1 Iwe, iei inetin mwirimwirin Josef fanü: Kiännin me peliör a poputä seni ewe chanpupu Jortan ünükün Jeriko peliötiuen ekewe kolukun Jeriko. Seni Jeriko a feilong lon ewe fanüapö o feitä lon ewe fanü mi chukuchukutä tori Petel. 2 Seni Petel a pwerela tori Lus o pwerela tori Atarot, iei fanüen ekewe chon Ark. 3 Mürin a pweretiu ngeni lotou tori kiännin fanüen chon Jaflet, pwal tori kiännin Pet-horon-fan, a pwal tori Keser o müchütiu me ren ewe mataulap.

4 Iei ewe fanü ekewe mwirimwirin Manasa me Efraim nöün Josef kewe mwän ra angei.

5 Iwe, iei fanüen chon ewe ainangen Efraim lon tettelin ar kewe famili: Kiännin fanüer seni Atarot-atar feila ngeni ötiu tori Pet-horon-asan. 6 Iwe, ewe kiä a pwerela seni ikenan tori ewe matau watte. Nge ewe telinimw Mikmetat a nom won kiännin me efeng. Mürin ewe kiä mi pwere ngeni ötiu a pwelila ngeni Tanat-silo o pwerela peliötiu tori Janoa. 7 Mürin a pweretiu seni Nanoa tori Atarot, pwal tori Naara, a pwal akü Jeriko o müchütiu me ren ewe chanpupu Jortan. 8 Nge ewe kiä a pwal pwerela seni Tappua ngeni lotou tori ewe öüwö Kana o müchütiu me ren ewe matau watte. Iei ükükün fanüen chon ewe aingangen Efraim lon tettelin ar kewe famili, 9 chufengen me ekewe telinimw mi imwüla fän iter lon fanüen chon ewe ainangen Manasa, eu me eu telinimw fiti wisoposopun. 10 Nge resap asüela ekewe chon Kanaan mi nom lon Keser. Iei mine ekewe chon Kanaan ra nonom lein chon ewe ainangen Efraim tori ikenai, nge ra angang weires ren än aramas nöüniir amanau. ✡Souk 1.29