1 ስም ጾሳይ ኑዉ ሀ ኦሱዋ ባረ ማሮተꬃን ኦꬃናዳን እሜዳ ድራዉ፥ ኑን ሳለቶኮ። 2 ኑን ጌማን ኦꬅያ ዬላይያ ኦሱዋ ኡባ አጎይተ፤ ቃይ ገንያ ኦሱዋካ ኦꬆኮ፤ ዎይ ጾሳ ቃላ ዎርዱዋና ዋላኮኮ። ሄዋዳንካ፥ ቱሙዋ ቆንጭያን ሃሳዪደ፥ ጾሳ ስንꬃን ሱረ ዎዛናዉ ኑና ሺሾይተ።

3 ኑን ኦድያ ዎንጋላ ምሽራቹ ጌሜዳዋ ግዶፐካ፥ ꬋይያ አሳቱዋ ጻላላዉ ጌሜዳ። 4 ሀ ሳኣ ጾሳይ አማነና አሳቱዋ ቆፋ ጆልሴዳ፤ ክርስቶሳ ቦንቹዋ፥ ዎንጋላ ምሽራቹዋ ፖኡዋ ባረንቶ ፖእያዋ፥ ጾሳ ማላትያዋ ኡንቱንቱ በኤና ማላ፥ ኡንቱንታ ድጌዳ። 5 አያዉ ጎፐ፥ የሱስ ክርስቶስ ጎዳ ግድያዋነ አ ድራዉ ኑን ኑ ሁጲያን ህንተንቶ ቆማ ግድያዋ ኦደቶፐ አትን፥ ኑባ ኦዶኮ። 6 አያዉ ጎፐ፥ “ꬉማፐ ፖኡ ፖአና” ጌዳ ጾሳይ ኑ ዎዛናን ባረ ፖኡዋ ፖእሴዳ፤ ቃይ እ ባረ ቦንቾ ኤራተꬃ ፖኡዋ ክርስቶሳ ስንꬃን ፖእያዋ ኑዉ እማናዉ ፖእሴዳ። ዶመꬃ 1:3

7 ሽን ኡባፐ አꬍያ ዎልቃይ ጾሳዋፐ አትን፥ ኑሳ ግደናዋ በሳናዉ ኑዉ ሀ ምንጃይ ኡርቃፐ መቴዳ ሚሻ ግዴዳ ኑ ግዶን ደኤ።

8 ኑን ኡባ ባጋናካ ኡንኤቴዶ፤ ሽን መኤረትበይኮ፤ ቃይ እት እት ዎደ ስꬌቶ፤ ሽን ኑ ኡባናካ አግበይኮ። 9 ኑን የደርሰቴዶ፤ ሽን ጾሳይ ኑና ኦልቤና፤ ቃይ ኑ ሞርከቱ ኑና ኦል አጌድኖ፤ ሽን ኑን ꬋይበይኮ። 10 ቃይ የሱሳ ደኡ ኑ አሳተꬃን ቤታና ማላ፥ ኑን ኡባ ዎደ አ ሀይቁዋ ኑ አሳተꬃን ቶክ ዩዬቶ። 11 አያዉ ጎፐ፥ ሀይቂያ ኑ አሳተꬃ ቦላ የሱሳ ደኡ ቤታና ማላ፥ ፓጻ ደእያ ኑን አ ድራዉ፥ ኡባ ዎደ ሀይቄቶ። 12 ሄዋ ድራዉ፥ ሀይቁ ኑ ግዶን ኦꬄ፤ ሽን ደኡ ቃይ ህንተ ግዶን ኦꬄ።

13 ጾሳ ማጻፋይ፥ “ታን አማኔዳ ድራዉ ሃሳያድ” ያጌ፤ ሄ አማኑዋ አያናይ ኑዉካ ደእያ ድራዉ፥ ኑንካ አማኔቶ፤ ሄዋ ድራዉ፥ ሃሳዬቶ። ማዝ. 116:10 14 ጾሳይ፥ ጎዳ የሱሳ ሀይቁዋፐ ደንꬄዳዌ፥ ኑናካ ቃይ የሱሳና ሀይቁዋፐ ደንꬂደ፥ ህንተናና እትፐ ባረ ስንꬃ ሺሻናዋ ኤሬቶ። 15 ሀዌ ኡባይ ህንተ ድራሳ፤ ጾሳ አꬎ ኬካተꬃይ ዳሮ አሳ ጋክያ ዎደ፥ አሳይ ጾሳ ቦንቾ ዳሮ ጋላታ እማና።

16 ሄዋ ድራዉ፥ ኑን ሳለቶኮ፤ ኑዉ ሀራይ አቶ፥ ቦላ ባጋ አሳተꬃይ ዎቂንቶካ፥ ጋርሳ ባጋ አሳተꬃይ ጋላሳን ጋላሳን ኦራጼ። 17 አያዉ ጎፐ፥ ሀእዉ ዋየትያ ሀ ጉꬃ ዋዪ፥ ኡባፐ ሎይꬅ ዳርያ መꬍና ቦንቹዋ ኑዉ ቤትሳና። 18 ኑን ቤተናዋ ጼሌቶፐ አትን፥ ቤትያዋ ጼሎኮ፤ አያዉ ጎፐ፥ ቤትያባይ ሀእሳ፤ ሽን ቤተናዌ መꬍናዉ ደእያዋ።