1 Iwe, iei ewe fanü mi ainet ngeni chon ewe ainangen Juta a aükük ngeni ükükün ar kewe famili. Iwe, peliörün fanüer a poputä me won kiännin Etom ewe fanüapön Sin kuku ngeni ör. 2 Mürin, kiännin fanüer me peliör a fetal seni lesopolan ewe Setin Mäla, ewe nom mi sasape ngeni ör. 3 A feila örün ewe chukuchukutä Akrapim, a pwerela tori Sin o feitä örün Kates-parnea, a pwal pwerela ünükün Hesron, a feitä tori Atar o pweliela ngeni Karka. 4 Mürin, ewe kiä a pwerela tori Asmon, a feila ngeni ewe öüwön Isip o müchütiu me ren ewe mataulap. A iei kiännin fanüer me peliör. 5 Iwe, kiännin fanüer me peliötiu ewe Setin Mäla tori mesen ewe chanpupu Jortan. Nge kiännin fanüer me peliefeng a poputä seni ewe Setin Mäla mesen ewe chanpupu Jortan. 6 A feila tori Pet-hokla o pwerela efengin Pet-arapa. Mürin, kiännin ewe fanü a feila tori ewe fau föün Pohan nöün Rupen we mwän. 7 Ewe kiä a pwal feila seni lon ewe lemolun Akor tori Tepir. Iwe, a feila efeng o weneiti Kilkal mi sasape ngeni ewe chukuchukutän Atumim peliörün ewe lemol. A pwal pwerela tori ekewe kolukun En-semes o müchütiu me En-rokel. 8 Mürin, ewe kiä a feitä ren ewe lemolun Hinnom tori peliörün me won ekewe chukun Jepus, ia ewe telinimw Jerusalem a nom ie. Iwe, a pwal feitä tori won ungen ewe chuk mi nom sasape ngeni ewe lemolun Hinnom me pelilotou pwal amüchülan ewe lemolun Refaim me peliefeng. 9 Mürin, ewe kiä a feila seni ungen ewe chuk tori ekewe koluk mi puächetä me lon Neftoa. Nge seni ikenan a feila ngeni ewe telinimw mi arap ngeni ewe chuk Efron o pwelila tori Paala, iei Kiriat-jearim. 10 Iwe, ewe kiä a pwal pwelila lotoun Paala tori ewe chukun Seir, a pwerela tori won ewe chuk Jearim me peliefeng, iei Chesalon, a pwal feitiu tori Pet-semes o pwerela Timna. 11 Mürin a pwerela tori won ewe chukutekison efengin Ekron o pwelila ngeni Sikkeron, a pwal pwerela tori ewe chuk Paala o pwerewu tori Japneel. Mürin, ewe kiä a müchütiu me ren ewe mataulap. 12 Nge kiännin fanüer me pelilotou arosetin ewe mataulap. Iei kiännin pwelin fanüen aramasen Juta a aükük ngeni ükükün ar kewe famili.

13 Iwe, Josua a ngeni Kalep nöün Jefune we mwän eu kinikinin fanü me lein fanüen ekewe aramasen Juta, usun ewe Samol mi Lapalap a allük ngeni. Iwe, a ngeni Kalep Hepron ewe telinimw än Arpa, nge Arpa semen Anak. 14 Iwe, Kalep a asüela seni ewe telinimw mwirimwirin Anak kewe ülüman mwän iter Sesai, Ahiman me Talmei. ✡Souk 1.20 15 Mürin, Kalep a feila seni ikenan o maun ngeni chon Tepir. Nge iten Tepir me lom Kiriat-sefer. 16 Iwe, Kalep a apasa, “Iö a akufu o liapeni Kiriat-sefer, üpwe ngeni nei we föpwül Aksa pwe pwülüan.” 17 Iwe, Otniel nöün Kenas we mwän, nge Kenas pwin Kalep, a liapeni ewe telinimw. Iwe, Kalep a ngeni nöün we föpwül Aksa pwe pwülüan. 18 Nge lupwen neminewe a feito ren Otniel, ätewe a pesei ngeni pwe epwe tüngorei saman we eu tanipi. Iwe, neminewe a tötiu seni wan aas, nge Kalep a aisini, “Met ka mochen?” 19 Nge neminewe a üreni, “Kopwe ngeniei eu feiöch. Pokiten ka ngeniei eu fanü mi pwasapwas lon Nekep, kopwe pwal ngeniei ekewe koluk mi puächetä.” Mürin Kalep a ngeni neminewe ekewe koluk mi puächetä ra nom asan, pwal ekewe ra nom fan.

20 Iwe, iei fanüen chon ewe ainangen Juta a aükük ngeni ükükün ar kewe famili. 21 Iwe, än chon ewe ainangen Juta kewe telinimw kükü ngeni ör arap ngeni kiännin Etom iter: Kapseel, Eter me Jakur, 22 Kina, Timona me Atata, 23 Ketes, Hasor me Itnan, 24 Sif, Telem me Pealot, 25 Hasor-hatata me Keriot-hesron, iei Hasor, 26 Amam, Sema me Molota, 27 Hasar-kata, Hesmon me Pet-pelet, 28 Hasar-sual, Peer-sepa me Pisiotia, 29 Paala, Iim me Esem, 30 Eltolat, Chesil me Horma, 31 Siklak, Matmana me Sansana, 32 Lepaot, Silim, Ain me Rimon, ükükür meinisin rüe me tiu telinimw fiti wisoposopur.

33 Nge iten ekewe telinimw lon ewe fanü tekison: Estaol, Sora me Asna, 34 Sanoa, En-kanim, Tapua me Enam, 35 Jarmut, Atullam, Soko me Aseka, 36 Sa-araim, Atitaim, Ketera me Keterotaim, ükükür meinisin engol me rüanü telinimw fiti wisoposopur.

37 Iwe, pwal Senan, Hatasa me Miktalkat, 38 Tilean, Mispa me Jokteel, 39 Lakis, Poskat me Eklon, 40 Kapon, Lamam me Chitlis, 41 Keterot, Pet-takon, Naama me Maketa, ükükür meinisin engol me wonu telinimw fiti wisoposopur.

42 Iwe, pwal Lipna, Eter me Asan, 43 Ifta, Asna me Nesip, 44 Keila, Aksip me Maresa, ükükür meinisin tiu telinimw fiti wisoposopur.

45 Iwe, pwal Ekron me telinimwan me wisoposopun, 46 pwal ekewe telinimw meinisin ünükün Astot fiti wisoposopur seni Ekron tori ewe mataulap. 47 Iwe, pwal Astot me Kasa fiti telinimwer me wisoposopur tori ewe öüwö mi nom won ewe kiän Isip me arosetin ewe mataulap.

48 Iwe, ikkei iten ekewe telinimw lon ewe fanü mi chukuchukutä: Samir, Jatir me Soko, 49 Tana me Kiriat-sefer, iei Tepir, 50 Anap, Estemo me Anim, 51 Kosen, Holon me Kilo, ükükür meinisin engol me eu telinimw fiti wisoposopur. 52 Iwe, pwal Arap, Tuma me Esan, 53 Janim, Pet-tapua me Afeka, 54 Humta, Kiriat-arpa, iei Hepron, pwal Sior, ükükür meinisin tiu telinimw fiti wisoposopur. 55 Pwal Maon, Karmel, Sif me Jutta, 56 Jesreel, Jokteam me Sanoa, 57 Kain, Kipea me Timna, ükükür meinisin engol telinimw fiti wisoposopur. 58 Iwe, pwal Halul, Pet-sur me Ketor, 59 Ma-arat, Pet-anot me Eltekon, ükükür meinisin wonu telinimw fiti wisoposopur. 60 Iwe, Kiriat-paal, iei Kiriat-jearim, pwal Rapa, ükükün ruu telinimw fiti wisoposopur.

61 Iwe, ikkei iten ekewe telinimw lon ewe fanüapö: Pet-arapa, Mitin me Sekaka, 62 Nipsan, ewe telinimwen salt me Enketi, ükükür meinisin wonu telinimw fiti wisoposopur.

63 Nge ekewe aramasen Juta resap tongeni asüela ekewe chon Jepus mi imweimw lon Jerusalem. Iei mine ekewe chon Jepus ra nomofengen me ekewe aramasen Juta lon Jerusalem tori ikenai. ✡Souk 1.21; 2.Sam 5.6; 1.Kron 11.4