon ekis epwe feito o iotek ngonuk le sape ngeni ei imwenfel, 33 kopwe aüselinga me läng ewe ia ka nom ie. Iwe, kopwe mwütätä meinisin mine ewe chon ekis a tüngor ngonuk. Ren ei ekewe aramasen fanüfan meinisin repwe silei itom o meninituk, usun noum aramasen Israel ra föri, repwe pwal silei pwe ei imwenfel üa aüetä a eu leni ia aramas repwe fel ngonuk ie.
34 Iwe, are ka tinala noum aramas pwe repwe feila maun ngeni chon oputeer, ese lifilifil ia ra nom ie, are ra iotek ngonuk le sape ngeni ei telinimw ka filätä, pwal ngeni ei imwenfel üa aüetä fän itom, 35 kopwe aüselinga ar iotek me ar tüngor me läng o alisiir.
36 Are noum aramas ra tipis ngonuk, pun esap wor eman esap föri tipis, nge ka song ngeniir o mwüt ngeni chon oputeer, pwe repwe akufuur o uweerela lon fanüer mi toau ika arap, 37 nge are ra memef lon leluker o ekieksefäl me lon ewe fanü ia ra oola ie, are ra iotek ngonuk o apasa, ‘Äm aia tipis o föri föför ese pwüng me ngau,’ 38 are ra kulsefälituk ren unusen leluker me lon fanüen chon oputeer o iotek ngonuk le sape ngeni fanüer ka ngeni ar kewe lewo, are ra sape ngeni ei telinimw ka filätä, pwal ngeni ei imwenfel üa aüetä fän itom, 39 mürin kopwe aüselinga ar iotek me ar tüngor me läng ewe ia ka nom ie. Kopwe alisiir o amusala än noum aramas tipis ra föri ngonuk. 40 Ai Kot, kose mochen kopwe netiu wom iei o aü selingom ngeni ei iotek üa eäni me lon ei leni.
41 Ai Kot Samol mi Lapalap, kopwe feito iei o tolong lon ei imwenfel, pwe kopwe nonom lon tori feilfeilachök, en me ewe pworofel asisilen om manaman. Ai Kot Samol mi Lapalap, kopwe afeiöchü noum kewe souasor lon mine ra föri, nge noum kewe aramas repwe meseik pokiten om kirikiröch ngeniir. 42 Ai Kot Samol mi Lapalap, kosap likitala ewe king ka filätä. Kopwe chechemeni om tong ellet ka eäni ngeni noum we chon angang Tafit.” ✡Kölf 132.8-10