1 Iwe, Hiskia a tinala chon künö ren ekewe chon Israel me Juta meinisin, a pwal makela toropwe ngeni ekewe chon Efraim me Manasa, pwe repwe feito ren ewe imwenfel lon Jerusalem o föri ewe Pasofer ngeni ewe Samol mi Lapalap, ewe Koten Israel. 2 Ewe king me nöün kewe nöüwis, pwal ekewe aramasen Jerusalem meinisin ra tipeeufengen, pwe repwe föri ewe Pasofer lon ewe aruuen maram. 3 Pun resap tongeni föri ewe Pasofer lon ewe fansoun mi afat, pokiten ekewe souasor resap mwo püsin apiniir pwe epwe naf iteiter, pwal ekewe aramas resamwo chufengen lon Jerusalem. ✡Num 9.9-11 4 Iwe, ei akot a pwüng me ren ewe king me ekewe aramas meinisin. 5 Iei mine ra tipeeufengen pwe repwe asilefeili lemenen Israel meinisin seni Persepa mi nom ör tori Tan mi nom efeng, pwe ekewe aramas repwe feito Jerusalem o föri ewe Pasofer ngeni ewe Samol mi Lapalap ewe Koten Israel. Pun me mwan esap wor eu mwichemongun aramas mi föri ewe Pasofer usun pwüngün akotun. 6 Fän än ewe king allük ekewe chon künö ra feila lemenen unusen Israel me Juta fän ekewe toropwe seni ewe king me nöün kewe nöüwis. Iei masouen ekewe toropwe, “Ämi aramasen Israel mi chüen manau o sü seni fän nemenien ewe kingen Asiria, oupwe kul ngeni ewe Samol mi Lapalap än Apraham, Isaak me Jakop we Kot, pwe i epwe kulsefäl ngeni ämi. 7 Ousap föri usun mine ämi kewe lewo me pwimi ekewe chon Israel ra föri. Ir resap allükülük ngeni ewe Samol mi Lapalap ar we Kot. Iei mine a atolongeer lon feiengau, usun oua küna ikenai. 8 Iei ousap tipeförea usun ämi kewe lewo, nge oupwe aleasochis ngeni ewe Samol mi Lapalap o feito ren imwan mi pin, i a apini tori feilfeilachök. Oupwe angang ngeni ewe Samol mi Lapalap ämi we Kot, pwe esap chüen song ngenikemi. 9 Pun are oua liwinsefäl ngeni ewe Samol mi Lapalap, mürin chokewe mi liapeni pwimi me nöümi kana repwe eäni tong ngeniir o mwüt ngeniir pwe repwe liwiniti ei fanü. Pun ewe Samol mi Lapalap a kirikiröch o ümöümöch, epwe etiwakemi ika oua liwinsefäl ngeni.”

10 Iei mine ekewe chon künö ra feila ngeni ekewe telinimw meinisin lemenen fanüen chon ekewe ainangen Efraim me Manasa, pwal tori chon ewe ainangen Sepulon. Nge ir ra takirin ämängaueer o turunufaseer. 11 Mi wor chök ekoch mwän seni ekewe ainangen Aser, Manasa me Sepulon ra atekisoneer o feito Jerusalem. 12 Nge Kot a pwal angang lon letipen chon Juta, pwe ra tipeeufengen o aleasochisi mine ewe king me ekewe nöüwis ra eäni allük fän alon ewe Samol mi Lapalap.

13 Iwe, lon ewe aruuen maram eu mwichemongun aramas ra mwichefengen lon Jerusalem, pwe repwe föri ewe chulapen mongö pilawa esap wor iis lon. 14 Ra atowu ekewe rongen asor mi nom lon Jerusalem, pwal ekewe rongen asoren ötüöt meinisin, o pöütirela lon ewe lemolun Kitron. 15 Iwe, lon engol me rüanün ränin ewe aruuen maram ra niela ewe lamen Pasofer. Nge ekewe souasor me ekewe mwän seni ewe ainangen Lefi resamwo apiniir ra fokun säw, iei mine ra püsin apiniir. Mürin, ra uwato ekewe asoren kek lon imwen ewe Samol mi Lapalap. 16 Ra ütä lon akawesewesen lenier, usun Moses ewe aramasen Kot a fen allük. Iwe, ekewe souasor ra angei chan ekewe mönün asor seni lepöün ekewe mwän seni ewe ainangen Lefi o äsupu ngeni ewe rongen asor. 17 Mi wor chomong aramas me lon ewe mwich resamwo alimöchüür, iei popun resap tongeni niela ar we lamen Pasofer. Iei mine ekewe mwän seni ewe ainangen Lefi ra wisen niela ekewe lamen Pasofer fän iter o apiniir fän iten ewe Samol mi Lapalap. 18 Pun eu mwichemongun aramas, chomong me leir ra feito seni ekewe ainangen Efraim, Manasa, Isakar me Sepulon resamwo püsin alimöchüür, nge ra mongö ewe mongön Pasofer lükün pwüngün akotun. Nge Hiskia a iotek fän iter o apasa, “Ai Samol mi Lapalap, en äm kewe lewo we Kot mi eäni kirikiröch, kopwe amusala tipisin ekei aramas 19 mi fel ngonuk ren unusen leluker, inamwo ika resap limöch, pun resap föri pwüngün allükün lon ewe leni mi pin.” 20 Iwe, ewe Samol mi Lapalap a rongorong än Hiskia iotek, a amusala än ekewe aramas tipis, nge esap afeiengaueer. 21 Ekewe aramasen Israel mi nom lon Jerusalem ra föri ewe chulapen mongö pilawa esap wor iis lon fän pwapwa mi lapalap lon ükükün fisu rän. Nge ekewe mwän seni ewe ainangen Lefi me ekewe souasor ra mwareiti ewe Samol mi Lapalap iteiten rän o köl ngeni fän pisekin ettik mi tikimong. 22 Iwe, Hiskia a apöchöküla leluken ekewe mwän seni ewe ainangen Lefi mi sipeöch le angang ngeni ewe Samol mi Lapalap. Ekewe aramas ra mongö wiser mongö lon ükükün fisu rän seni ekewe asoren kinamwe ra eäni asor, ra pwal kilisou ngeni ewe Samol mi Lapalap än ar kewe lewo we Kot.

23 Mürin, unusen ewe mwichen aramas ra tipeeufengen pwe repwe föri ewe chulap pwal lon ükükün fisu rän. Iei mine ra föri ewe chulap fän pwapwa pwal lon ükükün fisu rän. 24 Iwe, Hiskia ewe kingen Juta a ngeni ewe mwichen aramas ükükün engeröü ätemwänin kow me fisungeröü sip pwe ochar, nge ekewe nöüwis ra ngeniir ükükün engeröü ätemwänin kow me engol ngeröü sip. Iwe, chomong souasor ra püsin apiniir. 25 Iei usun ekewe aramasen Juta ra meseik, pwal ekewe souasor me ekewe mwän seni ewe ainangen Lefi, ekewe aramas mi feito seni Israel me ekewe chon ekis mi nonom lon Israel me Juta. 26 Iwe, a wor pwapwa watte lon Jerusalem, pun seni ewe fansoun mwün Salomon nöün Tafit ewe kingen Israel we mwän esamwo fis och usun ei lon Jerusalem. 27 Mürin, ekewe souasor me ekewe mwän seni ewe ainangen Lefi ra ütä o afeiöchü ekewe aramas. Iwe, Kot a aüselinga ar iotek me lon lenian mi pin lon läng o etiwa.