1 ኑዋዳን ጾሳ አሳቶ፥ ጾሳ አꬎ ኬካተꬃይ ማቅዶንያ አማንያዋንቱ ግዶን ኦꬄዳዋ ህንተና ኤርሳናዉ ኮዬቶ። 2 ኡንቱንቱ አꬌዳ ዋይያን ዎልቃማ ፓጭያ ፓጨቴድኖ፤ ሽን ኡንቱንቱ ህዬሳ ግዶፐካ፥ ባረንቱ እምያዋን ዳሮ ኬክኖነ ቃይ ዎልቃማ ናሸቻ ናሸቲኖ። 3 አያዉ ጎፐ፥ ኡንቱንቱ ባረንቱ ዎልቃ ኬና ቃይ ሀራይ አቶ ባረንቱ ዎልቃፐካ ዳርያዋ ዶሲደ እሜዳዎ ታን ማርካ። 4 ኡንቱንቱ ጾሳ አሳቱዋ ማድያ ሎኦ ኦሱዋ ኑናና ኦꬃናዉ ኑና ዳሮ ዎሴድኖ። 5 ኡንቱንቱ ኑን ቆፔዳዋፐ አꬂደ ኦꬄድኖ፤ ካሰቲደ ኡንቱንቱ ባረንቱ ሁጲያ ጎዳዉ እሜዳዋፐ ጉይያን፥ ጾሳ ሸንያዳን፥ ኑዉካ ባረንቱ ሁጲያ እሜድኖ።

6 ሄዋ ድራዉ፥ ኑን ሀ ሎኦ ኦሱዋ ዶሜዳ ቲቶ ጉጅ ኦꬃናዳንነ ህንተና ማዲደ፥ ሄ ኦሱዋ ፖልሳናዳን አ ዎሴዶ። 7 ሽን ህንተ ኡባባን፥ አማኑዋን፥ ሃሳያን፥ ኤራተꬃን፥ ዎልቃማ ሎኦ አሙዋን፥ ኑና ሲቅያዋንካ ዱረቴዳዋዳን፥ ሀ ሎኦ ኦሱዋንካ ህንተንቱ ኬካ ግዳናዋ ኑን ኮዬቶ።

8 ታን ሄዋ አዛዛናዉ ጊከ፤ ሽን ሀራቱዋ ዎልቃማ ሎኦ አሙዋ ባጋና ህንተ ሲቁ አይ ኬና ቱመንቶ ኤራናዉ ጋይ። 9 አያዉ ጎፐ፥ ህንተ ኑ ጎዳ የሱስ ክርስቶሳ አꬎ ኬካተꬃ ኤሪታ፤ ክርስቶስ ዱረ ግድ ደኢደ፥ ህንተ አ ህዬሳተꬃን ዱረታናዳን፥ ህንተ ድራዉ ህዬሴዳ።

10 ታን ሀ የዉዋ ህንተና ዞርያዌ ሀዋ፤ ዝላይꬅ ህንተ ዶሜዳዋ ሀእ ዉርስያዌ ህንተንቶ ሎአ፤ ህንተ ኦሶ ጻላላዉ ግደናን፥ ኦꬃና ቆፋዉካ ካሰቴዳዋንታ። 11 ህንተ ኦꬃናዉ ሎይꬅ አሞቴዳዌ ኦꬂደ ፖሌዳዋና ጊጋ ግዳና ማላ፥ ህንተንቶ ዳንዳየቴዳዋዳንካ ኦሱዋ ፖልተ። 12 አያዉ ጎፐ፥ እት ኡራይ እማናዉ ሎይꬅ ኮዮፐ፥ እ ባረዉ ደኤዳ ኬና እማናፐ አትን፥ አዉ ባይናዋ አፐ አከና።

13 አያዉ ጎፐ፥ ታን ሀራንቱ ዋይያፐ ሸምፕና፥ ህንተ ዋየትተ ጊከ፤ ህንተ ኡባይካ ቃራ ደአናዳናፐ አትን። 14 ኡንቱንቱ ፓላሀይ ህንተ ፓጫ ኩንꬃና ማላ፥ ህንተንቶ ሀ ዎድያን ደእያ ፓላሀይ ኡንቱንቱ ፓጫ ኩንꬃና ኮሼ፤ ላኡካ ሄዋን ቃራን ጎኤቲኖ። 15 ጾሳ ማጻፋን፥ “ዳርሲደ ሺሼዳዎ ፓላህቤና፤ ቃይ ጉꬃ ሺሼዳዎካ ፓጭቤና” ጌተቲደ ጻፈቴዳ። ከሳ 16:18

16 ሽን ኑን ህንተንቶ ቆፕያዋ ማላ፥ ዎልቃማ ቆፋ ቲታ ቆፍሴዳ ጾሳ ጋላታይ ጋኮ። 17 ቲቶ ህንተኮ ባናዉ ባረ ቆፋ ቃቼዳዌ፥ ባረ ሁጲያን ህንተና ማዳናዉ ዳሮ አሞቴዳ ግሻፐ አትን፥ ኑ ዞርያ ጻላላ አኬዳዋና ግደና። 18 ምሽራቹዋ ቃላ ኦድያ ባረ ኦሱዋን አማነትያ አማንያዋንቱ ስንꬃ ኡባን ዳሮ ቦንቼቴዳ እሻ ኑን አናና እትፐ ኪቴቶ። 19 ሄዋ ቦላን ቃይ፥ ሀ ኑን ኦꬅያ ሎኦ ኦሱዋ እ ኑናና እትፐ ኦꬃናዉነ ጎዳ ቦንቾ ኑን ሀራቱዋ ማዳናዉ ሎይꬅ አሞትያዋ በሳናዉ አማንያ አሳቱ አ ዶሪደ ሱንꬄድኖ።

20 ኑን ኦꬅያ ሀ ኬካ እሞታ ድራዉ፥ ኦንነ ኑና ዝግረና ማላ ናገቴቶ። 21 አያዉ ጎፐ፥ ኑን ጎዳ ስንꬃን ሎኦባ ኦꬃናዋ ጻላላ ግደና፤ ሽን አሳ ስንꬃንካ ሎኦባ ኦꬃናዉ ቆፔቶ። ሌም. 3:4

22 ኑን ዳሮ ገደ ፓጭ በኤዳ ኑ እሻ፥ ኡባ ዎደ ህንተና ማዳናዉ ዳሮ አሞትያዋ፥ ሀ አሳቱዋና ህንተኮ ኪቴቶ፤ ቃይ ሀእ እ ህንተና ዳሮ አማንያ ድራዉ፥ ህንተና ማዳናዉ ካሰዋፐ አꬂደ ሎይꬅ አሞቴ። 23 ቲቶዋ ግዶፐ፥ እ ህንተና ማዳናዉ ታናና እትፐ ኦꬅያ ታ ላግያ፤ የኮ እሻቱዋባ ግዶፐ፥ ኡንቱንቱ አማንያ አሳቱ ኪቴዳዋንታነ ኡንቱንቱ ደኡ ክርስቶሳ ቦንችስያዋ። 24 ስም አማንያዋንቱ ኡባቱ ህንተ ሲቁ ቱማ ግድያዋ ኤራና ማላ፥ ቃይ ኑን ህንተዋ ሳቢያዌ ልከ ግድያዋ ኤራና ማላ፥ ህንተ ሲቁዋ ኡንቱንታ በስተ።