1 Iei a chök ruu rän mwen ewe ränin Pasofer me ewe chulapen mongö pilawa esap wor iis lon. Iwe, ekewe souasor mi lap me ekewe Sensen Allük ra ekieki usun eu alen ar repwe turufi Jesus le monomon, pwe repwe niela. ✡Eks 12.1-8 2 Ra apasa, “Esap tufich ach sipwe föri ei raw fansoun ei chulap, pwe ekewe aramas resap afitikoko.”

3 Iwe, Jesus a nom lon Petania lon imwen Simon, eman mwän mi üri rupun pwötür me mwan. Lupwen Jesus a mongö ren, eman fefin a tolong ren fän eu lö mi fokun pwokus o mömong mi för seni ewe irä nart, a nom lon eu rume seni ewe fau itan alapaster. Neminei a amökkü ei rume o ninätiu ewe lö won möküren Jesus. ✡Luk 7.37-38 4 Iwe, ekoch me lein ekewe aramas mi nom rer ra wowongau o kapasfengen lefiler, “Pwota a asolapala ei lö? 5 Pun eman a tongeni amömöla won lap seni ükükün ülüpükü föün moni silifer o fangala ewe moni ngeni ekewe chon wöüngau.” Iwe, ra fokun apwüngü ei fefin. 6 Nge Jesus a üreniir, “Oupwe likitala neminei. Pwota oua osukosuka? A föri ngeniei eu föför mi fokun mürina. 7 Pun ekewe chon wöüngau repwe nom remi fansoun meinisin, oua tongeni alisiir iteiten fansoun oua mochen. Nge ngang üsap nonomfochofoch remi. ✡Tut 15.11 8 Neminei a föri ükükün met a tongeni. A ninätä ewe lö woi pwe epwe amolaei ngeni ai üpwe tolong lon peias. 9 Enlet, üpwe ürenikemi: Ekis meinisin won unusen fanüfan ia aramas repwe afalafalafeil ie ewe Pworausen Manau, ikenan aramas repwe pwal apworausa mine neminei a föri pwe achechemen itan.”

10 Mürin Jutas Iskariot, eman me lein ekewe engol me ruoman chon kaiö, a feila ren ekewe souasor mi lap fän iten an epwe afangamä ngeniir Jesus. 11 Iwe, lupwen ar rongorong mine a üreniir, ra pwapwa o pwon ngeni pwe repwe ngeni moni. Iei mine Jutas a kütta eu fansoun mi fich pwe epwe tongeni atolonga Jesus lepöür.

12 Iwe, lon aeuin ränin ewe chulapen mongö pilawa esap wor iis lon, ewe rän ra niela ekewe lam fän iten ewe mongön Pasofer, nöün Jesus kewe chon kaiö ra aisini, “Ia ka mochen sipwe feila ie o amolätä fän itom ewe mongön Pasofer?” 13 Mürin Jesus a tinala ruoman me lein nöün kewe chon kaiö o öüröürer, “Oupwe feila lon ewe telinimw. Ikenan oupwe churi eman mwän mi mwärei eu rume a wor koluk lon. Oupwe tapwela mürin 14 tori ewe imw a tolong lon. Iwe, oupwe üreni mine imwan ewe, ‘Nöüm sense a apasa: Ia a nom ie ewe ruum äm me nei kewe chon kaiö aipwe mongö ewe mongön Pasofer?’ 15 Mürin epwe aiti ngenikemi eu ruum mi watte a nom asan, a molotä pisekin lon. Iwe, ikenan oupwe amolätä ewe mongö fän itach.”

16 Iwe, ekewe chon kaiö ra feila, ra tolong lon ewe telinimw o küna meinisin usun mine Jesus a fen üreniir. Iwe, ra amolätä ewe mongön Pasofer. 17 Iwe, lupwen a tori lekuniol, Jesus me nöün kewe engol me ruoman chon kaiö ra wareiti ewe leni. 18 Lupwen ar mot ngeni chepel o mongö, Jesus a apasa, “Enlet, üpwe ürenikemi, eman me leimi epwe afangamäei, eman mi etiei le mongö.” ✡Kölf 41.9 19 Iwe, ekewe chon kaiö ra lolilen ren ekei kapas o popuetä le ais ngeni Jesus eman mürin eman, “Ifa usun, esap fen ngang ena.” 20 Jesus a pölüeni, “Epwe eman me leimi ekei engol me ruoman, ätewe mi etiei le otukalong anen we pilawa lon ewe sepi. 21 Nöün Aramas epwe mäla usun a fen mak lon ekewe Toropwe mi Pin. Nge feiengauen ätewe mi afangamä Nöün Aramas. Epwe fen öch ngeni ei mwän are esap uputiu.”

22 Iwe, lupwen ar mongöfengen, Jesus a angei pilawa, a iotekin kilisou won o a kinikisietiu. A ineti ngeni nöün kewe chon kaiö o apasa, “Oupwe angei, iei inisi.” 23 Mürin a angei eu kap, a iotekin kilisou ngeni Kot won o ngeni eman me eman leir. Iwe, ir meinisin ra ün seni. 24 Jesus a apasa, “Iei chai mi ninnila fänäsengesin chomong aramas, ei cha a anükünükü än Kot pwon ngenikich. ✡Eks 24.8; Jer 31.31-34 25 Enlet üpwe ürenikemi, pwe üsap chüen ünümi seni ei wain tori ewe rän lupwen üpwe ünümi ewe wain mi fö lon Mwün Kot.” 26 Mürin ar eäni echö kölün kilisou ra towu seni ewe imw o feila ngeni ewe Chukun Olif.

27 Iwe, Jesus a üreni nöün kewe chon kaiö, “Ämi meinisin oupwe sü seniei o likitieila, pun a mak lon ekewe Toropwe mi Pin, ‘Kot epwe niela ewe chon mas, nge ekewe sip repwe toropasfeil.’ ✡Sek 13.7 28 Nge mürin ai manausefälitä, üpwe akomwola mwemi Kalilea.” ✡Mat 28.16

29 Iwe, Petrus a üreni Jesus, “Ikamwo ir meinisin repwe likitukela, ngang üsap fokun likituk.” 30 Jesus a üreni Petrus, “Enlet, üpwe ürenuk, lepwin ei mwen ewe chuko epwe kö fan ruu, en kopwe amamäsiniei fän ülüngat.” 31 Nge Petrus a pölüeni fän pöchökül, “Are üpwe fen etuk le mäla, üsap fokun amamäsinuk.” Pwal ekewe chon kaiö meinisin ra apasa ei ititin fos.

32 Iwe, ra feila ngeni ewe leni itan Ketsemane. Iwe, Jesus a üreni nöün kewe chon kaiö, “Oupwe nom ikei, nge ngang üpwe feila ekis o iotek.” 33 Iwe, a aweinala Petrus, James me Johannes, pwe repwe fiti. Mürin a popuetä le letipeta o riaföü. 34 Iwe, a üreniir, “Riaföün letipei a fokun wattela, pwe üa arap ngeni ai üpwe mäla. Oupwe nonom ikei o mamasa.” 35 Mürin Jesus a feila ekis, a chapetiu le pwül o iotek, pwe ika epwe tufich ei fansoun riaföü epwe feil seni. 36 Iwe, a iotek, “Semei, semei! Mettoch meinisin ra tufich ngonuk. Kose mochen kopwe angei seniei ei kapen riaföü. Nge esap letipei epwe fis, pwe letipom.”

37 Mürin Jesus a liwiniti ekewe ülüman chon kaiö, nge a küneer, pwe ra möür. Iwe, a üreni Petrus, “Simon, ka annut. Kosap tongeni mamasa lon eu chök kulok? 38 Oupwe mamasa o iotek, pwe ousap turutiu lon sosot. Ewe ngün a mochen pwora, nge ewe fituk a apwangapwang.”

39 Iwe, Jesus a pwal liwinsefälila o iotek lon ewe chök ititin fos a eäni me mwan. 40 Mürin a liwinsefäliti ekewe chon kaiö, nge a pwal küneer, pwe ra möür, pun ra fokun chouchou. Iwe, resap silei mine repwe üreni Jesus.

41 Iwe, lupwen Jesus a liwinsefälitiir fan aülüngatin, a üreniir, “Ifa usun, oua chüen annut o asösö? A naf! A tori ewe otun. Nengeni Nöün Aramas epwe oolong lepöün chon tipis. 42 Ou pwätä, ousipwe feila. Nengeni, iei i ewe mwän epwe afangamäei.”

43 Iwe, lupwen Jesus a chüen kapas, Jutas, eman ekewe engol me ruoman chon kaiö, a war. Eu mwichen aramas mi chomong ra eti fän nöür ketilas me wokur wok. Ir ätekewe ekewe souasor mi lap, ekewe Sensen Allük me ekewe souakom ra ökünöör. 44 Ätewe mi afangamä a ngeniir eu asisil o a üreniir, “Ätewe ngang üpwe mitiri, ina i ewe mwän. Oupwe turufi o etekinala, nge oupwe mamasaöchü.”

45 Lupwen Jutas a war, a müttir feiliti Jesus o üreni, “Sense”, a pwal mitiri. 46 Iei mine ekewe aramas ra turufi Jesus o fötekini. 47 Nge eman me lein ätekewe mi ü arun a weitawu nöün ketilas o pöküela eu selingen nöün ewe Souasor mi Lap chon angang. 48 Mürin Jesus a üreniir, “Ifa usun, ngang eman chon afitikoko, pwe oua feito fän nöümi ketilas me wokumi wok, pwe oupwe turufiei? 49 Iteiten rän üa nom remi o afalafal lon imwenfel, nge ämi ousap fötekiniei. Nge iei kapasen ekewe Toropwe mi Pin epwe pwönüetä.” ✡Luk 19.47; 21.37 50 Iwe, ekewe chon kaiö meinisin ra likitala Jesus o süla.

51 Eman alüal a tapwela mürin Jesus, esap üföüf och, nge a chök finiti ngeni echö chenikam. Iwe, lupwen ar turufi, 52 a süla fan an selela, nge a likitala ngeniir chenikaman.

53 Mürin ra etekinala Jesus lon imwen ewe Souasor mi Lap. Ikenan ekewe souasor mi lap meinisin, ekewe souakom me ekewe Sensen Allük ra mwichfengen ie. 54 Iwe, Petrus a tapwela mürin Jesus me toau o tolong lon ewe leni lükün imwen ewe Souasor mi Lap. Ikenan a mot ren ekewe chon mas o apwichikara ren ewe ekkei. 55 Iwe, ekewe souasor mi lap me unusen ewe mwichen soupwüng ra kütta mine repwe tip ngeni Jesus, pwe repwe atipisi ngeni mäla. Nge resap küna och tipis ren. 56 Chomong chon pwärätä ra chofonatä mine ra tip ngeni, nge ar kapasen tipetipmwäl ngeni esap wewefengen. 57 Ekoch ra ütä o apasätä ar kapasen tipitipmwäl ngeni, o ra apasa, 58 “Äm aia rongorong an apasa, ‘Ngang üpwe atai ei imwenfel mi för ren pöün aramas, nge lon ükükün ülüngat rän üpwe aüsefälietä pwal eu esap förien pöün aramas.’ ” ✡Joh 2.19 59 Iei mwo met ra apasa, nge ar kapasen pwärätä esap wewefengen.

60 Mürin ewe Souasor mi Lap a ütä me mwer meinisin o aisini Jesus, “Ifa usun, esap wor om kapasen pölüeni ngeni ekei kapasen atutur ekei mwän ra aturuk won?” 61 Iwe, Jesus a chök fanafanala, nge esap pölüeni och. Ewe Souasor mi Lap a pwal aissefäl ngeni, “Ifa usun, en ewe Kraist, Nöün ewe Kot aramas ra mwareiti?” 62 Jesus a pölüeni, “Ewer, ngang ätewe. Ämi oupwe küna Nöün Aramas epwe mot lepelifichin ewe mi Unusen Manaman, epwe feito won ekewe kuchun läng.” ✡Tan 7.13 63 Iwe, ewe Souasor mi Lap a kamwei üfan o apasa, “Pwota sipwe chüen mochen angei kapasen atutur? 64 Oua püsin rongorong an kapasen turunufas. Met oua ekieki usun?” Iwe, ir meinisin ra apwüngala fän itan pwe a tipisin mäla. ✡Lif 24.16 65 Mürin ekoch me leir ra popuetä le atufa, ra pwölüela won mesan o öfönü. Iwe, ra üra, “Kopwe pwäri ngenikem iö a öfönuk.” Nge ekewe chon mas ra etekinala o wichi.

66 Iwe, lupwen Petrus a nom lon ewe leni lükün imwen ewe Souasor mi Lap, eman föpwül, nöün ewe Souasor mi Lap chon angang, a feito ren. 67 Iwe, a küna Petrus pwe a apwichikara inisin, iwe, a newenewen ngeni o apasa, “En pwal eman mi eti Jesus seni Nasaret.” 68 Nge Petrus a amam o apasa, “Üsap silei are weweiti mine ka kapas usun.” Mürin a feiliwu lon ewe al ngeni ewe asamalap. 69 Iwe, ewe föpwül a künasefäli Petrus me ikenan o apasasefäli ngeni chokewe mi ü arun, “Ei mwän eman nöün Jesus kewe chon kaiö.” 70 Nge Petrus a amamsefäl. Ekis chök fansoun mürin, chokewe mi üfeil arun ra pwal üreni Petrus, “Enlet, en eman ekewe chon kaiö, pun en pwal eman re Kalilea.” 71 Nge Petrus a popuetä le püsin otteki inisin o akapel ngeniir, “Üsap silei ei mwän oua kapas usun.” 72 Lon ewe chök otun ewe chuko a kökkö fan aruan. Mürin Petrus a chechemeni ekewe kapas Jesus a apasa ngeni, “Mwen än ewe chuko epwe kökkö fan aruan, en kopwe amamäsiniei fan ülüngat.” Iwe, a ekilolilen o kechü.