Josua
Kapas akom
I. Iten ei puk: Josua. Ei puk a angei itan seni iten ewe aramas mi aüchea a mak pworausan lon. Wewen ei it Josua: Ewe Samol mi Lapalap a alisi o amanaua aramas.
II. Chon makei ei puk: Esap fat, lon än chon Israel uruwo Josua. Nge pworausen än Josua mäla eman a makei o apacha ngeni ei puk.
III. Itelapemongen ei puk: Ach win a pop seni ach lükülük.
IV. Kapas aüchean ei puk: Ewe pwon Kot a pwon ngeni Apraham a pwönüetä, chon Israel ra liapeni o fanüeni ewe fanüen pwon.
V. Masouen ei puk Josua: Lon ei puk a mak ewe pworaus usun än chon Israel toki o liapeni ewe fanü Kanaan fän emwenien Josua, ätewe mi siwili Moses. Ikkei ekewe pworaus aüchea mi fis ra mak lon ei puk: Än chon Israel feila epek ewe chanpupu Jortan, än Jeriko oola, än chon Israel maun ngeni Ai me försefälin ewe pwon lefilen Kot me nöün aramas. Ewe wokisin aramas ra kon silei me lon ei puk a mak lon sopun 24.15: “Ikenai oupwe filätä iö oupwe angang ngeni... Nge ngang me chon leimwei äm aipwe angang ngeni ewe Samol mi Lapalap.”
VI. Tettelin masouen ei puk:
Chon Israel ra liapeni ewe fanü Kanaan 1.1–12.24
Ewe fanü a ainet 13.1–21.45
1. Ewe fanü ötiuen ewe chanpupu Jortan 13.1-33
2. Ewe fanü lotoun ewe chanpupu Jortan 14.1–19.51
3. Ekewe telinimwen op 20.1-9
4. Ekewe telinimw chon ewe ainangen Lefi ra imweimw lon 21.1-45
Chon ekewe ainang mi nom ötiuen ewe chanpupu Jortan ra liwiniti fanüer 22.1-34
Än Josua kapasen emwirimwir 23.1-16
Ewe pwon a försefäl me lon Sikem 24.1-33
1
Chon Israel ra amolätä ar repwe maun ngeni chon Kanaan
1.1-18
1 Iwe, mürin än Moses nöün ewe Samol mi Lapalap chon angang mäla, ewe Samol mi Lapalap a üreni Josua nöün Nun we mwän, ätewe mi angang ngeni Moses, 2 “Nei chon angang Moses a mäla. Iei mine kopwe ütä iei o feila pekilan ei chanpupu Jortan, ämi me ekei aramas meinisin, pwe oupwe feila lon ewe fanü üpwe ngeni ekewe aramasen Israel. 3 Ekewe leni meinisin ia oupwe ipwelong ie üa ngenikemi, usun üa fen pwon ngeni Moses. 4 Kiän fanüemi epwe seni ewe fanüapö mi nom ör tori ewe chuk Lepanon mi nom efeng, seni ewe chanpupu watte itan Oifrat mi nom ötiu, unusen ewe fanüen chon Hit tori ewe matau watte mi nom lotou. 5 Esap wor eman epwe tongeni ü ngonuk lon ränin manauom meinisin. Usun üa eti Moses, iei usun üpwe pwal etuk. Üsap tümwününgau ngonuk, üsap pwal likituk. ✡Tut 11.24-25; 31.6,8; Ipr 13.5 6 Kopwe apöchökülok o tipepwora. Pun en kopwe afanüa ekei aramas ngeni ewe fanü üa pwon fän akapel ngeni ar kewe lewo pwe üpwe ngeniir. ✡Tut 31.6,7,23 7 Kopwe chök apöchökülok o tipepwora, kopwe pwal tümwünüöchü om kopwe apwönüetä ekewe allük meinisin Moses nei we chon angang a allük ngonuk. Kosap fokun aleasolap ngeniir, pwe kopwe fefeitä lon meinisin mine kopwe föri. 8 Kosap ükütiu le apworausa masouen ei puken allük, kopwe ekieki usun lerän me lepwin, pwe kopwe tümwünüöchü om kopwe apwönüetä meinisin mine a mak lon. Mürin kopwe feiöch o fefeitä lon meinisin mine kopwe föri. 9 Ifa usun, üsap allük ngonuk pwe kopwe apöchökülok o tipepwora? Kosap niuokus, kosap pwal rükö, pun ngang ewe Samol mi Lapalap om Kot üpwe etuk ekis meinisin ia kopwe feila ie.”
10 Mürin Josua a allük ngeni ekewe meilapen ekewe aramas, 11 pwe repwe pwerefetal lemenen ewe leni ia ekewe aramas ra nonom ie, o allük ngeniir, “Oupwe amolätä amötümi. Pun mürin ülüngat rän oupwe pwerela pekilan ewe chanpupu Jortan o pwerelong lon ewe fanü ewe Samol mi Lapalap a ngenikemi pwe oupwe fanüeni.”
12 Nge Josua a üreni chon ekewe ainangen Rupen me Kat pwal esopun ewe ainangen Manasa, 13 “Oupwe chechemeni ekewe kapas Moses nöün ewe Samol mi Lapalap we chon angang a ürenikemi, pwe ewe Samol mi Lapalap ämi we Kot epwe amolätä eu lenien asösö fän itemi o ngenikemi ei fanü. 14 Pwülüemi, nöümi semirit me nöümi pwiin man repwe chök nonom lon ei fanü Moses a ngenikemi ötiuen ewe chanpupu Jortan. Nge ekewe sounfiu meinisin me leimi repwe akomwola mwen pwimi fän pisekin maun o alisiir, 15 tori ewe Samol mi Lapalap epwe asösöü pwimi usun chök ämi. Iwe, repwe fanüeni ewe fanü ewe Samol mi Lapalap ämi we Kot a ngeniir. Mürin oupwe liwiniti ewe fanü pwe oupwe fanüeni, ewe fanü Moses nöün ewe Samol mi Lapalap we chon angang a fen ngenikemi me ötiuen ewe chanpupu Jortan.” ✡Num 32.28-32; Tut 3.18-20; Jos 22.1-6 16 Iwe, ra üreni Josua, “Meinisin mine ka allük ngenikem aipwe föri, nge ia ka tinikeemila ie aipwe feila. 17 Äm aipwe aleasochisiik usun chök äm aia aleasochisi Moses lon mettoch meinisin. Eu chök, amwo ewe Samol mi Lapalap epwe etuk usun an eti Moses. 18 Nge iö a ü ngeni om allük o aleasolap ngeni alom, ese lifilifil met ka allük ngeni, ätewe epwe ninnila. Kopwe chök apöchökülok o tipepwora.”