2
ክርስቶስ ኑዉ ጋናትያዋ
1 ታ ናቶ፥ ናጋራ ህንተ ኦናዳን፥ ታን ሀዋ ህንተንቶ ጻፋይ፤ ሽን ኦንነ ናጋራ ኦꬆፐ፥ አዉዋ ማታን ኑዉ ጋናትያ የሱስ ክርስቶስ፥ ጽሉ፥ ደኤ። 2 ቃይ ኑን ኑ ናጋራ አቶ ጌተቱሳ ክርስቶሳ ባጋና ደሜቶ፤ ክርስቶስ ያርሸቴዳዌ አሳ ኡባ ናጋራ ድጋናሳፐ አትን፥ ኑ ናጋራ ጻላላ ድጋናሳ ግደና።
3 ኑን ጾሳ አዛዙዋ ናጎፐ፥ ቱሙ አ ኤርያዋ ሄዋን ሻካናዉ ዳንዳዬቶ። 4 እት ኡራይ፥ “ታን አ ኤራይ” ጊደ፥ ቃይ አ አዛዙዋ ናገናን አጎፐ፥ ሄ ኡራይ ዎርዱዋ፤ ቱማተꬃይካ አን ባዋ። 5 ሽን አ ቃላዉ አዛዘትያ ኦና ግዶፐነ፥ ሄ ኡራይ ጾሳ ሲቅያዌ ቱሙ ፖለቴዳ። ኑን ጾሳን ደእያዋ ሀዌ ኑና ኤርሴ። ሄዌካ፥ 6 “ታን፥ ጾሳን ደአይ” ግያ ኦንነ ክርስቶስ ደኤዳዋዳን ደአናዉ በሴ።
ኦራꬃ አዛዙዋ
7 ታ ሲቃቶ፥ ታን ህንተንቶ ኮይሩዋፐ ደእያ ኤጫ አዛዙዋ ጻፋይፐ አትን፥ ኦራꬃ አዛዙዋ ጻፍከ፤ ሄ ኤጫ አዛዙ ህንተ ስሴዳ ቃላ። ዮሃ. 13:34 8 ግዶፐካ፥ ታን ህንተንቶ ላኤንꬁዋ ኦራꬃ አዛዙዋ ጻፋይ፤ ሄ አዛዙዋ ቱማተꬃይካ ክርስቶሳንነ ህንተናን ቤቴ። አያዉ ጎፐ፥ ꬉማይ ꬋዬ፤ ቱሙ ፖኡ ሀእ ፖኤ።
9 ፖኡዋን ደአይ ጊደ፥ ባረ እሻ እጽያ ኦንነ ሀኖ ጋካናዉካ ꬉማን ደኤ። 10 ባረ እሻ ሲቅያ ኦንነ ፖኡዋን ደኤ፤ ሄ ኡራን ሀራ ኡራ ꬉቢያባይ አያይነ ባዋ። 11 ሽን ባረ እሻ እጽያ ኦንነ ꬉማን ደኤ፤ ꬉማን ሀመቴ። ꬉማይ አ አይፍያ ቆቅስ ዎꬄዳ ድራዉ፥ ሀቃ ብንቶነ ኤረና።
12 ታ ናቶ፥ ጾሳይ ክርስቶሳ ሱንꬃ ድራዉ፥
ህንተ ናጋራ አቶ ያጌዳ ድራዉ፥
ታን ህንተንቶ ጻፋይ።
13 አዋቶ፥ ኮይሩዋፐ ደእያዋ ህንተ ኤሬዳ ድራዉ፥
ህንተንቶ ጻፋይ።
ያላጋቶ፥
ጻላህያ ካፑዋ ህንተ ጾኔዳ ድራዉ፥
ህንተንቶ ጻፋይ።
ጉꬃ ናቶ፥ ጾሳ አዉዋ ህንተ ኤሬዳ ድራዉ፥
ህንተንቶ ጻፋይ።
14 አዋቶ፥ ኮይሩዋፐ ደእያዋ ህንተ ኤሬዳ ድራዉ፥
ህንተንቶ ጻፋይ።
ያላጋቶ፥
ህንተ ምኖ ግድያ ድራዉነ
ጾሳ ቃላይ ህንተናን ደእያ ድራዉ፥
ቃይ ጻላህያ ካፑዋ ህንተ ጾኔዳ ድራዉ፥
ህንተንቶ ጻፋይ።
15 ሀ አላምያ ዎይ አላምያን ደእያ አያነ ሲቆፕተ። ህንተ ሀ አላምያ ሲቆፐ፥ ጾሳ ሲቁ ህንተናን ባዋ። 16 አያዉ ጎፐ፥ ሀ አላምያን ደእያ ኡባባይ፥ ሄዌካ: አሳተꬃ አሙ፥ አይፍያን ጼሊደ ካጄልያዌነ ባረ ደእያዋን ጬቀትያዌ ሀ አላምያፐ ዬዳዋፐ አትን፥ ጾሳፐ ይቤና። 17 ሀ አላሚነ ሀ አላምያን አሳይ አሞትያ ኡባባይ አꬋና። ሽን ጾሳይ ጌዳዋ ኦꬅያ ኡራይ መꬍናዉ ደአና።
ክርስቶሳ ኤቀትያዋፐ ናገትያዋ
18 ታ ናቶ፥ ዎድያ ዉርሰꬃይ ማታቴዳ፤ ክርስቶሳ ኤቀትያዌ ስንꬃፐ ያናዋ ህንተ ስሴዳዋዳን፥ ሀራይ አቶ ሀእካ አ ኤቀትያዋንቱ ጮራቱ ደንዴድኖ። ሄዋ ድራዉ፥ ዎድያ ዉርሰꬃይ ማታቴዳዋ ኑን ሄዋን ኤሬቶ። 19 ሀ ኤቀትያዋንቱ ኑ ባጋ ግደና ድራዉ፥ ኑ ግዶፐ ከሴድኖ፤ አያዉ ጎፐ፥ ኡንቱንቱ ኑ ባጋ ግድያባ ግድንቶነ፥ ኑ ግዶን ደአና፤ ሽን ኡንቱንቱፐ ኦንነ ኑ ባጋ ግደናዌ ኤረታና ማላ፥ ኑ ግዶፐ ከሴድኖ።
20 ሽን ክርስቶስ ህንተ ቦላ ጌሻ አያና ጉሴዳ፤ ቃይ ህንተ ኡባይ ቱሙዋ ኤሪታ። 21 ቱሙዋ ህንተ ኤርያ ድራዉነ ቃይ ቱሙዋን ዎርዱ አያይነ ባይናዋ ህንተ ኤርያ ድራዉ፥ ታን ህንተንቶ ጻፋይፐ አትን፥ ቱሙዋ ህንተ ኤረና ድራዉ ጻፍከ።
22 የሱስ ኦከቴዳ ክርስቶሳ ግድያዋ ኤርከ ግያ ኡራፐ አትን፥ ዎርዱ ኦኔ? ሄዌ ጾሳ አዉዋነ ናኣ ኤርከ ግያዌ ክርስቶሳ ኤቀትያዋ። 23 ጾሳ ናኣ ኤርከ ግያ ኦናነ ጾሳ አዉካ ኤረና፤ ጾሳ ናኣ ኤራይ ግያ ኦናነ ቃይ ጾሳ አዉካ ኤሬ።
24 ሄዋ ድራዉ፥ ኮይሩዋፐ ህንተ ስሴዳዋ ህንተ ዎዛናን ምንሲደ ናግተ። ኮይሩዋፐ ስሴዳዋ ህንተ ናጎፐ፥ ህንተንቶ ቃይ ጾሳ ናኣናነ ጾሳ አዉዋና እትፐተꬃይ ደአና። 25 ቃይ ክርስቶስ ባረ ሁጰዉ ኑዉ እማና ጌዳዌ መꬍና ደኡዋ።
26 ታን ሀዋ ህንተንቶ ሄ ህንተና ባለꬅያ አሳቱዋ ድራዉ ጻፋድ። 27 ሽን ክርስቶስ ህንተ ቦላ ባረ ጌሻ አያና ጉሴዳ። ጌሻ አያናይ ህንተናን ደእያ ድራዉ፥ ኦንነ ህንተና ታማርሳና ኮሸና፤ አያዉ ጎፐ፥ አ ጌሻ አያናይ ህንተና ኡባባ ታማርሴ። እ ታማርስያዌ ቱሙዋፐ አትን ዎርዱዋ ግደና። ሄዋ ድራዉ አያና ጌሻ ትምርተዉ አዛዘቲደ፥ ክርስቶሳና እትፐተꬃን ደእተ።
28 ታ ናቶ፥ ቃይ እ ቆንጭያ ዎደ፥ ኑን ያሽ ባይናዋንታ ግዳናዳንነ፥ አ ዩሳ ጋላስ አ ስንꬃን ኑን ዬላተናዳን፥ አናና እትፐተꬃን ደእተ። 29 ክርስቶስ ጽሎ ግድያዋ ህንተ ኤሮፐ፥ ጽሎባ ኦꬅያ ኡባይ ጾሳ ናኣ ግድያዋ ኤራናዉ በሴ።