1 ኑን ጾሳ ናናቱዋ ጌተቲደ ጼሰታና ማላ፥ ጾሳይ ኑና አይ ኬና ሲቄደንቶነ በእተ። ኑን ቱሙካ አ ናናቱዋ። ሀ አላሚ ጾሳ ኤረና ድራዉ፥ ኑናካ ኤረና። ዮሃ. 1:12 2 ታ ሲቃቶ፥ ሀእ ኑን ጾሳ ናናቱዋ፤ ኑን አያ ሀናነንቶ ብሮ ኤረትቤና፤ ሽን ክርስቶስ ቆንጭያ ዎደ፥ ኑን አ ማላታናዋ ኤሬቶ። አያዉ ጎፐ፥ እ ቱሙ አ ግድያዋ ኑን ኩመንꬃን በአና። 3 ቃይ ክርስቶሳ በአና ጊደ ናሸቻን ናግያ ኦንነ ክርስቶስ ጌሻ ግዴዳዋዳን፥ ባረና ጌሼ።

4 ናጋራ ኦꬅያ ኡባይ ጾሳ ህግያ መንꬄ፤ አያዉ ጎፐ፥ ናጋራይ ጾሳ ህግያ መንꬁሳ። 5 ክርስቶስ አሳ ናጋራ ꬋይሳናዉ ቆንጬዳዋ ህንተ ኤሪታ፤ አን ናጋራይ ባዋ። ዮሃ. 1:29 6 ክርስቶሳን ደእያ ኦንነ ናጋራ ኦꬂደ ደኤና፤ ቃይ ናጋራ ኦꬂደ ደእያ ኦንነ አ በእቤና ዎይ ኤርቤና።

7 ታ ናቶ፥ ኦንነ ህንተና ባለꬆፖ። ክርስቶስ ጽሎ ግድያዋዳን፥ ጽሎባ ኦꬅያ ኡራይ ጽሉዋ። 8 ጻላህያ ካፑ ኮይሩዋፐ ናጋራ ኦꬄዳ ድራዉ፥ ናጋራ ኡባ ዎደ ኦꬅያ ኡራይ ጻላህያ ካፑዋሳ፤ ሄዋ ድራዉ፥ ጾሳ ናአይ ጻላህያ ካፑዋ ኦሱዋ ꬋይሳናዉ ቆንጬዳ። 9 ጾሳ ናናቱዋ ግድያ ኡባይ ጾሳ መታይ ኡንቱንቱን ደእያ ድራዉ፥ ናጋራ ኡባ ዎደ ኦꬅክኖ፤ ቃይ ጾሳይ ኡንቱንቱ አዉዋ ግድያ ድራዉ፥ ናጋራ ኦꬃናዉ ዳንዳይክኖ። 10 ጾሳ ናናቱ ግዱዋንነ ጻላህያ ካፑዋ ናናቱዋ ግዶን ደእያ ዱማተꬃይ ሀዋን ኤረቴ፤ ጽሎባ ኦናዋንቱነ ዎይ ባረ እሻ ሲቀናዋንቱ ኦንነ ጾሳ ናናቱዋ ግድክኖ።

11 አያዉ ጎፐ፥ ኮይሩዋፐ ህንተ ስሴዳ ኪታይ፥ “እቱ እቱዋና ሲቀታናዉ በሴ” ያግያዋ። ዮሃ. 13:34 12 ኑን ቃዬላ ማላ ግዳናዉ በሰና። ቃዬል ጻላህያ ካፑዋሳ፤ ሄዋ ግዶ ድራዉ፥ ባረ እሻ ዎꬌዳ። እ ባረ እሻ አያዉ ዎꬌዴ? እ ኦꬄዳ ኦሱ ኢታ ግድና፥ አ እሻይ ኦꬄዳ ኦሱ ሎአ ግዴዳ ድራዉ ዎꬌዳ።ዶመꬃ 4:8

13 ታናዳን ጾሳ ካልያዋንቶ፥ ሀ ሳኣ አሳይ ህንተና እጾፐ፥ ኦራꬃባ ጎፕተ። 14 ኑን አማንያዋንታ ሲቅያ ድራዉ፥ ሀይቁዋፐ ደኦ ፕኔዳዋ ኤሬቶ፤ አማንያዋንታ ሲቀና ኡራይ ኦንነ ሀይቁዋ ግዶን ደኤ። 15 አማንያዋንታ እጽያ ኦንነ ሸምፑዋ ዎꬌዳዋ፤ ቃይ ሸምፑዋ ዎꬌዳዋን መꬍና ደኡ ባይናዋ ህንተ ኤሪታ። 16 ክርስቶስ ባረ ሸምፑዋ ኑ ድራዉ አꬂደ እሜዳዋን ሲቁ አየንቶ ኑን ኤሬዶ፤ ኑንካ አማንያዋንቱ ድራዉ፥ ኑ ሸምፑዋ አꬂደ እማናዉ በሴ። 17 ሽን ዱረ አሳይ ኦንነ ባረ እሻይ መቶትያዋ በኢደ፥ አዉ ቃረተናን እጾፐ፥ ባረ ዎዛናን ጾሳ ሲቃይ ጋናዉ ዋን ዳንዳዪ? 18 ታ ናቶ፥ ኑን ኦሱዋንነ ቱማተꬃን ሲቀቶይተፐ አትን፥ ጮ ሃሳያን ዎይ ቦላ ዶናን ሲቀታናዉ በሰና።

19-20 ኑን ቱሙዋ ባጋን ደእያዋ ሄዋን ኤራና፤ ቃይ ኑ ዎዛናይ ኑ ቦላ ፕርድያ ዎደ ኡባን፥ ጾሳ ስንꬃን ቱማተꬃ ኑና ሄዋን ኤርሴ። አያዉ ጎፐ፥ ጾሳይ ኑ ዎዛናፐ ዎልቃማ፤ ቃይ እ ኡባባ ኤሬ።

21 ታ ሲቃቶ፥ ኑ ዎዛናይ ኑ ቦላ ፕርደናዋ ግዶፐ፥ ኑን ጾሳ ስንꬃን ያዮኮ። 22 ኑን አ አዛዙዋ ናግያ ድራዉነ አ ናሸችያባ ኦꬅያ ድራዉ፥ ዎስያ ኡባባ አፐ አኬቶ። 23 ጾሳ አዛዙ ሀዋ: ክርስቶስ ኑና አዛዜዳዋዳንካ፥ ጾሳ ናኣ የሱስ ክርስቶሳ ሱንꬃን ኑን አማናናዳንነ እቱ እቱዋና ሲቀታናዳን ጾሳይ ኑና አዛዜዳ። 24 ጾሳ አዛዙዋ ናግያ ኦንነ ጾሳ ግዶን ደኤ፤ ጾሳይካ አ ግዶን ደኤ፤ ጾሳይ ኑዉ እሜዳ አ አያና ባጋና እ ኑ ግዶን ደእያዋ ኑን ኤሬቶ።