1 Iwe, Josua nöün Nun we mwän a tinala seni Sitim ruoman mwän lemonomon, pwe repwe operi ewe fanü. Iwe, a üreniir, “Oupwe feila o ouwasacha ewe fanü, akaeuin ewe telinimw Jeriko.” Iwe, ra feila, ra tolong lon imwen eman fin lisowu itan Rahap o nonom ikenan. ✡Ipr 11.31; Jas 2.25 2 Iwe, ewe pworaus a tori ewe kingen Jeriko pwe ekoch re Israel ra feito lon ei pwinin, pwe repwe sachei ewe fanü. 3 Mürin, ewe kingen Jeriko a titi Rahap o üreni, “Kopwe emwenato ekewe mwän mi feito reöm lon imwom. Pun ra feito pwe repwe sachei unusen ewe fanü.” 4 Nge ewe fefin a angei ekewe ruoman mwän o aopeer. Iwe, a apasa, “Mi pwüng pwe ekewe mwän ra feito rei, nge ngang üsap silei ia ra feito me ie. 5 Me mwen än ewe asamalap epwe kapüng lepwin, ekewe mwän ra towu. Üsap silei ia ra feila ie. Oupwe müttir tapweriir, pun oua chüen tongeni liapeniir.” 6 Nge ewe fefin a fen emwenätä ekewe mwän won ewe imw o aopeer fän fetilipwas seni ewe irä itan fläks, neminewe a atettelöchü me mwan won ewe imw. 7 Iei mine nöün ewe king kewe chon künö ra tapwerirela won ewe al ngeni ewe chanpupu Jortan tori ekewe aropetepeetin ewe chanpupu. Nge lon ewe chök otun ekewe chon tap ra towu, ewe asamalap a kapüng.

8 Iwe, me mwen än ekewe mwän konola, ewe fefin a feitä rer won ewe imw 9 o üreniir, “Üa silei pwe ewe Samol mi Lapalap a ngenikemi ei fanü. Iwe, äm aia niuokusitikemi, nge chon ewe fanü meinisin ra rükö pokitemi. 10 Pun aia rong usun ewe Samol mi Lapalap a apwasatä lölön ewe Setipar me mwemi, lupwen oua towu seni Isip. Aia pwal rong usun ämi niela ekewe ruoman kingen chon Amor iter Sihon me Ok ra nom ötiuen ewe chanpupu Jortan. ✡Eks 14.21; Num 21.21-35 11 Iwe, lupwen äm aia rongorong ei pworaus, lelukem a kisikisila, nge esap chüen wor tipepwora ren eman aramas pokitemi. Pun ewe Samol mi Lapalap ämi Kot, i ewe Kot mi nom won läng pwal won fanüfan. 12 Iei oupwe pwon ngeniei fän akapel fän iten ewe Samol mi Lapalap, pwe oupwe kirikiröch ngeni chon leimwen semei usun üa kirikiröch ngenikemi. Iwe, oupwe ngeniei eu asisil mi let 13 o pwon ngeniei pwe oupwe amanaua semei me inei, mongeei me pwii me aramaser meinisin. Iwe, oupwe angasakem seni mäla.” 14 Nge ekewe mwän ra üreni, “Manauem akasiwilin manauemi. Are ousap akafat äm ei angang, äm aipwe kirikiröch o allükülük ngenikemi, lupwen ewe Samol mi Lapalap epwe ngenikem ei fanü.”

15 Mürin, ewe fefin a aürüretiu won efoch säl me lon asammwachon imwan, pun imwan a kaütä won tittin ewe telinimw. 16 Iwe, a üreni ekewe mwän, “Oupwe feila won ekewe chukuchukutä pwe ekewe chon tap resap churikemi. Oupwe op ikenan lon ükükün ülüngat rän, tori ekewe chon tap repwe liwin. Mürin oupwap feila.” 17 Nge ekewe mwän ra üreni, “Äm aipwe apwönüetä ewe pwon en ka üra sipwe pwonfengen won fän akapel. Nge en kopwe föri iei usun: 18 Lupwen aipwe tolong lon ewe fanü, kopwe rietä ei säl mi par won ewe asammwacho ka aürükeemitiu me lon. Kopwe pwal emwichato lon imwom semom me inom, mongeom me chon leimwen semom meinisin. 19 Are eman epwe towu seni imwom o nom won al, chan epwe ukun chök, nge äm aisap tipis. Nge are eman a angeetä won eman lein chokewe mi nom lon imwom, chan epwe ukem chök. 20 Nge are ka akafat äm ei angang, äm aisap tipis ngeni om we pwon ka üra sipwe pwonfengen won fän akapel.” 21 Iwe, ewe fefin a üra, “Epwe fis meinisin usun mine oua apasa.” Iwe, a tinirela. Nge mürin ar feila, a rietä ewe säl mi par won ewe asammwacho.

22 Iwe, ekewe mwän ra feitä won ekewe chukuchukutä o nonom ikenan lon ükükün ülüngat rän, tori ekewe chon tap ra liwinsefäl. Iwe, ekewe chon tap ra kütteer won unusen ewe al, nge resap küneer. 23 Mürin ekewe ruoman mwän ra feitiu seni ekewe chukuchukutä, ra pwerela pekilan ewe chanpupu o feila ren Josua nöün Nun we mwän. Iwe, ra apworausa ngeni meinisin usun mine a fis ngeniir. 24 Iwe, ra üreni Josua, “Ellet, ewe Samol mi Lapalap a ngenikich unusen ewe fanü. Pwal chon ewe fanü meinisin ra fokun rükö pokitach.”