1 ሄዋ ድራዉ፥ ታ ሲቃቶ፥ ጾሳይ ሀ ኡባባ ኑዉ እማና ጌዳዋፐ ህን ባጋን፥ ኑ አሹዋነ ኑ ሸምፑዋ ቱንስያ ኡባባፐ ኑ ሁጲያ አነ ጌሾይተ፤ ቃይ ጾሳዉ ያይያዋን ኡባና ጌዪደ ደኤቶ።

2 ህንተ ኡሉዋ ኑና በስተ፤ ኑን ኦናነ ናቂበይኮ፤ ኦናነ ቆህበይኮ፤ ቃይ ኦናነ ጭምበይኮ። 3 ታን ሄዋ ህንተ ቦላ ፕርዳናዉ ጊከ፤ አያዉ ጎፐ፥ ታን ካሰ ህንተንቶ ጌዳዋዳንካ፥ ህንተንቱ ኑ ዎዛናን ደኢታ፤ ኑን ደእናካ ሀይቂናካ፥ እትፐ ደኤቶ። 4 ታን ሃሳይያዋ ህንተፐ ቆስከ፤ ታን ህንተናን ጬቀታይ፤ ኑ ዋይያ ኡባን ታን ሎይꬃ ምናይነ ናሸታይ።

5 አያዉ ጎፐ፥ ሀራይ አቶ ኑን ማቅዶንያ ቤዳ ዎደ፥ ኡባ ባጋንካ ዋየቴዶፐ አትን፥ ሸምፕበይኮ፤ ሀራ አሳና ዋላሳይ ደኤ፤ ኑ ዎዛናንካ ያሻይ ደኤ። 6 ሽን ካዉሼዳዋንታ መንꬅያ ጾሳይ፥ ቲቶ ዩሳን ኑና መንꬄዳ። 7 ኑና ካሰዋፐ አꬅ ናሸችያዌ፥ ቲቶ ዩሳ ጻላላ ግደና፤ ሽን ህንተ አ መንꬄዳዌ፥ ህንተ ታና በአናዉ አሞቴዳዋነ ታዉ ቃረቴዳዋ ቃይ ህንተ ታና ማዳናዉ ጊገቴዳዋ እ ኑዉ ኦዴዳ።

8 አያዉ ጎፐ፥ ታ ዳብዳቢ ህንተና ካዮዬዳዋ ግዶፐካ፥ አያዉ ጻፋድታሻ ጊከ፤ አያዉ ጻፋድታሻ ጎፐካ፥ ታ ዳብዳቢ ህንተና ጉꬃ ዎድያ ካዮዬዳዋ በአይ። 9 ሀእ ታና ናሸችያዌ ታን ህንተና ካዮዬዳ ድራሳ ግደና፤ ሽን ህንተ ካዩ ህንተና ናጋራፐ ዛሬዳዋ ድራሳ፤ አያዉ ጎፐ፥ ኑን ህንተና አያንነ ቆሄናዳን፥ ጾሳይ ባረ ኮዬዳዋዳን፥ ህንተና ካዮዬዳ። 10 አያዉ ጎፐ፥ ጾሳይ ኮይያ ካዩ ናጋራፐ ዛሪደ አቶተꬃኮ አሄ፤ ሄዌካ ታን ባይዛድ ጌና ዎዛና፤ ሽን አላምያ ካዩ ሀይቁዋ አሄ። 11 ጾሳይ ሄ ህንተ ካዩዋን አይ አይፍያ እሜደንቶ በእተ። ህንተና አይ ኬና ደንꬄደንቶነ ህንተ ጌሻተꬃ ቱማያናዉ ህንተና አይ ኬና ዛሩዋ እምሴደንቶ፥ አይ ኬና ሀንቀꬄደንቶነ አይ ኬና ታዉ ያሽሴደንቶ፥ አይ ኬና ሴልሴደንቶ፥ አያ ኬና ታና ላሞትሴደንቶነ ናቆ ኦሱዋ ኦꬃዋንታ ሙራናዉ አይ ኬና ጊግሴደንቶ ፓጭ በእተ፤ ህንተ ህንተ ሁጲያን ጌሻ ግዴዳዋ ኡባባንካ ኤርሴድታ።

12 ሄዋ ድራዉ፥ ታን ሄ ዳብዳቢያ ህንተንቶ ጻፌዳዋ ግዶፐካ፥ ናቄዳ ኡራ ዎይ ናቀቴዳ ኡራ ድራሳ ግደና፤ ሽን ህንተ ኑዉ ዎይሳ ቆፕንቶነ ጾሳ ስንꬃን ህንተንቶ ቆንጭሳናዉ ታን ጻፋድ። 13 ኑን ምኔዳዌ ሄዋ ድራሳ፤ ሄ ኑ ምኖታ ቦላ፥ ቲቶ ናሸቴዳዎ ኑን ኡባፐ ዳርያ ናሸቻ ናሸቴዶ። አያዉ ጎፐ፥ ህንተ ኡባይ አ ህርጋፐ ሸምፕሴድታ። 14 ታን ህንተዋ ሳባደ አዉ ኦድና፥ ህንተ ታና ዬላይበይክታ፤ ሽን ኑን ህንተንቶ ኡባ ዎደ ቱሙዋ ሃሳዬዶ፤ ሄዋዳንካ፥ ኑን ቲቶ ስንꬃን ህንተዋ ሳቤዳዌ ቱማ ግዴዳ። 15 ሄዋ ድራዉ፥ ህንተ ኡባይ አዉ ያዪደ ኮኮሪደ፥ አ ዎት ሞኬድተንቶነ ቃይ አዉ አይ ኬና አዛዘቴድተንቶ እ ሀሳይያ ዎደ፥ ህንተና ሎይꬅ ሲቄ። 16 ታን ኡባባን ህንተና አማንያ ድራዉ ናሸታይ።