1 ታን ላኤንꬁዋ ህንተና ካዮየና ማላ፥ ህንተኮ ቤናዳን፥ ታ ቆፋ ቃቻድ። 2 አያዉ ጎፐ፥ ታን ህንተና ካዮይያዋ ግዶፐ፥ ሀ ታን ካዮዬዳ ህንተ ታና ናሸቻናፐ አትን፥ ኦኔ ታና ናሸቻናዌ? 3 ታን ህንተንቶ ሄ ዳብዳቢያ ጻፌዳዌ፥ ታና ናሸቻናዉ በስያ አሳቱዋን ታን ካዮታናዉ ህንተኮ ባናዉ ኮያቤናዋሳ፤ ታን ናሸትያ ዎደ፥ ህንተ ኡባይካ ቃይ ናሸታናዋ ህንተ ኡባን አማነታይ። 4 አያዉ ጎፐ፥ ታን ህንተንቶ ዳሮ ዋይያንነ ቱጋን ቃይ ዳሮ አፎꬃና ጻፌዳዌ፥ ህንተና ካዮያናሳ ግደና፤ ሽን ታን ህንተና ኡባቱዋ አይ ኬና ሲቃይታንቶ ህንተ ኤራናዳና።

5 ሽን እት ኡራይ ሀራ ካዮዬዳዋ ግዶፐ፥ ታን አ የዉዋ ዳርሳናዉ ኮይከ፤ እ ህንተና ኡባቱዋ ካዮዬዳፐ አትን፥ ታ ጻላላ ካዮይቤና። 6 ህንተፐ ዳርያ ባጋ አሳይ ሄ ብታንያ ማላ አሳ ሄዋዳን ሙሮፐ፥ ሄ ሙራይ አዉ ግዳናዋ። 7 ሄዋ ድራዉ፥ ሄ ብታኒ ሎይꬅ ካዮተና ማላ፥ ህንተ አዉ አቶ ጋናዉነ አ መንꬃናዉ በሴ። 8 ሄዋ ድራዉ፥ ህንተ አ ምንሲደ ሲቅያዋ እ ኤራና ማላ፥ ታን ህንተና ዎሳይ። 9 አያዉ ጎፐ፥ ህንተ ታዉ አዛዘታናዉ ኡባ ዎደ ጊግ ኡቴድተንቶነ ቃይ ፓጭያ ህንተ ዳንዳይንቶ ኤራናዉ፥ ሄ ዳብዳቢያ ህንተንቶ ጻፋድ። 10 እት ኡራይ ናቄዳዋ ህንተ አቶ ግያ ዎደ፥ ታንካ ቃይ አቶ ጋይ፤ ታን አቶ ጌዳዋ ግዶፐ፥ አቶ ጌዳዋ አያነ ክርስቶሳ ስንꬃን ህንተ ድራዉ፥ አቶ ጋድ። 11 ሴጻናይ ኑኮ ዪደ፥ ኑና ጭመና ማላ፥ ታን አቶ ጋድ፤ አያዉ ጎፐ፥ ኑን አ ቆፋ ኤሬቶ።

12 ታን ክርስቶሳ ምሽራቹዋ ቃላ ኦዳናዉ ጽሮኣዳ ቤዳ ዎደ፥ ጎዳይ ያን ታዉ ፐንግያ ዶይ ዎꬄዳ። 13 ታን ታ እሻ ቲታ ያን ደማቤና ድራዉ፥ ታዉ አያናይ ሸምፕቤና። ሄዋ ድራዉ፥ ያን ደእያ አሳ፥ “ሳሮ ደእተ” ጋደ ማቅዶንያ ባድ።

14 ሽን ክርስቶሳ ባጋና ኡባ ዎደ ኑና ጾኖ ካለꬅያ ጾሳ፥ ቃይ ክርስቶሳ ትምርትያ ኑ ባጋና ሽቱዋዳን፥ ኡባሳ ጋꬅያዋ ጋላታይ ጋኮ። 15 አያዉ ጎፐ፥ ኑን አትያ አሳ ግዱዋንነ ꬋይያ አሳ ግዶን ክርስቶስ ጾሳዉ ያርሽያ ሳዉዋ ቶሽኩ ግያ ሽቱዋ ማላ። 16 ኑን ꬋይያዋንቶ ዜእያ ሀይቁዋ፤ ቃይ አትያዋንቶ ደኡዋ እምያ ሳዊያ ሽቱዋ፤ ያትና፥ ሄዋ ኦꬃናዉ ዳንዳይያዌ ኦኔ? 17 ኑን ጾሳ ቃላ ገሎባዳን፥ ዋላኪደ ዛልእያ ሀራ ጮራ አሳቱዋ ማላ ግዶኮ፤ ሽን ጾሳይ ኑና ኪትና፥ አማነቲደ ጾሳ ስንꬃን ክርስቶሳ ባጋና ቃላ ኦዴቶ።