1 Lon eu rän Petrus me Johannes ra feila ren ewe imwenfel lon fansoun iotek kulok ülüngat leolopal. 2 Iwe, eman mwän mi pechemä seni leuputiuan a mot ünükün ewe asamen imwenfel mi iteni “Asamalap mi echipwör”. Iteiten rän aramas ra uweeto i ünükün ei asamalap pwe epwe tütüngor moni seni ekewe aramas mi tolong lon ewe imwenfel. 3 Lupwen ätei a küna pwe Petrus me Johannes repwe le tolong lon ewe imwenfel, a tüngor rer pwe repwe ngeni och. 4 Iwe, ra newenewen ngeni, nge Petrus a üra, “Kopwe nenengenikem!” 5 Iei mine ei mwän a nenengeniir, pun a ekieki pwe epwe angei och seniir. 6 Nge Petrus a üreni, “Esap wor moni rei, nge mine a wor rei üpwe ngonuk: Fän iten Jesus Kraist seni Nasaret üpwe ürenuk kopwe ütä o fetal!” 7 Mürin Petrus a amwöchü pöüifichin ewe mwän o aütai. Iwe, lon ewe chök otun pechen me lekupukupun pechen ra pöchökületä. 8 Iwe, a mwetetä, a ütä won pechen o popuetä le fetal. Mürin a eti Petrus me Johannes le tolong lon ewe imwenfel, a fetal, a mwetemwet o mwareiti Kot. 9 Iwe, unusen ewe mwichen aramas ra küna an fetal o mwareiti Kot. 10 Nge lupwen ra asilla pwe i ewe chon tütüngor mi momot ünükün ewe imwenfel ren ewe Asamalap mi echipwör, ir meinisin ra mairü o weitifengeniir ren mine a fis ngeni.

11 Lupwen ewe mwän a chök fitipacheiti Petrus me Johannes lon ewe leni itan “Pwalangen Salomon”, ekewe aramas meinisin ra mairü o ra säto rer. 12 Iwe, lupwen Petrus a küna ekewe aramas, a üreniir, “Ämi aramasen Israel, pwota oua fokun mairü ren mine a fis, pwota oua nefotofot ngenikem? Oua ekieki pwe ren äm manaman me äm soulängöch aia tongeni apöchökülätä ei mwän pwe a tongeni fetal? 13 Än Apraham, Isaak me Jakop we Kot, än ach kewe lewo we Kot a alingala nöün Chon Angang Jesus. Nge ämi oua atolonga lepöün ekewe souemwenin chon Juta o amamäsini i me mwen Pilatus, oua fen mwo nge föri ei, lupwen Pilatus a ekiekin angasala i. ✡Eks 3.15 14 Jesus a pin o pwüng, nge ämi oua amamäsini i o tüngor ngeni Pilatus pwe epwe angasa ngenikemi ewe chon niela aramas. ✡Mat 27.15-23; Mark 15.6-14; Luk 23.13-23; Joh 19.12-15 15 Ämi oua niela ätewe mi emweni aramas ngeni manau. Nge Kot a amanauasefäli seni mäla o äm aia chon pwärätä pwe a fis ei. 16 Ren manamanen iten Jesus ei mwän mi pechemä a pöchökületä. Met oua küna o silei a fis pokiten äm aia lükü itan. Ren äm lükü Jesus a fis pwe ei mwän a wesewesen pöchökületä usun ämi meinisin oua küna.

17 “Ämi pwii kana, iei üa silei pwe met ämi me nöümi souemwen oua föri ngeni Jesus, oua föri pokiten ämi silemang. 18 Nge iei usun Kot a apwönüetä met a fen apasa me lomlom ren ekewe soufos meinisin, lupwen a apasa pwe nöün we Kraist epwe küna riaföü. 19 Oupwe ekieksefäl o kul ngeni Kot, pwe ämi tipis epwe mola, 20 pwe Kot epwe awora ngenikemi eu fansoun ngünümi epwe küna pöchökül. Epwe tinato Jesus, i ewe Kraist, Kot a fen filätä fän itemi. 21 Jesus epwe chök nom lon läng tori epwe war ewe fansoun pwe ekewe mettoch meinisin repwe försefäl, usun Kot a fen apasa me lomlom ren nöün kewe soufos mi pin. 22 Pun Moses a apasa, ‘Ewe Samol ämi we Kot epwe tinato eman soufos usun chök ngang, i eman seni püsin aramasemi. Oupwe fokun aleasochisi meinisin mine a ürenikemi pwe oupwe föri. ✡Tut 18.15,18 23 Nge eman esap aleasochis ngeni ena soufos epwe käriwu seni aramasan.’ ✡Tut 18.19 24 Iwe, ekewe soufos, pwal Samuel me chokewe mi tapw me mürin, ir meinisin mi afalafal, ra fen kapas usun met epwe fis lon ekei rän. 25 Än Kot kewe pwon nöün kewe soufos ra aronga ra fän itemi, nge ämi oua pachelong lon ewe pwon, Kot a föri ngeni ämi kewe lewo, usun Kot a kapas ngeni Apraham, ‘Üpwe afeiöchü aramasen fanüfan meinisin ren mwirimwirum.’ ✡Ken 22.18 26 Iei usun Kot a filätä nöün Chon Angang o tinato akom remi, pwe epwe afeiöchükemi ren an alisikemi pwe ämi meinisin oupwe kul seni ämi föför mi ngau.”