1 Iwe, lupwen ewe king Tafit a nom lon imwan, nge ewe Samol mi Lapalap a asösöü seni chon oputan meinisin mi nom ünükün, 2 ewe king a üreni ewe soufos Natan, “Nengeni, üa nom lon eu imw mi för seni ewe irä setar, nge än Kot we pworofel a chök nom lon eu imw mangaku.” 3 Iwe, Natan a üreni ewe king, “Kopwe föri meinisin mine ka ekieki lon lelukom, pun ewe Samol mi Lapalap a etuk.”

4 Nge lon ewe chök pwinin ewe Samol mi Lapalap a kapas ngeni Natan, 5 “Kopwe feila o üreni nei chon angang Tafit, pwe iei aloi ngang ewe Samol mi Lapalap: Kosap aüetä eu imwenfel fän itei pwe üpwe nom lon. 6 Pun üsap nom lon eu imwenfel seni ewe ränin üa emwenawu ekewe aramasen Israel seni Isip tori ikenai. Nge üa chök saifetal fän eu imw mangaku pwe imwei. 7 Lon ekewe leni meinisin ia üa saifetal ie me ekewe chon Israel meinisin üsamwo aisini eman lein ekewe souemwenin Israel, chokewe üa awiseer pwe repwe chon masen nei aramas, ‘Pwota ousap aüetä eu imwenfel seni irä setar fän itei?’ 8 Iei mine kopwe üreni nei chon angang Tafit, pwe iei aloi ngang ewe Samol mi Unusen Manaman: Üa angeek seni om tümwünü sip lemäl pwe kopwe samolun nei aramasen Israel. 9 Üa etuk ekis meinisin ia ka feila ie, üa pwal ärala chon oputom meinisin me mwom. Üpwe aitöchü itom usun chök iteüöchün iten ekewe meilap won fanüfan. 10 Iwe, üpwe filätä eu leni fän iten nei aramasen Israel, üpwe fotukiretiu ikenan pwe repwe nonom lon püsin lenier, nge esap wor eman epwe chüen osukosukeer. Iwe, ekewe aramasangau resap chüen ariaföüür usun ra ariaföüür me lom, 11 lon ewe fansoun üa seikätä soukapwüng won nei aramasen Israel. Iwe, üpwe tümwünuk seni chon oputom meinisin. Ngang ewe Samol mi Lapalap üa pwal asile ngonuk pwe üpwe awora mwirimwirum. 12 Iwe, lupwen ränin manauom repwe müchüla o kopwe peias ren om kewe lewo, üpwe seikätä eman noum mwän pwe epwe king, üpwe pwal anüküchara mwün. ✡Kölf 89.3-4; 132.11; Joh 7.42; Föf 2.30 13 Ätewe epwe aüetä eu imw fän itei, nge ngang üpwe anüküchara an nemenem lon mwün tori feilfeilachök. 14 Iwe, ngang üpwe saman, nge i epwe nei. Lupwen epwe föföringau, üpwe emiriti ren wokun aramas, üpwe pwal wichi usun eman sam a wichi nöün. ✡Kölf 89.26-27; 2.Kor 6.18; Ipr 1.5 15 Nge üsap angei seni ai tong ellet, usun üa angei seni Saul, ätewe üa pöütala me mwom. 16 Iwe, üpwe afisi mwirimwirum, nge mwum me om nemenem epwe nüküchar me fän mesei tori feilfeilachök.” ✡Kölf 89.36-37 17 Iwe, Natan a apworausa ngeni Tafit ükükün ekei kapas meinisin ewe Samol mi Lapalap a pwäri ngeni.

18 Mürin, ewe king Tafit a tolong lon ewe imwenfel seni mangaku, a mot fän mesen ewe Samol mi Lapalap o iotek, “Ngang iö, ai Kot Samol mi Lapalap, nge iö mwirimwiri pwe ka emwenieito tori ei aükükün? 19 Nge ei mettoch a chök kükün me reöm, ai Kot Samol mi Lapalap. Ka pwal pwon fän iten mwirimwiri ngang noum chon angang lon kan fansoun mwach. Ifa usun, iei usun pwüngün om föför ngeni aramas, ai Kot Samol mi Lapalap? 20 Pwal met ngang üpwe chüen apasa ngonuk? Pun en ka sileei ngang noum chon angang, ai Kot Samol mi Lapalap. 21 En ka föri ekei föför mi lapalap pokiten ka pwon, pwal pokiten iei mochenin letipom, pwe ngang noum chon angang üpwe silei. 22 Ka men fokun manaman, ai Kot Samol mi lapalap. Esap wor eman Kot usun en, esap pwal wor eman Kot ünükum. Iei usun mine äm aia silei. 23 Ifa usun, mi wor aramasen eu mwü won fanüfan ra wewe ngeni noum aramasen Israel? Ka amanaueer pwe repwe noum aramas. Ka alinga itom o föri föför mi lapalap o eniweniw ren om asüela chon ekewe mwü me ar kewe kot me mwen noum aramas, chokewe ka amanaueer seni Isip. ✡Tut 4.34 24 Iwe, ka filätä ekewe aramasen Israel, pwe repwe noum tori feilfeilachök. Nge en, ai Samol mi Lapalap, ka wiliti ar Kot. 25 Iei ai Samol mi Lapalap kopwe apwönüetä tori feilfeilachök ewe pwon ka eäni ngeniei ngang noum chon angang, pwal ngeni mwirimwiri, o föri usun mine ka pwonei. 26 Iwe, itom epwe fokun itetekia tori feilfeilachök. Mürin, aramas repwe apasa, ‘Ewe Samol mi Unusen Manaman i Koten Israel.’ Nge mwirimwiri ngang noum chon angang repwe nonomola me fän mesom. 27 Pun en, ai Samol mi Unusen Manaman Koten Israel, ka pwärätä ngeniei ngang noum chon angang ekei kapas o apasa pwe kopwe awora mwirimwiri, pwe repwe king. Iei popun ngang üa tongeni eäni ei iotek ngonuk. 28 Ai Kot Samol mi Lapalap, en Kot, om kapas ra let. En ka pwonei ekei mettoch mi mürina ngeniei ngang noum chon angang. 29 Iei mine kose mochen kopwe afeiöchü mwirimwiri ngang noum chon angang, pwe repwe nonomola me fän mesom tori feilfeilachök. Pun en, ai Samol mi Lapalap, ka kapas, nge mwirimwiri kewe ngang noum chon angang repwe feiöch reöm tori feilfeilachök.