ጳዉሎስ
ቆሮንቶሳ አሳዉ
ጻፌዳ ላኤንꬆ ኪታ
ገሉዋ
ጳዉሎስ ቆሮንቶሳ አሳዉ ጻፌዳ ላኤንꬆ ኪታይ ጻፈቴዳዌ፥ ጳዉሎሳዉ ቆሮንቶሳን ደእያ አማንያ አሳና ደእያ ጋከꬃይ ዳሮ መቱዋ ግዶ ገል ኡቴዳ ዎድያና። እት እት አማንያ አሳቱ እት እት ቶሽያ ጳዉሎሳ ቦላ ዎꬄድኖ፤ ግዶፐነ ጳዉሎስ ስጋተꬃ መꬋናዉ ላሞታይ ባረዉ ደእያዋ በሲደ፥ ሄዌ ሀንያ ዎደ ዎልቃማ ናሸቻ ናሸታናዉ ዳንዳይያዋ ቆንጭሴ።
ሀ ኪታ ኮይሮ ዶመꬃን ጳዉሎስ ቆሮንቶሳን ደእያ አማንያዋንቱና ባረዉ ደእያ ጋኮተꬃ ቆንጭሲደ፥ አማንያዋንቱ ግዶን ደንዴዳ ቶሽያስነ ጳልቀꬃዉ፥ እ ኡንቱንቶ አያዉ ምኖ ዛሩዋ እሜደንቶ ኦዴ። ሄዋናካ ጋꬂደ ሀዌ አ ሴራይ ኡንቱንታ ናጋራፐ ስማዉነ ስጋተꬃዉ ካለꬄዳ ድራዉ፥ ስሰቴዳ ናሸቻ ኡንቱንቶ ቆንጭሴ። ካሊደ ቃይ ይሁዳን ደእያ አማንያዋንታ ማድያዋ ባረንቱዋፐ ጮ እማና ማላ፥ ኡንቱንታ ሀሳይሴ። ዉርሰꬃ ሸምፓቱዋን ጳዉሎስ የሱሳፐ ኪተቴዳዋ ግድያዋ ቦላ ሺቄዳ ሞቶ ዛሩዋ ቃላ እሜ። አያዉ ጎፐ፥ ቆሮንቶሳ አማንያዋንቱ ግዶን እት እት አሳቱ ባረንታ ቱሙ የሱስ ኪቴዳዋንታ ከሲደ፥ “ጳዉሎስ የሱስ ኪቴዳዋ ግደና፤ እ ዎርዱዋ” ያጊደ፥ አ ሞቲኖ።
ሸምፓቱዋ ኡባቶ እመቴዳ ቃንꬃ ቆፋቱዋ
ኡባፐ ስንꬃትያ የዉዋ 1:1-11
ጳዉሎሳነ ቆሮንቶሳን ደእያ አማንያዋንታ 1:12—7:16
ይሁዳን ደእያ አማንያዋንቶ እመቴዳ ማዱዋ 8:1—9:15
ጳዉሎስ ባረ ኪተቴዳ ማታዉ ኤቀታናዉ ሺሼዳ ቃላ ማርካ 10:1—13:10
ዉርሰꬃ ቁትያ 13:11-14
1
1 ታን ጳዉሎስ፥ ጾሳ ሸንያን፥ ክርስቶስ የሱስ ኪቴዳዌነ ኑ እሻይ ጽሞቶስ ጾሳዉ ጎይንያ ቆሮንቶሳ ካታማን ደእያ አማንያዋንቶነ አካይያን ደእያ ጾሳ ናናቶ ሀ ዳብዳቢያ ጻፌቶ።
2 ጾሳ ኑ አዉዋፐነ ጎዳ የሱስ ክርስቶሳፐ፥ አꬎ ኬካተꬃይነ ሳሮተꬃይ ህንተንቶ ግዶ።
ጳዉሎስ ጾሳዉ ሺሼዳ ጋላታ
3 ጾሳ ኑ ጎዳ የሱስ ክርስቶሳ አዉዋ፥ ማሮተꬃ አዉዋነ መንꬁዋ ኡባ ጾሳ ጋላታይ ጋኮ፤ 4 ጾሳይ ኑና ኑ ሁጰዉ መንꬄዳ መንꬁዋዳን፥ ዳሮ ዋይያ ዋየትያዋንታ ኑንካ መንꬃናዳን፥ ኑ ዋይያ ኡባን እ ኑና መንꬄ። 5 አያዉ ጎፐ፥ ኑን ክርስቶሳ ባጋና ዳሮ ዋይያ ዋየትያዋዳን፥ ሄዋዳንካ፥ ቃይ ኑና አ ባጋና ዳሮ መንꬁዋን መንꬄ። 6 ኑን ዋየቶፐ፥ ሄዌ ህንተና መንꬃናሳነ ህንተና አሻናሳ፤ ቃይ ኑን ምነቶፐ፥ ኑን ዳንዳዬዳ ዋይያ ማላ ህንተካ ገንጪደ ዳንዳያና ማላ፥ ጾሳይ ህንተዉካ ቃይ መንꬁዋነ ዳንዳያ እማናሳ። 7 ህንተ ደማና ጊደ፥ ህዶታን ናግ ኡቴዳዌ ዳሮ ምና፤ አያዉ ጎፐ፥ ህንተ ኑናና ዋየቴዳዋዳን፥ ሄዋዳን መንꬁዋካ ኑናና አካናዋ ኑን ኤሬቶ።
8 ኑ ኑናዳን ጾሳ ካልያዋንቶ፥ ኑን ኢስያ ጋድያን ዋየቴዳ ዋይያ ህንተና ሀሳይሳናዉ ኮዬቶ፤ ኑ ዋዪ ኑ ዎልቃፐ ዳርና፥ ኑና ዎꬌ ጊደ፥ ህርጋና ጋካናዉ፥ ኑና ዎጋይ ባይናዋ ዴጼዳ። 9 ኑን ኑ ቦላ ሀይቁዋ ፕርዳይ ፕርደቴዳ ያጊደ ቆፔዶ፤ ሽን ሄዌ ሀኔዳዌ ሀይቄዳ አሳ ሀይቁዋፐ ደንꬅያ ጾሳን ኑን አማነታናፐ አትን፥ ኑ ሁጲያን አማነተናዳና። 10 ጾሳይ ሀዋ ማላ ኢታ ሀይቁዋፐ ኑና አሼዳ፤ እ ኑና አሻና፤ ስንꬃፐካ እ ኑና አሻናዋ ጊደ፥ ህዶታን ናግ ኡቴዶ። 11 ህንተ ዎሴዳ ዳሮ ዎሳን ኑዉ አንጁ ስሜዳ ድራዉ፥ ዳሮ አሳይ ኑ ድራዉ ጾሳ ጋላታና ማላ፥ ህንተካ ቃይ ኑና ዎሳን ማዳና ኮሼ።
ላመቴዳ ጳዉሎሳ ቆፋ
12 ኑን ጬቀትያዌ ሀዋ፤ ሀ ሳኣን ኑን ደእያ ደኡ፥ ኡባ ቃይ ህንተናና ኑዉ ደእያ እትፐተꬃይ ጾሳ አꬎ ኬካተꬃናፐ አትን፥ አሳ አꬌዳ ኤራተꬃና ግደናዋ፥ ቃይ ጾሳይ እሜዳ ጌሻተꬃንነ ሱረተꬃን ኑን ደእያዋ ዎዛና ቆፋይ ኑዉ ማርካቴ። 13-14 አያዉ ጎፐ፥ ህንተ ናባባናዉነ አኬካናዉ ዳንዳይያዋ ጻላላ ህንተንቶ ጻፍያዋፐ አትን፥ ኑን ሀራባ ህንተንቶ ጻፎኮ። ኑ ጎዳ የሱሳ ጋላስ ኑን ህንተናን ጬቀታናዋዳን፥ ህንተካ ኑናን ጬቀታና ማላ፥ ህንተ ሀእ ዉርስ አኬከና የዉዋ ግድን ዉርስ አኬካና ጋደ ቆፓይ።
15 ሄዋ ታን ሎይꬃ ኤሬዳ ድራዉ፥ ህንተ ላኡ ገደ ጎኤታና ማላ፥ ኡባፐ ካሰታደ ህንተኮ ባናዉ ቆፋ ቃቻድ። 16 ታን ማቅዶንያ ባደ ህንተናና ጋከታናዋነ ቃይ ያፐ ስማደ ህንተ ማታና ይሁዳ አꬍሽን፥ ህንተ ታና ማዳናዋ ቆፓ ኡታድ። 17 ሄዋ ድራዉ፥ ታን ሄዋ ቆፓደ ታናን አማነትበይክታ? ታን ታ ቆፋ ቃችያ ዎደ፥ ሳኣ አሳዳን እት ኩꬃን፥ “ኤ፥ ኤ” ዎይ፥ “ግደና፥ ግደና” ጋናዉ ጊጋ ኡታድታ?
18 ሽን ጾሳይ አማነቴዳዋ ግድያዌ ቱማ ግድያዋዳን፥ ኑን ህንተንቶ ኦድያ ቃላይ “ኤ” ግያዋነ “ግደና” ግያዋ ግደና። 19 አያዉ ጎፐ፥ ታን፥ ስላሰነ ጽሞቶስ ህንተ ግዶን ኦዴዳ ጾሳ ናአይ፥ የሱስ ክርስቶስ “ኤ” ግያዋፐ አትን፥ “ግደና” ግያዋ ግደና። ሽን ጾሳ ባጋና እ ኡባ ዎደካ “ኤ”። 20 አያዉ ጎፐ፥ ጾሳይ እማና ጌዳባዉ ኡባዉ ኤኖ ጌዳዌ ክርስቶሳ ባጋና ፖለታና፤ ሄዋ ድራዉ፥ ኑን ክርስቶሳ ባጋና ጾሳ ቦንቾ፥ አመንእ *አመንእ፦ “አመንእ” ግያ ቃላይ ሀዋን “ኤ” ያገትያ ብለꬃ ኦይቄ። ጌቶ። 21 ጾሳይ ክርስቶሳ ባጋና ኑናነ ህንተና መንꬄነ ኦኬ። 22 ኑን አዋ ግድያዋ ኤርስያ ማታፋ እ ኑ ቦላ ዎꬂደ፥ ባረ ጌሻ አያና ዋስያዳን፥ ኑ ዎዛና ግዶን ዎꬄዳ።
23 ቃይ ታን ቆሮንቶሳ ቤናን አጌዳዌ ህንተና ቆሄናዳና። ሄዌ ዎርዶ ግዶፐ ታና ሙራናዉ ታ ሸምፑዋን ጾሳይ ማርካ። 24 ኑን ህንተና ናሸቻናዉ ህንተናና እትፐ ኦꬅያዋንታፐ አትን፥ ህንተ አማንያዋን ህንተና ጎደታናዉ ኮይያዋንታ ግዶኮ፤ አያዉ ጎፐ፥ ህንተንቱ ህንተ አማኑሳን ምኒደ ደኢታ።