1 “Iwe, ikkei ekewe allük me pwüüng ewe Samol mi Lapalap ämi we Kot a allük ngeniei, pwe üpwe aiti ngenikemi pwe oupwe apwönüeretä me lon ewe fanü oupwe sailong lon pwe oupwe fanüeni. 2 Iei mine ämi me mwirimwirimi kana oupwe meniniti ewe Samol mi Lapalap ämi we Kot lon ränin manauemi meinisin ren ämi aleasochisi an kewe pwüüng me allük meinisin üa ngenikemi, pwe ränin manauemi repwe chomongola. 3 Iei mine ämi chon Israel oupwe aüseling ngeni ekewe allük o tümwünüöchü le apwönüretä, pwe oupwe feiöch o fokun chomongola, oupwe pwal nonomola lon ewe fanü mi pwülüöch o fanüeräs, usun ewe Samol mi Lapalap än ämi kewe lewo we Kot a pwon ngenikemi.

4 Kopwe aüseling Israel: Ewe Samol mi Lapalap ach Kot i chök ewe Samol mi Lapalap. ✡Mark 12.29 5 Kopwe echeni ewe Samol mi Lapalap om Kot ren unusen lelukom, ren unusen ngünum, pwal ren unusen tufichum. ✡Mat 22.37; Mark 12.30; Luk 10.27 6 Ekei kapas üa allük ngonuk ikenai repwe nom lon lelukom. 7 Iwe, kopwe achocho le aiti ngeni noum kewe ekei kapas, kopwe pwal fos usur lupwen kopwe mot lon imwom pwal lupwen kopwe fetal won al, lupwen kopwe konola pwal lupwen kopwe pwätä. 8 Kopwe fötiretä won poum pwe eu pisekin achem, kopwe pwal fötiretä won chamwom. 9 Iwe, kopwe makeretä won penkasamen imwom pwal won asamalapen om telinimw.” ✡Tut 11.18-20

10 “Iwe, ewe Samol mi Lapalap ämi we Kot epwe emwenikemiila lon ewe fanü a fen pwon fän akapel ngeni ämi kewe lewo Apraham, Isaak me Jakop pwe epwe ngenikemi, eu fanü mi wor telinimw watte o mürina, nge sap aüemi, ✡Ken 12.7; Ken 26.3; Ken 28.13 11 epwe pwal wor imw mi ur ren chomong mettoch mi mürina, nge sap ämi oua amasoueer, epwe pwal wor chönüttu, nge sap tuemi, pwal tanipin wain me iriän olif, nge sap fotukiemi. Iwe, lupwen oupwe mongö o möt, 12 oupwe afälikemi pwe ousap manlükala ewe Samol mi Lapalap mi emwenikemiiwu seni ewe fanü Isip, ewe ia ra nöünikemi amanau ie. 13 Oupwe meniniti ewe Samol mi Lapalap ämi we Kot. Oupwe fel ngeni i chök o eäni itan le pwon fän akapel. ✡Mat 4.10; Luk 4.8 14 Ousap fel ngeni pwal ekoch kot, ekewe kot än ekewe aramas mi nom arumi. 15 Are oupwe föri iei usun, ewe Samol mi Lapalap ämi we Kot mi nom lefilemi epwe song ngenikemi o arosakemiila seni won fanüfan, pun ewe Samol mi Lapalap eman Kot mi lukomong.

16 Iwe, ousap sotuni ewe Samol mi Lapalap ämi we Kot, usun oua fen sotuni me lon Masa. ✡Mat 4.7; Luk 4.12; Eks 17.1-7 17 Oupwe fokun aleasochisi ekewe allük me pwüüng än ewe Samol mi Lapalap ämi we Kot, usun mine a allük ngenikemi. 18 Oupwe föri mine a pwüng o mürina me fän mesen ewe Samol mi Lapalap pwe oupwe feiöch. Oupwe pwal tolong o fanüeni ewe fanü mi mürina ewe Samol mi Lapalap a fen pwon fän akapel pwe epwe ngeni ämi kewe lewo. 19 Oupwe pwal tongeni asüela chon oputemi, usun ewe Samol mi Lapalap a pwon ngenikemi.

20 Iwe, are nöümi repwe aisinikemi lon kan fansoun mwach, ‘Met wewen ekewe allük me pwüüng ewe Samol mi Lapalap ach we Kot a allük ngenikemi?’ 21 Mürin oupwe üreniir, ‘Äm aia nöün Farao amanau me lon Isip, nge ewe Samol mi Lapalap a emwenikeemiwu seni Isip ren pöün mi manaman. 22 Iwe, ewe Samol mi Lapalap a föri asisil me manaman mi lapalap o afeiengau ngeni chon Isip me Farao, pwal ngeni chon leimwan meinisin me fän mesem. 23 A emwenikeemiwu me ikenan, pwe epwe emwenikeemilong o ngenikem ewe fanü a fen pwon fän akapel pwe epwe ngeni ach kewe lewo. 24 Mürin, ewe Samol mi Lapalap a allük ngenikem pwe aipwe aleasochsi ekei allük meinisin o meniniti ewe Samol mi Lapalap ach we Kot, pwe aipwe feiöch iteiten fansoun, nge i epwe amwöchü manauem, usun a fis ikenai. 25 Are aipwe tümwünüöchü le aleasochisi ekei allük meinisin me fän mesen ewe Samol mi Lapalap ach we Kot usun a allük ngenikem, äm aipwe pwüng ren.’ ”