1 Iwe, ewe Samol mi Lapalap a pwal kapas ngeniei, 2 “Nöün aramas, ifa usun, kopwe apwüngü ewe telinimw chon ra nimanauei aramas? Ifa usun, kopwe eäni apwüng won? Mürin, kopwe pwäri ngeni an kewe föför mi anioput meinisin. 3 Kopwe apasa pwe iei aloi ngang Kot ewe Samol mi Lapalap: En telinimw mi fis angangen nimanau lomw, ka pwal püsin alimengauok ren om fel ngeni uluulun anümwäl, fansoun om feiengau a war. 4 Ka tipis ren om nimanauei aramas, ka pwal alimengauok ren ekewe uluulun anümwäl ka föri. Iwe, ka amüttiri ränum, ka pwal tori ewe fansoun sopolom. Iei mine üa mwüt ngeni chon ekewe mwü me fanü pwe repwe aitengauok o aturunufaseek. 5 Chokewe mi kan ngonuk, pwal chokewe mi toau senuk repwe turunufaseek, en telinimw mi itengau o uren fitikoko.

6 Nengeni, ekewe samolun Israel meinisin mi nom lon ei telinimw ra chök ekiekin aea ar nemenem pwe repwe nimanauei aramas. 7 Iwe, ämi chon ei telinimw ousap meniniti sememi me inemi, oua kirikiringau ngeni ekewe chon ekis o ariaföüü chon mäsen me fefin mi mä pwülüer. ✡Eks 20.12; Tut 5.16; Eks 22.21-22; Tut 24.17 8 Iwe, oua aücheangaua ai kewe mettoch mi pin o apiningaua pinin ai kewe ränin sapat. ✡Lif 19.30; 26.2 9 Iwe, a wor ekoch aramas me lon ei telinimw mi chofonätä usun ekoch pwe repwe ninnila, a pwal wor chon mongö föten anü me won ekewe chukutekia, a pwal fis angangen mocheisou lon. 10 Ekoch ra kon ren pwülüen semer, ra pwal achomanauei fefin mi samaun maram. 11 Ekoch ra lisowu ngeni pwülüen chon arur, ekoch ra föföringau ngeni pwülüen nöür mwän, pwal ekoch ra föföringau ngeni fefiner. ✡Lif 18.7-20 12 Oua pwal angei lifangen amichimich pwe oupwe nimanauei aramas. Iwe, oua awattela winnen nöümi moni ika angei manauan seni chon arumi fän pöchökül, nge oua manlükieila,” iei alon Kot ewe Samol mi Lapalap. ✡Eks 23.8; Tut 16.19; Eks 22.25; Lif 25.36-37; Tut 23.19

13 “Iei mine üpwe aü pei ngenikemi fän song, pokiten oua angei winnen nöümi moni fän pwüngingau o eäni angangen nimanau lefilemi. 14 Ifa usun, epwe chüen wor ämi tipepwora, ika pöümi repwe chüen tongeni pöchökül, lupwen fansoun ai üpwe apwüngükemi? Ngang ewe Samol mi Lapalap üa kapas, üpwe pwal apwönüetä. 15 Iwe, üpwe atoropasafeilikemi lein chon ekewe mwü me fanü, üpwe pwal awesi senikemi ämi limengauen tipis. 16 Iwe, lupwen oupwe küna itengau me ren chon ekewe mwü, mürin oupwe silei pwe ngang ewe Samol mi Lapalap.”

17 Iwe, ewe Samol mi Lapalap a kapas ngeniei, 18 “Nöün aramas, ekewe chon Israel ra usun ngününgauen mächä mi ketel me rei. Ir meinisin ra usun chök sokun mächä, piras me pilom mi ketel lon lenien ketel, pwal usun chök ngününgauen silifer. 19 Iei mine ngang Kot ewe Samol mi Lapalap üa apasa: Pokiten ämi meinisin oua usun chök ngününgauen mächä, üpwe achufengenikemi lon Jerusalem. 20 Usun aramas ra achufengeni sokun mächä, silifer, piras me pilom lon eu lenien ketel o soni ekkei fan, pwe repwe tel, ina usun üpwe achufengenikemi fän ai song me ai lingeringer, pwe üpwe etelikemi me lon. 21 Ewer, üpwe achufengenikemi lon Jerusalem o kenikemi fän choun ai lingeringer, pwe oupwe telila lon. 22 Usun silifer a tel me lon lenien ketel, iei usun ämi oupwe tel me lon Jerusalem. Ren ei oupwe mefi pwe ngang ewe Samol mi Lapalap üa awarato ai lingeringer womi.”

23 Iwe, ewe Samol mi Lapalap a kapassefäl ngeniei, 24 “Nöün aramas, kopwe üreni ekewe aramasen Israel, pwe fanüer esap limöch, iei mine esap püngütiu üt won lon ewe ränin ai lingeringer. 25 Ekewe samol mi nom lon ra föri ar rawangau. Usun eman laion mi wörüwör a ochei liapan, ina usun ra ochei aramas. Ra angei wöür me pisekir mi aüchea fän pöchökül, ra pwal achomonga ekewe fefin mi mä pwülüer me lon. 26 Iwe, ekewe souasor ra purätiu ai kewe allük o turunufasei piseki mi pin. Resap alefila lefilen mine a pin me mine esap pin, resap pwal afata lefilen mettoch mi limengau me mettoch mi limöch. Iwe, ra apiningaua pinin ai kewe ränin sapat pwe üa itengau leir. ✡Lif 10.10 27 Ekewe nöüwis mi nom lon ra usun chök wolif mi ochei liaper. Iwe, ra nimanauei aramas, pwe repwe pisekisekila ren. 28 Iwe, ekewe soufos ra aitöchü föförür, usun sa apwecha och mettoch mi limengau. A wor künaer mi mwakel, ra pwal osuni mine a chofana fän iter. Iwe, ra apasa, ‘Iei alon Kot ewe Samol mi Lapalap,’ nge ngang ewe Samol mi Lapalap üsap fos ngeniir. 29 Iwe, aramasen ewe fanü ra föri föförün mwänewüs o solä, ra ariaföüü chon wöüngau me chon mwelele, ra pwal aweiresi chon ekis fän pwüngingau. 30 Iwe, üa kütta ika epwe wor eman aramas leir mi tongeni senätä ewe tit o ütä ngeni pwangan me fän mesei fän iten ewe fanü, pwe üsap ataela. Nge üsap fokun küna eman. 31 Iei mine üa awarato ai song wor, üa aroserela ren choun ai lingeringer o liwini ngeniir liwinin ar föför,” iei alon Kot ewe Samol mi Lapalap.