2
Ngünmifel a war
2.1-13
1 Iwe, lupwen a tori ewe ränin Pentikost, ekewe chon lükü Jesus meinisin ra chufengen lon eu leni. ✡Lif 23.15-21; Tut 16.9-11 2 Iwe, a müttir fis eu ngüngü seni läng mi wewe ngeni ngüngün asepwäl mi pöchökül, a aurala unusen ewe imw ia we ra motfengen ie. 3 Mürin ra küna chön mongö usun ekkei mi parasfeil, a feitiu won eman me eman ekewe aramas mi nom ikenan. 4 Iwe, ir meinisin ra urela ren Ngünmifel o ra popuetä le kapas lon kapasen ekis usun Ngünmifel a amwelielier.
5 A wor chon Juta mi niuokusiti Kot, ra nom lon Jerusalem, ra feito seni ekewe fanü meinisin won fanüfan. 6 Lupwen ra rong ei ngüngü, eu mwichen aramas mi chomong ra chufengen. Ir meinisin ra rükö, pun eman me eman leir a rong än ekewe chon lükü kapas lon en me kapasen fanüan. 7 Ra fokun mairü o weitifengeniir o ra apasa, “Ifa usun, ekei mwän meinisin mi kapas lon ekei sokun kapas, esap ir re Kalilea? 8 Nge pwota chök pwe oukich meinisin sia rongorong ar kapas lon en me kapasen fanüach kewe sia uputiu lon? 9 Sia feito seni Partia, Metia me Elam, seni Mesopotamia, Jutea me Kapatosia, seni Pontus me Asia, 10 seni Frikia me Pamfilia, seni Isip me ekewe fanü lon Lipia arap ngeni Kirene. Ekoch me leich sia feito seni Rom, 11 kich chon Juta me chon lükün Israel mi etiwa ewe lamalamen chon Juta. Ekoch me leich sia pwal feito seni Kreta me Arapia, nge oukich meinisin sia rongorong ar kapas lon kapasen fanüach kewe usun ekewe mettoch mi amwarar Kot a föri.” 12 Pokiten ar mairü me osukosuk ra aisfengen lefiler, “Epwe met wewen ei sokun lapalap?” 13 Nge ekoch aramas ra takiri ekewe chon lükü Jesus o apasa, “Ekei aramas ra pulas.”
Än Petrus afalafal
2.14-42
14 Mürin Petrus a ütä fiti ekewe engol me eman soukünö o a popuetä le kapas leüömong ngeni ewe mwichen aramas, “Ämi pwii kana chon Juta me ämi meinisin mi imweimw lon Jerusalem, oupwe aüselingaei o mwüt ngeniei ai üpwe awewe ngenikemi wewen ei lapalap. 15 Ekei aramas resap pulas usun oua ekieki. Ekärän chök kulok tiu lesosor. 16 Nge iei usun met ewe soufos Sowel a kapas usun:
17 ‘Kot a apasa: Iei usun met üpwe föri lon ekewe ränin sopolan.
Ngang üpwe tinato Ngüni won aramas meinisin.
Nöümi mwän me fefin repwe osuni,
nöümi alüal epwe wor künaer,
ekewe chinlap mwän me leimi repwe soutatan.
18 Pwal mwo nge nei chon angang mwän me fefin
üpwe tinatiu Ngüni wor lon ekana rän, pwe repwe arongafeili ai kewe kapas.
19 Üpwe awarato manaman seni läng
o föri asisil won fanüfan.
Epwe wor cha me ekkei me kuchu mi ötüöt usun ötüötün ekkei.
20 Akkar epwe rochola, nge maram epwe wiliti cha,
mwen epwe war ränin ewe Samol, ewe rän mi lap o ling.
21 Nge iö epwe köri iten ewe Samol epwe manau.’ ✡Sow 2.28-32
22 “Ämi aramasen Israel, oupwe rong ekei kapas: Jesus seni Nasaret, eman aramas mi wor an pwüüng me ren Kot, usun a pwä ngenikemi ren ekewe tufich me manaman me asisil Kot a föri ren Jesus. Oua püsin silei usun ei, pun ra fis ikei lefilemi. 23 Püsin än Kot akot ei a fen apwüngala, pwe Jesus epwe oolong lepöümi, nge ämi oua niela ren ämi mwüt ngeni ekewe aramas mi tipis pwe repwe iräpengesi. ✡Mat 27.35; Mark 15.24; Luk 23.33; Joh 19.18 24 Nge Kot a amanauasefäli seni mäla. A angasala i seni manamanen mäla, pun esap tufich pwe mäla epwe amwöchü i. ✡Mat 28.5-6; Mark 16.6; Luk 24.5 25 Pun Tafit a kapas usun,
‘Üa küna ewe Samol, a nom mwen mesei fansoun meinisin.
A arap ngeniei, pwe üsap osukosuk.
26 Iei mine letipei a fokun mwanek,
ai kewe kapas ra uren pwapwa.
Inamwo ika ngang eman aramas epwe mäla,
üpwe chök kinamwe lon ai apilükülüköch.
27 Pun en kosap likitieila lon lenien ekewe mi mäla,
kosap pwal mwüt ngeni Noumw we mi Pin epwe mach inisin lon peiasan.
28 En ka aiti ngeniei ewe alen manau.
Om nonom rei a afisätä ai pwapwa mi lapalap.’ ✡Kölf 16.8-11
29 “Ämi pwii kana, üpwe kapas ngenikemi o afataöchü usun ach we lewo mi iteföüla King Tafit. A mäla o peias, nge peiasan a chüen nonom rech ikei tori ikenai. 30 I eman soufos a silei met Kot a eäni pwon ngeni: Kot a pwon fän akapel pwe epwe awora eman mwirimwirin Tafit pwe epwe king, usun chök Tafit. ✡Kölf 132.11; 2.Sam 7.12-13 31 Tafit a küna met Kot epwe föri lon ekewe fansoun repwe feito, iei mine a kapas usun manausefälin ewe Kraist lupwen a apasa,
‘Esap likilik lon lenien ekewe mi mäla,
inisin esap mach lon peiasan.’ 32 Iwe, Kot a amanauasefäli ätei Jesus seni mäla, nge äm meinisin aia chon pwärätä pwe a wesewesen fis ei. 33 Jesus a tekiatä o nom lepelifichin Kot Saman we, a angei seni Kot ewe Ngünmifel, usun a fen pwon ngeni. Iwe, met oua küna iei o rongorong, iei an we lifang a tinatiu woch. 34 Pun Tafit esap püsin feitä läng, nge a apasa,
‘Ewe Samol a kapas ngeni ai Samol:
Kopwe mottiu lepelifichi,
35 tori üpwe anomu chon oputom
pwe repwe lenien puun pecheöm.’ ✡Kölf 110.1 36 Iei mine ekewe chon Israel meinisin repwe fokun silei, pwe ätei Jesus ämi oua iräpengesi, i ätewe Kot a seikätä pwe epwe Samol me Kraist!”
37 Lupwen ekewe aramas ra rongorong ekei kapas, a el letiper o ra aisini Petrus me ekewe ekoch soukünö, “Ämi pwiich kana, met äm aipwe föri.” 38 Petrus a pölüeniir, “Ämi meinisin oupwe aier seni ämi tipis kana o papatais ngeni iten Jesus Kraist, pwe ämi tipis kana repwe musala. Iwe, oupwe angei an Kot we lifang, ewe Ngünmifel. 39 Pun iei met Kot a fen pwon ngenikemi me nöümi kana pwal ngeni chokewe meinisin mi toau, ir meinisin ewe Samol ach we Kot a püsin körireto ren.” 40 Petrus a fönöü ir ren chomong kapas, a pese ngeniir o apasa, “Oupwe amanauakemi seni ewe feiengau epwe tori ei täppin aramas mi ngau!” 41 Iwe, chomong me leir ra lükü an afalafal o ra papatais. Lon ewe rän ina epwe ükükün ülüngat ngeröü aramas ra pach ngeni ewe mwichen chon lükü Jesus. 42 Ra likitü le kaiö seni mine ekewe soukünö ra aiti ngeniir, ra likitü lon ar chiechifengen o mongöfengen ewe mongön ach Samol me ikiotekfengen.
Usun än ekewe chon lükülük nonomfengen
2.43-47
43 Iwe, chomong asisil me manaman ra fis ren ekewe soukünö, o ekewe aramas ra fokun mairü ren. 44 Ekewe chon lükülük meinisin ra chök sopwela lon ar chiechifengen o alilisfengen lefiler won pisekir. ✡Föf 4.32-35 45 Ra amömöla fanüer me pisekir o ra ineti lefiler ewe moni ra angei won ükükün met eman me eman a osupwang ren. 46 Iteiten rän ra tipeeufengen le mwichfengen lon ewe imwenfel, ra mongöfengen lon imwer fän pwapwa me tipetekison. 47 Ra mwareiti Kot, ra pwal küna chen me ren ekewe aramas meinisin. Iwe, iteiten rän ewe Samol a apacha ngeni ar we mwich aramas mi küna manau.