1 Iwe, wesin ar we chulap ekewe chon Israel mi eti ra feila lon ekewe telinimwen Juta, ra atatakisi ekewe ür o pöküetiu ekewe uluulun ewe anüfefin Asera. Ra pwal ataetiu ekewe rongen asor me ekewe lenien fel won ekewe leni tekia lemenen Juta me Peniamin meinisin, pwal lon Efraim me Manasa. Mürin ar atarala meinisin ekewe aramasen Israel meinisin ra liwiniti en me an telinimw lon en me fanüan.

2 Iwe, Hiskia a awisa ekewe souasor me ekewe mwän seni ewe ainangen Lefi lon ar kewe mwich, eu me eu mwich lon tettelin en me an angang, usun akoten wiser. Repwe eäni ekewe asoren kek me asoren kinamwe o angang lon imwen ewe Samol mi Lapalap, repwe pwal kilisou ngeni o kölün mwareiti i. 3 Iwe, ewe king a fangala mönün asor seni nöün pwiin man fän iten ekewe asoren kek mi fifis iteiten lesosor me lekuniol, ekewe asoren kek mi fis lon ekewe ränin sapat, lepopun maram, pwal lupwen ekewe ränin chulap mi kefilitä, usun a fen mak lon än ewe Samol mi Lapalap puken allük. ✡Num 28.1–29.39 4 Hiskia a pwal allük ngeni ekewe aramas mi imweimw lon Jerusalem, pwe repwe uwala ekewe asor ngeni ekewe souasor me ekewe mwän seni ewe ainangen Lefi, pun iei wiser, pwe ir repwe tongeni fangala fansoun manauer ngeni ewe angang, ewe Samol mi Lapalap a fen allük usun. 5 Lon ewe otun ewe allük a chöfetal, ekewe aramasen Israel ra fangala fokun chomong mwen uän wiich, wain, apüra seni föün olif, chönün chunen me sokopaten uän irän lemäl meinisin. Ra pwal uwato eu leengolun mettochur meinisin. ✡Num 18.12–19.21 6 Iwe, ekewe aramasen Israel me Juta mi imweimw lon ekewe telinimwen Juta ra pwal uwato eu leengolun nöür kewe pwiin kow me sip, pwal ekewe mettoch ra apini fän iten ewe Samol mi Lapalap ar we Kot. Iwe, ra uwato ekei mettoch o achukuchukuretä. 7 Lon ewe aülüngatin maram ra popuetä le uwato ekewe mettoch ra apini o achukuchukuretä, nge lon ewe afisuen maram ra awesala. 8 Lupwen Hiskia me nöün kewe nöüwis ra küna ekewe mettoch mi chukuchukutä, ra mwareiti ewe Samol mi Lapalap me nöün kewe aramasen Israel. 9 Iwe, Hiskia a kapas ais ngeni ekewe souasor me ekewe mwän seni ewe ainangen Lefi fän iten ekewe mettoch mi chukuchukutä. 10 Nge ewe souasor mi lap Asaria, eman mwirimwirin Satok, a pälüeni, “Seni ewe fansoun ekewe aramas ra popuetä le uwato ekewe lifang lon imwen ewe Samol mi Lapalap, äm aia mongö o mötüla, a pwal wor chomong lusun. Pun ewe Samol mi Lapalap a afeiöchü nöün aramas, pwe a wor ei lusun mi watte a chüen nom rem.”

11 Mürin, Hiskia a allük, pwe repwe amolätä ekoch rum me lon imwen ewe Samol mi Lapalap. Iwe, ra amoleretä. 12 Mürin, ekewe aramas ra uwato fän allükülük ekewe lifang, ekewe leengol me ekewe mettoch ra apini. Iwe, Konania, eman mwän seni ewe ainangen Lefi, i ewe meilapen chon tümwünü ekei mettoch, nge kisin fan pwin we itan Simei. 13 Iwe, Jehiel, Asasia, Nahat, Asael, Jerimot, Josapat, Eliel, Ismakia, Mahat me Penaia ra wisen angang fän Konania me Simei pwin we. Ir meinisin ra kefilitä seni ewe king Hiskia me ewe souasor mi lap Asaria. 14 Nge Kore nöün Imna we mwän seni ewe ainangen Lefi mi mamasa ewe asamalap mi nom ötiu, a wisen tümwünü ekewe asor aramas ra uwato ngeni Kot seni mochenin letiper, a pwal wisen ineti ekewe lifang ra uwato ngeni ewe Samol mi Lapalap me ekewe asor mi unusen pin. 15 Iwe, Eten, Miniamin, Jesua, Semaia, Amaria me Sekania ra alisi fän allükülük me lon ekewe telinimwen souasor. Ra aineti ekewe lifang mi pin ngeni chiener kewe lon en me an mwich, nge inetin ekewe chinlap a usun chök inetin ekewe alüal. 16 Ra pwal ineti ngeni ätekewe mi ierini ülüngat feitä mi makelong iter lon tettelin uruwor. Ra ineti ngeni meinisin mi tolong lon imwen ewe Samol mi Lapalap, lupwen ra föri ar angang lon en me wisan, pwal lon en me an mwich. 17 Iwe, ra pwal aineti ngeni ekewe souasor mi makelong iteiter lon tettelin uruwon ar kewe cho. Pwal ina usun chon ewe ainangen Lefi mi ierini rüe feitä a makelong iteiter lon tettelin wiser lon en me an mwich. 18 Ir meinisin a makelong iter lon ewe iteit fiti nöür semirit, pwülüer, nöür mwän me nöür fefin, pun ra allükülük lon wiser o püsin apiniir. 19 Nge me lein ekewe souasor ir mwirimwirin Aaron mi nom lon ar kewe telinimw ika lon ekewe fanü ünükür a wor mwän mi mak iter, ra wisen ineti ewe mongö ngeni iteiten eman me eman ekewe souasor, pwal ngeni iteiten eman me eman chon ewe ainangen Lefi mi makelong lon ewe iteit.

20 Iei usun mine Hiskia a föri lon unusen ewe fanü Juta. A föri mine a mürina o pwüng o allükülük me fän mesen ewe Samol mi Lapalap an we Kot. 21 Iwe, Hiskia a fefeitä, pun meinisin mine a föri lon an angang ngeni ewe imwenfel, pwal lon an aleasochis ngeni pwüngün ekewe allük me an kütta öüröüran me ren an we Kot, a föri seni unusen lelukan.