1 እስራኤልያ አሳይ ግብጼ ጋድያፐ ከሴዳ ኦይዱ ጼታነ ሆስፑን ታማንꬃ ላይꬃን፥ ሶሎሞነ እስራኤልያ ቦላ ካዉቴዳ ኦይደንꬆ ላይꬃን፥ ዚፋ ግያ ላኤንꬆ አግናን፥ ሶሎሞነ መꬍና ጎዳ ጌሻ ጎልያ ኬጻናዉ ዶሜዳ። 2 ሶሎሞነ መꬍና ጎዳዉ ኬጼዳ ጌሻ ጎሊ ጌሳይ ኡሱፑን ታሙ ዋꬋ አዱሳ፤ ጎምፓይ ላታሙ ዋꬋ አካ፤ ጌሳይ ሀታሙ ዋꬋ ꬎቃ። 3 ጌሻ ጎልያ ገልያ ሳኣን ደእያ ባራንዳይ ቦከት ገሌዳ ኦላይ ጌሻ ጎልያ ጎምፓ ኬሻ ላታሙ ዋꬋ፤ ጎልያ ጎምፓይ ጌሻ ጎልያ ገልያ ሳኣ ጋካናዉ ታሙ ዋꬋ። 4 ጌሻ ጎልያዉ ሶ ባጋና አኪደ፥ ካረ ባጋና ጹሜዳ ማስኮተቱ ደኢኖ። 5-6 ሄ ጎልያ ዩሹዋን ሀራ ክፍለቱዋ ኬጼዳ፤ ሄ ሻካቱ ሄዙ ፖቀቱ ደእያዋንታ፤ ሜጋ የግያ ምꬃይ ጌሻ ሳኣ ግዶ ገለና ማላ፥ ኮይሮ ጎዳና ኦይሰꬂደ ሹቻ ዎꬂደ፥ ግምቢያዉ ህርክ ዉርሰꬃ ኦርድሴዳ። ሄዋ ጋሱዋን ጋርሳ ኮይሮ ፖቂ እቼሹ ዋꬋ አካ፤ ላኤንꬆ ፖቂ ኡሱፑን ዋꬋ አካ፤ ሄዘንꬆ ፖቂ ላፑን ዋꬋ አካ።

7 ጌሻ ጎሊ ህን ቆኢያሳን ማሰቴዳ ሹቻ ጻላላን ግምበቴዳ፤ ያትና፥ ጌሻ ጎሊ ግምበቴዳ ዎደ፥ ድጅኑዋ፥ ካልታ፥ ዎይ ሀራ አይ ብራታ ኮሻይነ ጌሻ ጎልያን ስሰትቤና።

8 ኡባፐ ጋርሳና ደእያ ፖቅያ ገልያ ፐንጊ ጌሻ ጎልያፐ ገድሳ ባጋና ደኤ፤ ሄ ሳፐ ላኤንꬆ ፖቅያዉነ ሄዘንꬆ ፖቅያዉ ባናዉ የꬍ ከስያ ደꬃቱ ደኢኖ። 9 ሄዋዳን ኦꬂደ፥ ሶሎሞነ ጎልያ ኬጺደ ፖሌዳ፤ ያቲደ ዝጋ ጻዉላነ ማሰꬃ ቦላና ካሜዳ። 10 ቃይ ጌሻ ጎልያ ዩሹዋን ፖቀቱዋ ኬጺደ ፖሌዳ፤ ኡንቱንቱ ꬎቃተꬃይ እቱዋዌ እቱዋዌ እቼሹ ዋꬋ ግዲደ፥ ጎዳና ዝጋ ጻዉላን ኦይቀቴድኖ።

11 መꬍና ጎዳ ቃላይ ሶሎሞነኮ ዬዳ፤ ሶሎሞና፥ 12 “ሀ ኔን ኬጽያ ጌሻ ጎልያ ግዶፐ፥ ኔን ታ አዋዩዋ ካሎፐ፥ ታ ዎጋ ኦꬆፐ፥ ታ አዛዙዋ ኡባ ናጎፐነ አዛዘቶፐ፥ ታን ነ አዉዋ ዳዊታዉ እሜዳ ህዶታ ነ ባጋና ፖላና። 13 ያታደ ታን እስራኤልያ አሳ ግዶን ደአና፤ ታን ታ አሳ እስራኤልያ አግከ” ያጌዳ።

14 ሶሎሞነ ጌሻ ጎልያ ኬጺደ ፖሌዳ። 15 ጌሻ ጎልያዉ ሶ ባጋ ጎዳ፥ ዉይግያፐ ቢደ ካራ ጋካናዉ ዝጋ ጻዉላ ልቅ ካሜዳ፤ ቃይ ዉይግያንካ ጽድያ ጻዉላ ሂጼዳ። 16 ጌሻ ጎልያ ግዶን ኡባፐ አꬍያ ጌሻ ሳኣ ግያ ቆልኡዋ መꬋናዉ፥ ጉየ ባጋና ላታሙ ዋꬋ ግድያ ሳኣ ሻኬዳ፤ ዉይግያፐ ካራ ጋካናዉ ዝጋ ጻዉላ ጎዳ ኤሴዳ። ከሳ 26:33-34 17 ሄ ቆልኡዋፐ ስንꬃ ባጋና ደእያ ዉይግያ ጌሳይ ኦይታሙ ዋꬋ አዱሳ። 18 ጌሻ ጎልያዉ ሶ ባጋይ ማሴዳ ጎስያነ ጪሼዳ ጪሻ ምስልያ መꬌዳ ዝጋ ጻዉላን ልቅ ካመቴዳ፤ ኡባባይካ ዝጋ፤ አይ ሹችነ ቤተና።

19 ሶሎሞነ መꬍና ጎዳ ቃላ ጫቁዋ ታቦታ ዎꬃናዉ ጌሻ ጎልያ ግዶን ኡባፐ አꬍያ ጌሻ ሳኣ ጊግሴዳ። 20 ኡባፐ አꬍያ ጌሻ ሳአይ ላታሙ ዋꬋ አዱሳ፥ ላታሙ ዋꬋ አኮነ ላታሙ ዋꬋ ꬎቃ። ሶሎሞነ ሄ ቆልኦ ሶ ባጋ ዋላካይ ባይና ዎርቃን ሼሼዳ። ቃይ ያርሽያ ሳአይካ ዝጋ ጻዉላን ካመቴዳ። 21 ሶሎሞነ ጌሻ ጎልያ ግዱዋ ዋላካይ ባይና ዎርቃን ሼሼዳ፤ ዎርቃ ሼሼዳ ቆልኡዋ ገልያ ፐንግያዉ ቦላ ጉባንያ ያነ ሃነ ጋክያ ዎርቃ ሳንሳላታ አሌቂሴዳ። 22 ያቲደ ጎልያ ግዶ ኡባ ዎርቃን ሼሼዳ፤ ቃይ ኡባፐ አꬍያ ጌሻ ሳኣ ስንꬃን ደእያ ያርሽያ ሳኣ ዎርቃን ሼሼዳ። ከሳ 30:1-3

23 ኡባፐ አꬍያ ጌሻ ሳኣን ዎꬃናዉ እቱ እቱ ታሙ ዋꬋ አዱቂያ ዎጋራፐ ላኡ ክሩበቱዋ ምስለቱዋ ማሲደ ጊግሴዳ። ከሳ 25:18-20 24 ኮይሮ ክሩብያ ቀፊ እቱ እቼሹ ዋꬋ፤ ላኤንꬁ ቃይ እቼሹ ዋꬋ፤ ኮይሮ ቀፍያ ጼራፐ ቢደ ላኤንꬆ ቀፍያ ጼራ ጋካናዉ ታሙ ዋꬋ። 25 ላኤንꬆ ክሩቢካ ታሙ ዋꬋ፤ ላኡ ክሩበቱዋ መꬋይነ ማላይ እት ማላ። 26 እት ክሩብያ ጌሳይ ታሙ ዋꬋ፤ ላኤንꬁካ ሄዋ ኬሻ። 27 ሶሎሞነ ጌሻ ጎልያን ደእያ ኡባፐ አꬍያ ጌሻ ሳኣን ክሩበላ ዎꬄዳ። ኡንቱንቱ ቀፊ ምጨት ኡቴዳ፤ እት ክሩብያ ቀፊ እት ባጋ ጎዳ ቦችያ ዎደ፥ ህንኮ ክሩብያ ቀፊ ቃይ ህንኮ ባጋ ጎዳ ቦቼ፤ ኡንቱንቱ ላኡዋ ቀፈቱካ ሶ ግዶን እቱ እቱዋ ቦቺኖ። 28 ሶሎሞነ ክሩበቱዋካ ዎርቃን ሼሼዳ።

29 ቆልኡዋነ ዉይግያ ጎዳ ኡባ ክሩበላ፥ ዛምባነ ጪሼዳ ጪሻ ምስልያ ማሴዳዋን አሌቂሴ። 30 ጌሻ ጎልያዉ ሶ ግዶ ክፍልያ ዉይግያካ ካረ ባጋ ክፍልያ ዉይግያካ ዎርቃን ሼሼዳ።

31 ኡባፐ አꬍያ ጌሻ ሳኣ ገልያ ፐንግያዉ ዎጋራ ምꬃፐ ሳንቃቱዋ ከሴዳ። ቆስለꬃቱ እቼሹ ባጋና ዞዚ ደእያዋንታ። 32 ዎጋራ ምꬃፐ ኦሰቴዳ ላኡ ሳንቃቱ ቦላን ክሩቤላ፥ ዛምባነ ጪሼዳ ጪሻ ምስልያ ማሲደ፥ ሳንቃቱዋ፥ ክሩበቱዋነ ዛምባ ዎርቃን ሼሼዳ። 33 ሄዋዳንካ፥ ጌሻ ጎልያ ዉይግያ ገልያ ፐንግያዉ ዎጋራፐ ከሴዳ ኦይዱ ዞዝያና ደእያ ቆስለꬃ ኤሴዳ። 34 እ ቃይ ሄ ፐንግያዉ እት እት ሳንቃይ ግዱዋን ዳኮቲደ ዶየትያ ላኡ ሳንቃቱዋ ከሴዳ። 35 ክሩበቱዋ፥ ዛምባነ ጪሼዳ ጪሻ ምስለቱዋ ኡንቱንቱ ቦላ ማሴዳ፤ ሄ ማሰቴዳዋንቱ ቦላ ዎርቃ እት ማላ ኦꬂደ ሼሼዳ።

36 ሶ ባጋና ደእያ ጉታራ ግምቤዳ፤ ሄ ግምቢ ማሰቴዳ ሹቻ ሄዛቱዋ፥ እቱዋ እቱዋ ቦላ ዎꬂደ፥ እት ዝጋ ማሰꬃ ኡንቱንቱ ቦላ ዎꬂደ ግምቤዳዋ።

37 መꬍና ጎዳ ጌሻ ጎልያ ባሱ ሶሎሞነ ካዉቴዳ ኦይደንꬃ ላይꬃን፥ ዚፋ ግያ ላኤንꬆ አግናን ባሰቴዳ። 38 ሶሎሞነ ካዉቴዳ ታማነ እተንꬅያ ላይꬃን፥ ቡላ ግያ ሆስፑንꬃ አግናን ጌሻ ጎሊ ሀልቼዳዋዳን ኡባና ኬጸቲደ ፖለቴዳ። ሶሎሞነ ጌሻ ጎልያ ላፑን ላይꬃን ኬጺደ ዉርሴዳ።