1 አያዉ ጎፐ፥ ኑን ደእያ ሀ ሳኣ ዱንካኒ ኮለቶፐ፥ ኑዉ አሳይ ኬጽቤና ጎሊ፥ ጾሳይ ኬጼዳዌ፥ ሳሉዋን መꬍናዉ ደእያዋ ኑን ኤሬቶ። 2 ኑን ሀ አላምያን ደኢደ ዳሮ ኦሌቶነ ሳሉዋን ደአና ኑ ጎልያ ማያናዉ ሎይꬅ አሞቴቶ። 3 ኑን ሄዋ ማዪደ፥ ካሎቶኮ፤ 4 ኑን ሀ ሳኣ ዱንካንያን ደኢደ፥ ዴጸቲደ ኦሌቶ፤ አያዉ ጎፐ፥ ሀይቂያ አሳተꬃይ ደኡዋን ምተታና ማላ፥ ኑን ማያናዉ ኮዬቶፐ አትን፥ ካሎታናዉ ኮዮኮ። 5 ኑና ሀዎ ጊግሴዳዌ ጾሳ፤ ቃይ እ ባረ ጌሻ አያና ዋሰ ኦꬂደ፥ እሜዳዌ አ።

6 ሄዋ ድራዉ፥ ኑን ኡባ ዎደ አማነቴቶ፤ ቃይ ኑን ኑ ጎለን ሀ አሳተꬃን ደኤዳ ኬናን፥ ጎዳፐ ሻከቲደ ደእያዋካ ኤሬቶ። 7 አያዉ ጎፐ፥ ኑን አማኑዋን ደኤቶፐ አትን፥ በእያዋን ደኦኮ። 8 ኑና አማንꬄ፤ ቃይ ሀ አሳተꬃን ኑ ጎልያ አግ ጎለ ቢደ ጎዳና እትፐ ደእያዌ ኑና ናሸቼ። 9 ሄዋ ድራዉ፥ ኑን ቃይ አሹዋን ደእና ደአና ꬋይና፥ ኑ ቆፋይ አ ናሸቻናሳ። 10 አያዉ ጎፐ፥ ኑን ሁጲያን ሁጲያን ኦꬄዳ ኦሱ ሎአ ግድና፥ ዎይ ኢታ ግድና፥ ኑዉ በስያዋ አካናዉ፥ ክርስቶሳ ፕርዳ ኦይድያ ስንꬃን ኡባይካ ሺቃናዉ በሴ።

11 ሄዋ ድራዉ፥ ኑን ጾሳዉ ያዩሳይ አየንቶ ኤሪደ፥ ሄዋዳን ቃይ አሳካ አማንꬄቶ፤ ጾሳይ ኑና ኡባና ኤሬ፤ ቃይ ህንተካ ህንተ ዎዛና ቆፋን ኑና ኤሪታ ያጋደ ቆፓይ። 12 ቤትያባን ጬቀትያዋንቱፐ አትን፥ ዎዛናን ደእያዋን ጬቀተና አሳቶ ህንተ ኦድ ዛርያባይ ደአና ማላ፥ ህንተ ኑናን ጬቀታናዳን፥ ኑን ህንተንቶ ጋሱዋ ግዳናዉ ኮይያዋፐ አትን፥ ኑና ጋላታናዉ ኮዮኮ። 13 ኑን ጎይያዋ ግዶፐ፥ ጾሳ ቦንቹዋሳ፤ ዎይ ቃይ ዎዛናና ደእያዋ ግዶፐካ፥ ህንተና ጎአናሳ። 14 ክርስቶሳ ሲቁ ኑና ግዴ፤ አያዉ ጎፐ፥ እት አሳይ አሳ ኡባዉ ሀይቄዳዋ ኑን አኬኬዶ፤ ሄዋ ግዶፐ አሳይ ኡባይ አናና ሀይቄዳ። 15 ፓጻ ደእያዋንቱ ባረንቱ ድራዉ ሀይቄዳዎነ ቃይ ሀይቁዋፐ ደንዴዳዎ ደአናፐ አትን፥ ስንꬃፐ ባረንቱ ሁጰዉ ደኤና ማላ፥ እ አሳ ኡባ ድራዉ ሀይቄዳ።

16 ሄዋ ድራዉ፥ ኑን ሀዋፐ ስንꬃዉ ኦናነ አሳ ቆፋን ፕርዶኮ፤ ሀራይ አቶ፥ ኑን ክርስቶሳ ካሰ አሳ ቆፋን ፕርዴዳዋ ግዶፐካ፥ ስም ስንꬃፐ ሄዋዳን ፕርዶኮ። 17 ሄዋ ድራዉ፥ ኦንነ ክርስቶሳና ደኦፐ፥ ኦራꬃ መታ፤ ጭማይ አꬌዳ፤ በእተ፥ ኡባባይካ ኦራጼዳ። 18 ክርስቶሳ ባጋና ኑና ባረናና ስገꬄዳ ጾሳይ ኡባባካ ኦꬄዳ፤ ቃይ እ ኑዉ ሀራቱዋ ባረናና ስገꬅያ ኦሱዋ እሜዳ። 19 ጾሳይ ክርስቶሳ ባጋና አሳ ኡባ ባረናና ስገꬄ፤ አሳ ናጋራካ አሳ ቦላ ፓይደና፤ ቃይ አሳ ባረናና ስገꬅያ ኪታካ ኑዉ እሜዳ።

20 ስም ጾሳይ ኑ ባጋና ህንተንቶ ሃሳይያዋዳን፥ ኑንካ ክርስቶሳ ድራዉ ሃሳይያ እ ኪቴዳዋንታ፤ ቃይ ኑን ህንተና፥ “ጾሳና ስገትተ” ጊደ፥ ክርስቶሳ ድራዉ ዎሴቶ። 21 ኑን ጾሳ ጽሎተꬃ ክርስቶሳ ባጋና አካና ማላ፥ ናጋራ ኤረና ክርስቶሳ ኑ ድራዉ፥ ጾሳይ ናጋራንቻ ኦꬄዳ።