1 Iwe, Tafit a amwichafengeni ekewe meilapen Israel meinisin me lon Jerusalem, meilapen ekewe ainang, meilapen ekewe mwich mi angang ngeni ewe king, ekewe sounemenem won ngeröü me pükü, ekewe nöüwis mi souwani wöün ewe king me chon tümwünü ekewe pwiin man nöün ewe king me nöün kewe mwän. A pwal amwichafengeni ekewe nöüwis mi wisen tümwünü ewe imwen king, ekewe mwän mi pwora me ekewe sounfiu mi sip le maun. 2 Mürin, ewe king Tafit a ütä mwer o üreniir, “Oupwe aüselingaei, pwii kana me nei aramas. Üa fen ekieki lon lelukei, pwe üpwe aüetä eu imw fän iten än ewe Samol mi Lapalap pworofel, fän iten lenien puun pechen ach we Kot. Iwe, üa amolätä pisek fän iten kaütän eu imwenfel. 3 Nge Kot a üreniei, ‘En kosap aüetä eu imw fän itei, pun en eman soumaun ka asükü chan aramas.’ 4 Nge ewe Samol mi Lapalap ewe Koten Israel a filieitä seni me lein chon leimwen semei, pwe ngang me mwirimwiri kana repwe king lon Israel tori feilfeilachök. Pun a filätä ewe ainangen Juta pwe epwe awora eman souemwen, nge lon ewe ainangen Juta a filätä chon leimwen semei, nge me lein nöün semei kewe mwän a tipeniei o seikieitä, pwe üpwe king lon unusen Israel. 5 Iwe, ewe Samol mi Lapalap a fang ngeniei chomong nei mwän. Nge me lein nei kewe mwän meinisin a filätä Salomon, pwe epwe nemeni Israel, mwün ewe Samol mi Lapalap. 6 Iwe, a üreniei, ‘Salomon noum we mwän i epwe aüetä imwei pwal ai kewe leni ünükün, pun üa filätä i pwe epwe nei, nge ngang üpwe saman. 7 Üpwe anüküchara mwün tori feilfeilachök, are epwe achocho le sopwela le aleasochisi ai kewe allük me pwüüng, usun a föri ikenai.’ ✡2.Sam 7.1-16; 1.Kron 17.1-14 8 Iei mine nei aramas, üa fönöökemi me mwen ekei chon Israel meinisin nöün ewe Samol mi Lapalap mwichen aramas, pwal fän mesen ach we Kot, pwe oupwe fokun apwönüetä ekewe allük meinisin än ewe Samol mi Lapalap ach we Kot, pwe oupwe fanüeni ei fanü mi mürina, oupwe pwal ngeni nöümi pwe fanüer tori feilfeilachök.

9 Nge en Salomon nei mwän, kopwe lükü än semom we Kot, kopwe pwal angang ngeni ren unusen lelukom me mochenin letipom. Pun ewe Samol mi Lapalap a etittina letip meinisin o weweiti iteiten akot me ekiek. Are ka kul ngeni Kot, i epwe etiwok, nge are ka likitala i, i epwe pöütukela tori feilfeilachök. 10 Kopwe anomu lon om ekiek pwe ewe Samol mi Lapalap a filuketä, pwe kopwe aüetä imwan mi pin. Kopwe apöchökülok o föri ewe angang.”

11 Mürin, Tafit a ngeni Salomon liosun ewe imwenfel me kengkangan, liosun ekewe imw me ekewe lenien iseis pisek mi aüchea, liosun ekewe rumwen won me ekewe rumwen lon, pwal liosun ewe rum mi unusen pin, ia a fis ie asoren amusamusen tipis. 12 A pwal ngeni liosun ekewe mettoch meinisin a ekiekietä fän iten ekewe leni lükün imwen ewe Samol mi Lapalap, ekewe rum meinisin mi nom pwelin ünükün, ekewe lenien iseis pisek mi aüchea fän iten ewe imwenfel, pwal ekewe lenien iseis ekewe lifang mi pin. 13 Iwe, Tafit a pwal ngeni Salomon akoten ekewe mwichen souasor me chon ewe ainangen Lefi me tettelin ar angang ra wisen föri, pwal usun ar repwe tümwünü ekewe pisek ra aea le angang lon imwen ewe Samol mi Lapalap. 14 A apwüngala ükükün choun ewe kolt me silifer repwe aea le föri ekewe pisek fän iten eu me eu kewe sokopaten angang, 15 ükükün choun ewe kolt fän iten ekewe lenien atittin me ekewe lamp won, pwal ükükün choun ewe silifer fän iten ekewe lenien atittin me ekewe lamp won, aükük ngeni met repwe aea won eu me eu kewe lenien atittin. 16 Tafit a pwal apwüngala ükükün choun ewe kolt fän iten eu me eu kewe chepel fän iten ewe pilawa mi pin, pwal choun ewe silifer fän iten ekewe chepel seni silifer, 17 ükükün choun ewe kolt mi mürina fän iten ekewe fook, ekewe sepi me ekewe kap, pwal ükükün choun eu me eu kewe kükün sepi seni kolt me silifer 18 me choun ewe kolt mi mürina fän iten ewe rongen asoren ötüöt. A pwal ngeni Salomon liosun ewe woken, iei uluulun ekewe kerop seni kolt mi meresila pöükässir o pwölüela än ewe Samol mi Lapalap pworofel. 19 Iwe, Tafit a üra, “Ekei lapalap mi nom lon ewe akot a mak fän aitien ewe Samol mi Lapalap ngeniei, pwe üpwe apwönüetä.”

20 Mürin, Tafit a üreni Salomon nöün we, “Kopwe pöchökül o tipepwora, pwe kopwe föri ei angang. Kosap niuokus, kosap pwal tipemwaramwar, pun Kot ewe Samol mi Lapalap ai we Kot epwe etuk. I esap tümwününgau ngonuk, esap pwal likituk tori angangen imwan imwenfel epwe wes. 21 Ikkei ekewe mwichen souasor me ekewe mwän seni ewe ainangen Lefi ra molotä ar repwe föri angangen lon ewe imwenfel. A pwal wor reöm mwän mi sipeöch lon sokopaten angang, repwe alisuk lon ewe angang ren mochenin letiper. Pwal ekewe meilap me ekewe aramas meinisin ra nom fän nemeniom.”