Soukapwüng
Kapas akom
I. Iten ei puk: Soukapwüng. Ei puk a iteni ei it pokiten pworausen ekewe soukapwüng a mak lon.
II. Chon makei ei puk: Esap fat, nge lon pworausen uruwo Samuel.
III. Itelapemongen ei puk: Ach tokola seni Kot a atoto feiengau, ach kul ngeni Kot a atoto feiöch.
IV. Kapas aüchean ei puk: Chon Israel ra chök tongeni manau o nonomöch, lupwen ra allükülük me aleasochis ngeni Kot. Nge lupwen ra kirikiringau me aleasolap ngeni Kot, ra tolong lon feiengau. Nge mine a kon aüchea, pwe ika mwo ekewe chon Israel ra kirikiringau ngeni Kot o feiengau a toriir, Kot a chök amolätä an epwe alisiir fansoun meinisin, lupwen ra ekieksefäl o kul ngeni.
V. Masouen ei puk Soukapwüng: Lon ei puk a mak pworausen chon Israel seni ewe fansoun ar toki o liapeni ewe fanü Kanaan tori ewe fansoun mwen a wor nöür king. Lon ei fansoun chon Israel ra fokun pwüngingau, resap ekiekin apwönüetä än Kot kewe allük. Ekei pworaus ra apworausa föförün ekewe mwän mi pwora ra iteni “soukapwüng”. Nge chomong me leir ir meilapen sounfiu, nge sap wesewesen soukapwüng. Ekoch me leir mi kon iteföüla: Kiteon, Jefta me Samson.
VI. Tettelin masouen ei puk:
Pworausen amwüchülan än chon Israel liapeni ewe fanü 1.1–2.10
Pworausen ekewe soukapwüng lon Israel 2.11–16.31
Ekoch pworaus mi fis 17.1–21.25
1
Ekewe ainangen Juta me Simeon ra liapeni ewe king Atoni-pesek
1.1-7
1 Mürin än Josua mäla, ekewe aramasen Israel ra aisini ewe Samol mi Lapalap, “Iö lein ekewe ainang epwe akom le feila o maun ngeni ekewe chon Kanaan?” 2 Iwe, ewe Samol mi Lapalap a pälüeni, “Chon ewe ainangen Juta repwe feila. Ngang üa mwüt ngeniir pwe repwe fanüeni ewe fanü.” 3 Nge chon ewe ainangen Juta ra üreni chon ewe ainangen Simeon, “Oupwe etikem le feila lon ewe fanü a fen ainet ngenikem ren üttüt, pwe sipwe maun ngeni ekewe chon Kanaan. Mürin äm aipwe pwal etikemi le feila lon ewe fanü a fen ainet ngenikemi ren üttüt.” Iei mine chon ewe ainangen Simeon ra eti chon ewe ainangen Juta. 4 Lupwen ra feila maun, ewe Samol mi Lapalap a awinner, pwe ra akufu ekewe chon Kanaan me chon Peris. Iwe, ra niela ükükün engol ngeröü mwän me leir me lon Pesek. 5 Ikenan ra sereni ewe king Atoni-pesek o maun ngeni, ra pwal akufu ekewe chon Kanaan me chon Peris. 6 Iwe, Atoni-pesek a süla. Nge ra tapweri, ra liapeni o pöküela aütülapen pöün me pechen. 7 Mürin, Atoni-pesek a apasa, “A wor fik king üa pöküela aütülapen pöür me pecher, ra achchupi ener me fän ai chepel. Usun üa föri ngeniir, iei usun Kot a pwal föri ngeniei.” Iwe, ra emwenala ewe king Jerusalem, nge a mäla ikenan.
Ewe ainangen Juta a liapeni Jerusalem me Hepron
1.8-10
8 Iwe, ekewe re Juta ra maun ngeni Jerusalem. Ra liapeni o niela chon ren ketilas, ra pwal kenala ewe telinimw. 9 Mürin ra feila pwe repwe maun ngeni ekewe chon Kanaan mi nonom lon ewe fanü mi chukuchukutä, lon ewe fanü Nekep, pwal lon ewe fanü tekison. 10 Iwe, chon Juta ra pwal feila maun ngeni ekewe chon Kanaan mi imweimw lon Hepron. Nge iten Hepron me lom Kiriat-arapa. Iwe, ra akufu Sesai, Ahiman me Talmai.
Otniel a liapeni Tepir o pwülüeni Aksa
1.11-15
(Jos 15.13-19)
11 Iwe, seni ikenan ekewe re Juta ra feila o maun ngeni chon Tepir. Nge iten Tepir me lom Kiriat-sefer. 12 Nge Kalep a apasa, “Iö epwe maun ngeni Kiriat-sefer o liapeni, üpwe ngeni nei föpwül Aksa pwe pwülüan.” 13 Iwe, Otniel nöün Kenas we mwän, nge Kenas pwin Kalep kükün, a liapeni ewe telinimw. Mürin, Kalep a ngeni nöün föpwül Aksa pwe pwülüan. 14 Nge lupwen neminewe a feito ren Otniel, ätei a pesei ngeni pwe epwe tüngorei saman we eu tanipi. Neminewe a tötiu seni wan aas, nge Kalep a aisini, “Met ka mochen?” 15 Iwe, neminewe a üreni saman we, “Kopwe ngeniei eu feiöch. Pokiten ka anomuei lon ewe fanü Nekep, kopwe pwal ngeniei ekewe koluk mi puächetä.” Mürin Kalep a ngeni neminewe ekewe koluk mi puächetä me asan, pwal ekewe fan.
Ükükün ewe fanü ekewe ainangen Juta me Peniamin ra liapeni
1.16-21
16 Iwe, ekewe mwirimwirin semen pwülüen Moses, ekewe chon Ken, ra eti ekewe chon Juta le feila seni ewe telinimw Jeriko, ia a wor ie chomong irä palm, tori ewe fanüapön Juta mi nom lon ewe fanü Nekep arap ngeni Arat. Iwe, ra feila o nonom ikenan ren ekewe aramas. 17 Mürin ekewe re Juta ra fiti ekewe re Simeon le maun. Ra akufu ekewe chon Kanaan mi imweimw lon Sefat o ataela unusen ewe telinimw. Iei mine ewe telinimw a iteni Horma *wewen Horma tala. 18 Iwe, ekewe re Juta ra pwal liapeni Kasa, Askelon me Ekron me ekewe fanü ünükür. 19 Ewe Samol mi Lapalap a eti ekewe chon Juta, pwe ra liapeni ewe fanü mi chukuchukutä o fanüeni. Nge resap tongeni asüela aramasen lon ewe maasies, pun a wor war woken seni mächä. 20 Iwe, ra ngeni Kalep ewe telinimw Hepron, usun Moses a fen apasa. Ätei a asüela seni lon Hepron ekewe ülüman mwän ir mwirimwirin Anak. ✡Jos 15.13-14 21 Nge chon ewe ainangen Peniamin resap asüela ekewe chon Jepus mi imweimw lon Jerusalem. Iei mine ekewe chon Jepus ra nonomfengen lon Jerusalem me chon ewe ainangen Peniamin tori ikenai. ✡Jos 15.63; 2.Sam 5.6; 1.Kron 11.4
Ekewe ainangen Efraim me Manasa ra liapeni Petel
1.22-26
22 Iwe, chon ekewe ainangen Efraim me Manasa ra pwal feila maun ngeni Petel, nge ewe Samol mi Lapalap a etiir. 23 Ra tinala ekoch mwän pwe repwe operi Petel mi iteni Lus me lom. 24 Iwe, ekewe chon operi Petel ra küna eman mwän mi towu seni ewe telinimw. Ra üreni, “Kose mochen aiti ngenikem ewe alen tolong lon ewe telinimw, nge äm aipwe kirikiröch ngonuk.” 25 Iei mine ewe mwän a aiti ngeniir ewe alen tolong lon ewe telinimw. Iwe, chon ekewe ainangen Efraim me Manasa ra niela chon ewe telinimw ren ketilas, nge ra amanaua ewe mwän me chon an famili meinisin. 26 Mürin, ewe mwän a feila lon fanüen chon Hit. Ikenan a aüetä eu telinimw o aita ngeni Lus. Iei iten ewe telinimw tori ikenai.
Ükükün ewe fanü a too ngeni ekewe ainangen Manasa me Efraim
1.27-29
27 Iwe, chon ewe ainangen Manasa resap asüela chon ewe telinimw Pet-sean, Taanak, Tor, Ipleam me Mekito pwal chon wisoposopur meinisin. Pun ekewe chon Kanaan mi nonom lon ewe fanü ra chök amwöchümwöchütiu lon. 28 Nge lupwen chon Israel ra pöchökülela, ra aweiresi ekewe chon Kanaan ren angangen kinrosi, nge resap fokun asürela meinisin. ✡Jos 17.11-13
29 Iwe, chon ewe ainangen Efraim resap pwal asüela ekewe chon Kanaan mi imweimw lon ewe telinimw Keser, iei mine chon Kanaan ra chök nonom leir. ✡Jos 16.10
Ükükün ewe fanü a too ngeni ekewe lusun ainang
1.30-36
30 Iwe, chon ewe ainangen Sepulon resap asüela chon ekewe telinimw Kitron me Nahalol. Iei mine ekewe chon Kanaan ra chök nonom leir, nge ra wisen angangen kinrosi ngeniir.
31 Iwe, chon ewe ainangen Aser resap asüela chon ekewe telinimw Ako me Siton, Alap me Aksip, Helpa, Afik me Rehop. 32 Nge ekewe chon ewe ainangen Aser ra chök nonom lein chon Kanaan, ir chon wiliposen ewe fanü, pun resap asürela. 33 Iwe, chon ewe ainangen Naftali resap asüela chon ekewe telinimw Pet-semes me Pet-anat, nge ra chök nonom lein ekewe chon Kanaan, ir chon wiliposen ewe fanü. Nge chon ekewe telinimw Pet-semes me Pet-anat ra wisen angangen kinrosi ngeniir.
34 Nge ekewe chon Amor ra etia chon ewe ainangen Tan ngeni ewe fanü mi chukuchukutä, pun resap mwüt ngeniir pwe repwe feitiu lon ewe maasies. 35 Iwe, ekewe chon Amor ra chök amwöchümwöchütiu le imweimw lon Har-heres, Aijalon me Saal-pim. Nge lupwen chon ekewe ainangen Efraim me Manasa ra chomongola, ra aweiresiir ren angangen kinrosi. 36 Iwe, kiännin fanüen chon Amor a pwerela seni ewe palen Akrapim tori Sela feitä.