1 ኦከቴዳ ክርስቶሳ ያጊደ፥ የሱሳ አማንያ ኡባይ ጾሳ ናና፤ ቃይ ጾሳ አዉዋ ሲቅያ ኦንነ አ ናናቱዋካ ሲቄ። 2 ኑን ጾሳ ሲቅያዋንነ አ አዛዙዋ ናግያዋን፥ ጾሳ ናናቱዋ ሲቅያዋ ኤሬቶ። 3 አያዉ ጎፐ፥ ኑን ጾሳ ሲቅያዌ አ አዛዙዋ ናግያዋ፤ አ አዛዙካ ዴጾ ግደና። 4 አያዉ ጎፐ፥ ጾሳ ናኣ ግድያ ኦንነ ሀ አላምያ ጾናናዉ ዳንዳዬ፤ ኑንካ ሀ አላምያ ጾናናዌ ኑ አማኑዋና። 5 ሀ አላምያ ጾናናዉ ዳንዳይያዌ ኦኔ? የሱስ ጾሳ ናኣ ግድያዋ አማንያዋ ጻላላይ ጾናና።

6 ጽንቃታ ሃꬃናነ ሀይቁዋ ሱꬃና ዬዳዌ ሀዋ፤ እካ የሱስ ክርስቶሳ፤ ሃꬃናነ ሱꬃና*ሃꬃናነ ሱꬃና፦ የሱስ ሀ አላምያ ዪደ ጽንቃታ ሃꬃ ጻላላና ግደናን ባረ ሀይቁዋ ሱꬃን ዬዳ። ሄዋ ጉሳይ እ አሳ ኩሽያን ጻማቀቱሳ ጻላላ ግደናን፥ ሀ አላምያን ሀይቄዳ ጉሳ። እ ዬዳዋፐ አትን፥ ሃꬃ ጻላላና ይቤና። ጌሻ አያናይ ቱማ ግድያ ድራዉ፥ ሄዌ ቱማ ግድያዋ እ ባረ ሁጰዉ ማርካቴ። 7 አያዉ ጎፐ፥ ሄዙ ማርካቱ ደኢኖ። 8 ሄዋንቱ፥ ጾሳ አያና፥ ሃꬃነ ሱꬃ፤ ሀ ሄዛቱ እቱ እቱዋዋ ጳልቂክኖ። 9 ኑን አሳይ ማርካትያዋ አማኖፐ፥ ጾሳይ ማርካትያዌ አሳዋፐ ሎይꬅ አꬌ፤ አያዉ ጎፐ፥ ጾሳይ ባረ ናኣባ ማርካቴዳ ማርካተꬃይ ሀዋ። 10 ጾሳ ናኣ አማንያ ኡራ ዎዛናን ሀ ማርካተꬃይ ደኤ። ጾሳ አማነና ኡራይ ኦንነ ጾሳይ ባረ ናአዉ ማርካቴዳ ማርካተꬃ አማንቤና ድራዉ፥ ጾሳ ዎርዱዋ ጌ።

11 ስም ማርካተꬃይ ሀዋ፤ ጾሳይ ኑዉ መꬍና ደኡዋ እሜዳ፤ ሄዌካ አ ናኣን ደኤ። 12 ጾሳ ናአይ ደእያ ኦስነ ደኡ ደኤ፤ ጾሳ ናአይ ባይና ኦስነ ደኡ ባዋ።

13 ጾሳ ናኣ ሱንꬃን አማንያ ህንተንቶ መꬍና ደኡ ደእያዋ ህንተ ኤራና ማላ፥ ሀዋ ህንተንቶ ጻፋድ። 14 ጾሳይ ኮይያዋዳን፥ አይነ ኑን አ ዎሶፐ፥ እ ስስያዋ ኑን ኤርያ ድራዉ፥ አ ስንꬃን ያዮኮ። 15 ኑን ዎስያ ኡባን እ ስስያዋ ኤሮፐ፥ ኑን አ ዎሴዳዋ እ ዛሬዳዋ ኤሬቶ።

16 ኦንነ ሀይቁ በሰና ናጋራ ባረ እሻይ ኦꬅሽን በኦፐ፥ ጾሳ ዎሳናዉ በሴ፤ ሀይቁ በሰና ናጋራ ኦꬄዳዋንቶ ጾሳይ ደኡዋ እማና። ሀይቁ በስያ ናጋራይ ደኤ፤ ታን ህንተና ሄዎ ጾሳ ዎስተ ጊከ። 17 ባይዞ ኦሱ ኡባይ ናጋራ፤ ሽን ሀይቁ በሰና ናጋራይ ደኤ።

18 ጾሳ ናናይ ኦንነ ናጋራ ኡባ ዎደ ኦናዋ ኑን ኤሬቶ። አያዉ ጎፐ፥ ጾሳ ናአይ ኡንቱንታ ናጌ፤ ቃይ ጻላህያ ካፑካ ኡንቱንታ ቆሀናዉ ዳንዳየና። 19 ኑን ጾሳዋንታ ግድያዋነ ሀ አላሚ ኡባይ ጻላህያ ካፑዋን ሞደቴዳዌ ኤሬቶ።

20 ኑን ቱሙ ጾሳ ኤራናዳን፥ ጾሳ ናአይ ዬዳዋነ ኑዉ አኬካ እሜዳዋ ኤሬቶ። ኑን ቱሙ ጾሳ ግዶን፥ አ ናኣ የሱስ ክርስቶሳ ግዶን ደኤቶ፤ እ ቱሙ ጾሳነ መꬍና ደኡዋ።

21 ታ ናቶ፥ ኤቃቱዋፐ ህንተ ሁጲያ ናግተ።