1 ታ ሲቆቶ፥ ጾሳ አያናይ ታናን ደኤ ግያ ኡባ አማኖፕተ፤ ሽን ኡንቱንቱን ደእያ አያናይ ጾሳፔየ ዎይ ግደነንቶ ፓጭተ። አያዉ ጎፐ፥ ጮራ ዎርዶ ናባቱ ኡባሳ ቤድኖ። 2 ጾሳ አያና ግድያዋ ህንተ ሀዋን ኤራና፤ “የሱስ ክርስቶስ አሳ ግዲደ ዬዳዋ አማናይ” ግያ ኦናንነ ደእያ አያናይ ኡባይ ጾሳፐ ዬ። 3 ቃይ ክርስቶስ አሳ ግዲደ ዬዳዋ አማናይ ጌናዋ አያናይ ኡባይ ጾሳፐ ይቤና፤ አን ክርስቶሳ ኤቀትያ አያናይ ደኤ። ህንተ ሄዌ ያናዋ ካሰ ስሴድታ፤ እ ሀራይ አቶ ሀእካ ሀ አላምያን ደኤ።

4 ታ ናቶ፥ ህንተ ጾሳዋንታ፤ ህንተ ግዶን ደእያ ጌሻ አያናይ ሀ አላምያን ደእያ አያናፐ ዳሮ ዎልቃምያ ድራዉ፥ ዎርዶ ናባቱዋ ህንተ ጾኔድታ። 5 ኡንቱንቱ ሀ አላምያ አሳ ግድያ ድራዉ፥ ሀ አላምያባ ሃሳዪኖ፤ ሀ አላምያ አሳይካ ኡንቱንቱ ሃሳያ ስሴ። 6 ኑን ጾሳዋንታ፤ ጾሳ ኤርያ ኦንነ ኑን ግያዋ ስሴ። ጾሳ ኤረና ኦንነ ኑን ግያዋ ስሰና። ኑን ቱሙ አያናነ ዎርዶ አያና ሄዋን ሻኬቶ።

7 ታ ሲቃቶ፥ ሲቁ ጾሳፐ ይያ ድራዉ፥ አነ እቱ እቱዋና ሲቀቶይተ። ሲቀትያ ኦንነ ጾሳ ናና፤ ጾሳካ ኤሪኖ። 8 ጾሳ ኤሻይ ሲቆ ግድያ ድራዉ፥ ሲቀና ኡራይ ኦንነ ጾሳ ኤረና። 9 ጾሳይ ኑና ባረ ሲቁዋ ሀዋን በሴዳ፤ ኑን አ ባጋና ደኡዋ ደማና ማላ፥ ባረ እት ናኣ ሀ አላምያ ኪቴዳ። 10 ሲቁዋ ግያዌ ሀዋ፤ ጾሳይ ኑና ሲቂደ፥ ኑን ኑ ናጋራፐ ማሮተꬃ ደሜዳ ባረ ናኣ ኑዉ ኪቴዳፐ አትን፥ ኑን አ ሲቄዳዋና ግደና።

11 ታ ሲቆቶ፥ ጾሳይ ኑና ሀዋዳን ሲቄዳዋ ግዶፐ፥ ኑንካ እቱ እቱዋና ሲቀታናዉ በሴ። 12 ጾሳ ኦንነ ሙለካ በእቤና፤ ኑን እቱ እቱዋና ሲቀቶፐ፥ ጾሳይ ኑ ግዶን ደኤ፤ አ ሲቁካ ኑ ግዶን ፖለቴዳ።

13 ጾሳይ ባረ አያና ኑዉ እሜዳ ድራዉ፥ ኑን ጾሳ ግዶን ደእያዋነ እካ ኑ ግዶን ደእያዋ ኤሬቶ። 14 ጾሳ አዉ ባረ ናኣ ሀ አላምያ አሽያዋ ግዳናዉ ኪቴዳዋ ኑን በኢደ ማርካቴቶ። 15 የሱስ ጾሳ ናኣ ግድያዋ ማርካትያ ኦ ግዱዋንነ ጾሳይ ደኤ፤ እካ ጾሳ ግዶን ደኤ። 16 ጾሳይ ኑና ሲቅያዋ ኑን ኑ ሁጰዉ ኤሬቶነ አማኔቶ።

ጾሳይ ሲቁዋ። ሲቁዋን ደእያ ኦንነ ጾሳ ግዶን ደኤ፤ ጾሳይካ አ ግዶን ደኤ። 17 ኑ ደኡ ሀ አላምያን ክርስቶስ ደኤዳዋ ማላ ግድያ ድራዉ፥ ፕርዳ ጋላስ ኑን ያየና ማላ፥ ሲቁ ኑ ግዶን ፖለቴዳ። 18 ሲቁዋን ያሽ ባዋ፤ ጋሱካ ቱሙ ሲቁ ያሻ ከስ ኦሌ። ያሻይነ ሙራይ እትፐ ብያ ድራዉ፥ ያይያ ኡራ ሲቁ ኩመንꬃ ግደና።

19 ጾሳይ ኮይሮ ኑና ሲቄዳ ድራዉ፥ ኑን አ ሲቄዶ። 20 ኦንነ፥ “ታን ጾሳ ሲቃይ” ጊደ ባረ እሻ እጾፐ፥ እ ዎርዱዋ። አያዉ ጎፐ፥ በኤዳ ባረ እሻ ሲቀናዌ በእቤና ጾሳ ሲቃናዉ ዋን ዳንዳዪ? 21 ቃይ ክርስቶስ ኑዉ እሜዳ አዛዙ ሀዋ፤ ጾሳ ሲቅያ ኡራይ ባረ እሻካ ሲቃናዉ በሴ።