1 Lon ena fansoun eu puächen koluk epwe puächetä fän iten ekewe mwirimwirin Tafit me chon Jerusalem, pwe epwe limetiir seni ar tipis me limengau.”

2 Iei alon ewe Samol mi Unusen Manaman, “Lon ena fansoun üpwe ärala iten ekewe uluulun anümwäl seni ewe fanü, pwe esap chüen wor eman epwe chechemeniir. Üpwe pwal asüela ekewe soufos me ekewe ngün mi limengau seni ewe fanü. 3 Nge ika eman a chüen osuni, püsin saman me inan repwe üreni, ‘Kopwe fokun ninnila, pun ka apasa pwe om kapasen osuni a pop seni ewe Samol mi Lapalap, nge ka chofana.’ Püsin saman me inan repwe posu, lupwen a osuni. 4 Lon ena fansoun eman me eman soufos epwe säw ren püsin künan, lupwen a osuni, esap pwal chüen üföüf üfen soufos mi ülöül pwe epwe atupu aramas. 5 Nge epwe apasa, ‘Sap ngang eman soufos, nge üa eman soutanipi. Üa angang won ei fanü seni lealüali.’ 6 Nge ika eman epwe aisini, ‘Met popun a kinas won sökürum?’, iwe, epwe pälüeni, ‘Eman a akinasaei me lon imwen chiechiei.’ ”

7 Iei alon ewe Samol mi Unusen Manaman, “Kopwe pwök, en ketilas, o fiu ngeni nei chon mas, ngeni ewe aramas mi fokun kan ngeniei. Kopwe niela ewe chon mas, pwe ekewe sip repwe toropasfeil. Üpwe ü ngeni ekewe aramas mi kis. ✡Mat 26.31; Mark 14.27 8 Lon unusen ewe fanü ruu leülüngatin aramas repwe mäla, nge eu leülüngatin repwe manau. 9 Nge ewe eu leulüngatin mi chüen manau üpwe atolongeer lon ewe ekkeiin riaföü, pwe üpwe limetiir usun eman a limeti silifer lon ekkei, üpwe sotuniir usun eman a sotuni kolt won ekkei. Mürin repwe kökköri itei, nge ngang üpwe pälüeniir. Üpwe apasa, ‘Ämi nei aramas,’ nge ir repwe apasa, ‘Ewe Samol mi Lapalap i ach we Kot.’ ”