1 ጺሮሳ ካቲ ኪራም ዳዊታና ኡባ ገደ ሲቀቲደ ጋምኤዳ ድራዉ፥ ሶሎሞነ ባረ አዉዋ ዳዊታ ኮታን ካተታናዉ ኦከቴዳዋ ስሲደ፥ ባረ ኦሳንቻቱዋ ሶሎሞነኮ ኪቴዳ። 2 ሶሎሞነካ ኪራማዉ ዛሪደ ሀዋዳን ያጊደ ኪቴዳ፤ 3 “መꬍና ጎዳይ አ ሞርከቱዋ አ ገድያፐ ጋርሳና ሞድሳና ጋካናዉ፥ ታ አዉዋ ዳዊታ ቦላ ኡባ ሳና ደንዴዳ ኦላ ጋሱዋን፥ መꬍና ጎዳ ባረ ጾሳ ሱንꬃዉ ጌሻ ጎልያ እ ኬጽቤናዋ ኔን ኤራሳ። 4 ሽን ሀእ መꬍና ጎዳይ ታ ጾሳይ ታዉ ኡባ ሳና ሸምፑዋ እሜዳ፤ ታዉ አያ ሞርኪካ ዎይ ኢታባይካ ባዋ። 5 መꬍና ጎዳይ ታ አዉዋ ዳዊታዉ፥ ‘ታን ነ ኮታን፥ ነ ካዉተꬃ አራታን ካተይያ ነ ናአይ ታ ሱንꬃዉ ጌሻ ጎልያ ኬጻና’ ጌዳዋዳንካ፥ ታን መꬍና ጎዳ ታ ጾሳ ሱንꬃዉ ጌሻ ጎልያ ኬጻናዉ ቆፓዲ። 2 ሳሜላ 7:12-13፤ 1 ኦዱዋ 17:11-12 6 ሄዋ ድራዉ፥ ሊባኖሳፐ ዝጋ ታዉ ቃንጽያ አሳቱዋ አዛዛ፤ ታ አሳቱ ነ አሳቱዋና ኦꬃናዋንታ። ያቶፐ ነ አሳቶ ኔን ጭጋ ጌዳ ድርጉዋ አያ ግዶፐነ፥ ታን ጭጋና። ሲዶና አሳቱዋዳን ምꬃ ቃንጹዋ ሂላ ኑ አሳይ ኤረናዋ ኔን ኤራሳ” ያጌዳ።

7 ኪራም ሶሎሞና ኪታ ስሲደ ሎይꬅ ናሸቲደ፥ “ሀ ዎልቃማ ካዉተꬃ ሞዳና ማላ፥ ዳዊታዉ ሀ አꬌዳ ኤራንቻ ናኣ እሜዳ መꬍና ጎዳይ ጋላተቶ” ያጌዳ።

8 ሄዋፐ ጉይያን ኪራም ሶሎሞናዉ ሀዋዳን ያጊደ ኪቴዳ፤ “ኔን ታዉ ኪቴዳ ኪታይ ታና ጋኬዳ። ኔን ኮዬዳዋ ኡባ ታን ኦꬃና፤ ዝጋ ሙደꬃነ ጽድያ ሙደꬃ ታን ነዉ ሺሻና። 9 ታ አሳቱ ነ ሙደꬃ ሊባኖሳፐ ዱገ አባዉ ኬዛናዋንታ። ታን ቃሽሳደ፥ አባ ቦላና ቶከቲደ ኔን ማላቶ ሳኣ ጋካናዳን ኦꬃና፤ ታን ያን ብልሳደ ያፐ አፍሳና። ሄዋፐ ጉይያን ኔን ነ ባጋና ታ ካትያ ጎለን ደእያ አሳዉ ምያባ ኪትያዋን ታ ኮይያዋ ፖላናሳ” ያጌዳ።

10 ሄዋዳን ኦꬂደ ኪራም ሶሎሞነ ኮዮዋ ኬሻ ዝጋ ሙደꬃነ ጽድያ ሙደꬃ ኡባ እሜዳ። 11 ሶሎሞነካ ካትያ ጎለን ደእያ አሳይ ማናዉ ላታሙ ሻአ ኮንታለ ዛርጋነ ኦይዱ ጼቱ ሻአ ሊትሮ ጌሻ ዎጋራ ዛይትያ ላይꬃን ላይꬃን ፓጨናን ኪራማዉ እሜዳ። 12 መꬍና ጎዳይ ሶሎሞናዉ እማና ጌዳዋዳን፥ አዉ አꬌዳ ኤራ እሜዳ። ኪራመነ ሶሎሞነ ባረንቱ ግዶን ሳሮ ደኤድኖ፤ ኡንቱንቱ ላኡ ባረንቱ ግዶን ቃላ ጫቁዋ ጫቀቴድኖ።

13 ካቲ ሶሎሞነ እስራኤልያ ኡባፐ ሀታሙ ሻአ ጎሻንቻቱዋ ዶሪደ ከሴዳ። 14 አዶንራማ ግያ ብታንያ ኡንቱንቱ ቦላ ካፑዋ ኦꬂደ ሱንꬄዳ። ጋባራቱዋካ ታሙ ሻኣ ታሙ ሻኣ ሻክ፥ ሄዙ ጭታ ከሴዳ፤ እት እት ጭታይ ታራን ታራን ቢደ፥ እት አግና ሊባኖሳን ኦꬃናዳንነ ላኡ አግና ባረንቱ ሶን ደአናዳን ቆፔዳ። 1 ካታ. 12:18 15 ሶሎሞናዉ ቶኩዋ ቶክያ ላፑን ታሙ ሻአ አሳቱነ ሹቻ ቆእያ ሆስፑን ታሙ ሻአ አሳቱ ገዝያን ደኢኖ። 16 ሀዋንቱ ካፑዋ ግዲደ አሳ ኪታ ኦስስያ ሄዙ ሻአነ ሄዙ ጼቱ አሳቱዋ ጊግሴዳ። 17 ኦሳንቻቱ ካቲ ሶሎሞነ አዛዝና፥ ጌሻ ጎልያዉ ባሶ ግዳና ማላ ዎጋ ሙሩታ ሹቻቱዋ ቆኢደ ማሴድኖ። 18 ሶሎሞና አሳቱነ ኪራማ አሳቱ ኩሽያ ሂላ ኤርያዋንቱ፥ ጌባላ አሳቱዋናካ ግዲደ፥ ጌሻ ጎልያ ኬጻናዉ ምꬃ ቃንጺደነ ሹቻ ቆኢደ ጊግሴድኖ።