1 ኑን ሽረቲደ፥ ኑ ሁጲያ ሳባናዉ ዶሜዶዬ? ዎይ ሀራ አሳቱዋዋዳን፥ ሳባ ዳብዳቢያ ህንተንቶ የዳናዉ ዎይ ህንተፐ አካናዉ ኮዬቶ? 2 ህንተንቱ ህንተ ሁጲያን አሳይ ኡባይ ኤራናዳንነ ናባባናዳን፥ ኑ ዎዛናን ጻፈት ኡቴዳ ኑ ዳብዳቢያ። 3 ሀ ዳብዳቢያ ክርስቶስ ባረ ሁጲያን ጻፊደ፥ ኑ ቦላ ኪቴዳዌ ቱማ፤ ሀ ዳብዳቢ ደኡዋ ጾሳ ጌሻ አያናን አሳ ዎዛናን ጻፈቴዳዋፐ አትን፥ ሹቻ ቦላ ቃላምያን ጻፈትቤና። ከሳ 24:12፤ ኤር. 31:33፤ ህዝ. 11:19፤ 36:26

4 ኑዉ ክርስቶሳ ባጋና ጾሳን ሀዋ ማላ አማኑ ደኤ። 5 ኑ ዳንዳያይ ጾሳፐ ይያዋፐ አትን፥ ሀ ኦሱዋ ኑን ኑ ሁጲያን ኦꬃናዉ ዳንዳዬቶ ግያዌ ኑዉ አያይነ ባዋ። 6 ኑን ኦራꬃ ጫቆ ኦꬃና ማላ፥ ጾሳይ ኑና ዳንዳይሴዳ፤ ሄ ኦራꬃ ጫቁ ጌሻ አያናዋፐ አትን፥ ጻፈቴዳ ህግያዋ ግደና። ጻፈቴዳ ህጊ ሀይቁዋ አሄ፤ ሽን ጌሻ አያናይ ደኡዋ አሄ። ኤር. 31:31

7 ሹቻ ዎጪደ ጻፌዳ ህጊ እመትያ ዎደ፥ ጾሳ ቦንቹ ቤቴዳ፤ ሙሴ ሶምእያን ደእያ ጶለꬃይ ꬋይያዋ ግዶፐካ፥ ሄ ጶለꬃይ ዳሮ ዎልቃማ ግድያ ድራዉ፥ እስራኤልያ አሳይ አ ሶምእያ ትሽ ኦꬅ ጼላናዉ ዳንዳይቤና። ሀይቁዋ አህያ ህጊ ኦꬅያ ኦሱ ሀዋ ማላ ቦንቹዋና ይያዋ ግዶፐ፥ ከሳ 34:29 8 ጌሻ አያናይ ኦꬅያ ኦሱዋ ቦንቹ አይ ኬና ዳራኔ? 9 አያዉ ጎፐ፥ አሳይ ፕርዳ አክያ ኦሱ ቦንቾ ግዶፐ፥ አሳይ ጽልያ ኦሱዋ ቦንቹ ዋኒደ ዳራንዴሻ? 10 አያዉ ጎፐ፥ ካሰ ቦንቹ ሀእ ባረፐ ሎይꬅ አꬍያ ቦንቹዋ ጋሱዋን ቦንቹዋ ꬋዬዳዌ ቱማ። 11 አያዉ ጎፐ፥ ሄ ꬋዬዳዋን ቦንቹ ደእያዋ ግዶፐ፥ መꬍናዉ ደእያዋን አይ ኬና ዎልቃማ ቦንቹ ደአንዴሻ?

12 ኑን ህዶታን ናግያ ሀዋ ማላባይ ኑዉ ደእያ ድራዉ፥ ቆንጭያን ጻሊደ ሃሳዬቶ። 13 እስራኤልያ አሳይ ꬋይያ ቦንቹዋ ዉርሰꬃ በኤና ማላ፥ ባረ ሶምእያ ናጻላን ካሜዳ ሙሴ ማላ ግዶኮ። ከሳ 34:33 14 ሽን ኡንቱንቱ ዎዛናይ ዶንጭሌዳ፤ አያዉ ጎፐ፥ ኡንቱንቱ ኤጫ ጫቁዋ ናባብያ ዎደ፥ ሀቼ ጋካናዉካ፥ ሄ ናጻላይ ኡንቱንቱ ዎዛና ካም ዎꬄዳ፤ ኦንነ ክርስቶሳና ጋከትያ ዎደ ጻላላን ሄ ናጻላይ ክቼ። 15 ሽን ኡንቱንቱ ሙሴ ማጻፋ ናባብያ ዎደ ኡባን ሀቼ ጋካናዉካ፥ ሄ ናጻላይ ኡንቱንቱ ዎዛና ካም ዎꬄዳ። 16 ሽን ጾሳ ማጻፋይ፥ “ኦንነ ጎዳኮ ስምያ ዎደ፥ አዉደነ ሄ ናጻላይ ቃረቴ” ያጌ። ከሳ 34:34 17 ጎዳይ ጌሻ አያና። ጎዳ አያናይ ደእያ ሳን አይለተꬃይ ባዋ። 18 ኑን ኡባይካ ናጻላን ካመትቤና ሶምእያን ጎዳ ቦንቹዋ በአና *ናጻላን ካመትቤና ሶምእያን፦ እት አሳ ደኡዋን ስንꬃ ሀናናባይ፥ ካሃ ጋርሳን ጶልቂ ቤትያዋዳን ጉሳ። ቃይ ጌሻ አያና ግድያ ጎዳፐ ይያ ሄ ቦንቹ ኑና ባረና ማላትሲደ፥ ቦንቹዋፐ ቦንቾ ላማና።