81
Än Kot kirikiröch me än chon Israel tokola
81.1-16
Ngeni ewe mi emweni chon köl: Won pisekin ettik itan Kitit. Echö än Asaf köl.
Oupwe leüömong le köl ngeni Kot i ach pöchökül.
Oupwe mweireir fän pwapwa ngeni än Jakop we Kot.
Oupwe chietä echö köl, oupwe ettiki pisekin kaktai,
oupwe ettiki ükülele me kitar.
Oupwe ettiki rappwa lelingen maram me leunusen maram,
pwal lupwen ach ränin chulap. Num 10.10
Pun iei eu allük lon Israel,
eu pwüüng seni än Jakop we Kot.
Kot a anükücharala ei allük ngeni chon Israel,
lupwen a feila pwe epwe maun ngeni Isip.
Üa rongorong eu möngüngü üsamwo rong me mwan:
 
“Üa angei seni afaremi ewe mettoch mi chou,
üa atowu me lepöümi ewe chüük mi chou ren pilak.
Oua köriei lon ämi riaföü, nge ngang üa angasakemi.
Üa pälüenikemi seni ewe kuchuen chopulap, nge ousap künaei,
üa sotunikemi arun ekewe kolukun Meripa. Eks 17.7; Num 20.13
Ämi nei aramas, oupwe rongorong ngeni ai kapasen fön.
Ämi chon Israel, amwo oupwe aüselingaei.
Esap tufich pwe oupwe eäni eman kot än chon ekewe mwü,
ousap fel ngeni eman koten ekis. Eks 20.2-3; Tut 5.6-7
10 Ngang ewe Samol mi Lapalap ämi we Kot,
üa emwenikemiiwu seni ewe fanü Isip.
Oupwe fokun amassaw, nge ngang üpwe amongökemi.
 
11 Nge nei aramas resap mochen aüselinga aloi,
chon Israel resap mochen aleasochisiei.
12 Iei mine üa asechirela lon ar tipeförea
pwe repwe chök föri mine ra mochen.
13 Amwo nei aramas repwe aüselinga aloi,
amwo chon Israel repwe aleasochisiei.
14 Are epwe iei usun, üpwe müttir akufu chon oputeer
o fiu ngeni chokewe mi ü ngeniir.
15 Iwe, chokewe mi oputaei repwe chapetiu me mwei fän niuokus,
nge ar feiengau esap müchüla tori feilfeilachök.
16 Nge üpwe amongöü ngenikemi wiich mi fokun mürina
o aünü ngenikemi chönün chunen seni ewe achau, pwe oupwe mötüla.”

81:3: Num 10.10

81:7: Eks 17.7; Num 20.13

81:9: Eks 20.2-3; Tut 5.6-7